သျှမ်းပြည်တောင်ပိုင်း တောင်ကြီးမြို့ပေါ်ရှိ လိုင်းကားဂိတ်များ အေးသာယာ ကားလေးကွင်း နှင့် တောင်ကြီး – ဟိုပုံး ပြည်ထောင်စု လမ်းမဘေးရှိ TBC ကားဂိတ်သို့ အပြီးရွှေ့ပြောင်းပေးရန် စစ်ကောင်စီမှ ထပ်မံဖိအားပေး နေကြောင်း စုံစမ်း သိရှိရသည်။

ဒီဇင်ဘာ (၁၇) ရက်နေ့မှာ မြို့ပေါ်ရှိ လိုင်းကားဂိတ်များကို တောင်ကြီး – ဟိုပုံး ပြည်ထောင်စု လမ်းမဘေးရှိ TBC ကားဂိတ်သို့ အပြီးရွှေ့ပြောင်းခဲ့ကြောင်း စစ်ကောင်စီက ညွန်ကြားထားသည်ဟု လိုင်းကားပြေးဆွဲနေသည့် အမျိုးသား တစ်ဦး ကပြောသည်။

တောင်ကြီးမြို့တွင်း ခရီးသည်တင်ပို့ဆောင်ရေး ယာဉ်လိုင်းဂိတ်စခန်းများ ဖွင့်လှစ်နေခြင်း တွေ့ရှိပါက လိုင်းကားကို ဖြတ်သိမ်းရသည်အထိ အရေးယူဆောင်ရွက်သွားမည်ဖြစ်ကြောင်း စစ်ကောင်စီမှ ခြိမ်းခြောက်ထားကြောင်း တောင်ကြီးမြို့ပေါ် လိုင်းကားပြေးဆွဲသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ ကျနော်တို့ တောင်ကြီးမြို့ပေါ်ကရှိတဲ့ လိုင်းကားဂိတ် အားလုံးကို အေးသာယာ ကားလေးကွင်း နဲ့ မြို့အပြင်က ၄ မိုင် TBC ကားဂိတ်ကို ရွှေ့ပြောင်းခိုင်းတယ်။ သူတို့ ခိုင်းသလို ကျနော်တို့ လိုက်မလုပ်ရင် အရေးယူမယ်ပေါ့။ နောက်ဆုံး လိုင်းကားဖြတ်သိမ်းတဲ့ အထိ အရေးယူမယ်လို့တော့ ခြိမ်းခြောက်ထားတယ် “ ဟု ၎င်း လိုင်းကားသမားတစ်ဦးက ပြောသည်။

လက်ရှိ အေးသားယာ ကားလေးကွင်းက ဆိုင်ခန်းတစ်ခန်းကို ကျပ်ငွေ သိန်း ၃၆၀ ဖြင့် ရောင်းချပေးနေသလို တောင်ကြီး – ဟိုပုံး ပြည်ထောင်စု လမ်းမဘေးရှိ TBC ကားဂိတ်ဝင်းရှိ ဆိုင်ခန်းတစ်ခန်းကိုလည်း တစ်လလျှင် ကျပ်ငွေ (၈) သိန်း နှင့် အငှားပေးပြီး ကျပ်ငွေ သိန်း (၈၀၀) ဖြင့် စစ်ကောင်စီက ရောင်းချပေးနေကြောင်း သိရသည်။

အဆိုပါ ခရီးသည်တင်ပို့ဆောင်ရေး ယာဉ်လိုင်းကားဂိတ်များ မြို့တွင်း၌ ဖွင့်လှစ်ခြင်းမရသဖြင့် ကုန်တင်၊ ကုန်ချရာမှာ အခက်ခဲများစွာ ကြုံတွေ့နေရကြောင်း ဆိုသည်။

“ ရန်ကုန် – မန္တလေးက လာတဲ့ လိုင်းကားဆိုရင် တောင်ကြီးမြို့ပေါ်ကို ပေးမတက်ဘူး။ ဟိုပုံး လမ်းဘက်က လာတဲ့ လိုင်းကားတွေကို မြို့ထဲ ပေးမဝင်ဘူး။ အခု လူတင်၊ ကုန်တင်၊ ကုန်ချ မယ်ဆိုရင် အရမ်းခက်သွားတယ်။ မြို့ထဲမှာ နောက်ထပ် ကားတစ်စီး မလောက်ရင် နှစ်စီးထပ်ဆွဲရမယ်။ အဲ့ကားကနေ မြို့ပေါ်မှာ ကုန်တင်၊ လူတင် ပြီးတော့မှ မြို့ပြင်က ကားဂိတ်ကို နောက်တစ်ခေါက် လာပို့ရတယ် “ ဟု ၎င်းက ထပ်လောင်းပြောသည်။

ထို့ကြောင့် တောင်ကြီးမြို့ပေါ်ရှိ လိုင်းကားဂိတ်များ အားလုံးကို မြို့ပြင်သို့ ရွှေ့ပြောင်းသွားရသဖြင့် လိုင်းကားဂိတ်ဖွင့်လှစ်သူများ အခက်ခဲရှိသလို ပစ္စည်းတင်ပို့မည့် ဒေသခံ ပြည်သူများလည်း အခက်ခဲကြုံတွေ့နေရကြောင်း သိရှိရသည်။

တောင်ကြီးမြို့ ဦးကြီးခမ်းရပ်ကွက်တွင် နေထိုင်သည့် အမျိုးသားတစ်ဦးက မြို့တွင်းရှိ လိုင်းကားဂိတ်များ ရွှေ့ပြောင်းသွားပြီးနောက် ကုန်ပစ္စည်းတင်ပို့ရာမှ ယခင်ကထက် ပိုပြီး ကုန်ကျစရိတ်များလာသလို အချိန်လည်း ပိုကုန်လာကြောင်း ဆိုသည်။

“ မြို့ပေါ်က လိုင်းကားမရှိတော့ရင် တစ်ခုခုပစ္စည်း ပို့ချင်ရင် အေးသာယာကို တစ်ခါဆင်းရမယ်။ ပြီးရင် မြို့ပေါ်တစ်ခါပြန်တက်လာရမယ်ဆိုတော့ ငွေလည်းကုန်တယ် အချိန်လည်းကုန်တယ် “ ဟု ၎င်းအမျိုးသား ကပြောသည်။

ထို့အပြင် ဆိုင်ခန်းအသစ်ကို မဝယ်နိုင်သည့် လိုင်းကားဂိတ် တချို့မှာလည်း လက်ရှိမှာ ရပ်နားထားရကြောင်း သိရသည်။

ပြီးခဲ့သည့် ဇူလိုင်လပိုင်းတွင် စစ်ကောင်စီ၏ လက်အောက်ခံ မြို့နယ် ပုဂ္ဂလိကယာဉ် လုပ်ငန်းများ ကြီးကြပ်ရေး ကော်မတီက တောင်ကြီးမြို့ပေါ်ရှိ လိုင်းကားဂိတ်စခန်းများနှင့် ဆိုင်ခန်းများကို အေးသာယာ ကားလေးကွင်းသို့ ရွှေ့ပြောင်းရန် ဖိအားပေးခဲ့ကြောင်း သိရသည်။