သျှမ်းပြည်မြောက်ပိုင်း နမ့်ဆန်မြို့အတွင်းရှိ စစ်ဘေးရှောင်များကို သွားရောက် ကူညီသည့်အဖွဲ့အစည်းများအား အာဏာသိမ်း စစ်ကောင်စီ တပ်ဖွဲ့မှ စစ်ဆေးမှု ပြုလုပ်ကြောင်း သတင်းသိရသည်။

ယမန်နေ့ (ဒီဇင်ဘာလ ၁၄) ရက်တွင် နမ့်ဆန်မြို့နယ် ဇယန်းကြီး ဘုန်းကျောင်းတွင် လာရောက်ခိုလှုံသည့် စစ်ဘေးရှောင်များကို စားနပ် ရိက္ခာနှင့် အဝတ်အထည်များ သွားရောက် ကူညီထောက်ပံ့ပေးသည့် အဖွဲ့များကို ဘုရားကြီးကျေးရွာ အဝင် နှင့် နမ့်ဆန် ပြည်သူ့ဆေးရုံအနီး၌ စစ်ကောင်စီတို့က တားမြစ် စစ်ဆေးမှု ပြုလုပ်ခဲ့ကြောင်း သွားရောက်ကူညီသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့က ကား ၅ စီးနဲ့ သွားကြတာ၊ ဘုရားကြီး အဝင်နဲ့ ဆေးရုံ အနီးမှာ စစ်ဆေးခံရတယ်၊ လူသားချင်းစာနာ ထောက်ထားမှုအနေနဲ့ စစ်ရှောင်ကို သွားကူ မလို့ပါ ပြောတော့ စစ်ရှောင်က ဘယ်ကလဲဆိုပြီး မေးသေးတယ်၊ နောက်ဆုံး ဘယ်အချိန် ပြန်လာပါ့မယ်လို့ ပြောပြီးမှ အဲ့ဂိတ်ကနေ ဖြတ်ခွင့်ပြုတာ” ဟု စစ်ဆေးမှုကို ကြုံတွေ့ရ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ဆေးမှု ပြုလုပ်သည့် စစ်ကောင်စီ တပ်သားများထံမှ အရက်နံ့များ ရနေသည့်အပြင် စစ်ရှောင်ကူညီ ရန် သွားသည့် အဖွဲ့ကိုလည်း လိုအပ်သည်ထက် စစ်ဆေးမေးမြန်းမှု ပြုလုပ်ကြောင်း သိရသည်။

ထို့အပြင် စစ်ရှောင်စခန်းသို့ ရောက်ရှိရာ၌ စစ်ကောင်စီတပ်ဖွဲ့တို့မှ TNLA တပ်ဖွဲ့နှင့် တိုက်ပွဲဖြစ်ပွားရာ နေရာသို့ လေယာဥ်ဖြင့် ဗုံးများထပ်မံကြဲချသည့်အတွက် စစ်ရှောင်စခန်းနေရာထိ အသံကြားရပြီး မြေပြင်ပါ တုန်သွား ကြောင်းလည်း သိရသည်။

“စစ်ရှောင် စခန်းရောက်နေချိန်မှာ ကုန်းသာဘက် ရဟတ်ယာဥ်နဲ့ ဗုံးထပ်လာကြဲလို့ မြေပြင်တောင် တုန်တယ်၊ ဗုံး ၃ လုံးလောက် ကျပြီဆို ကလေးတွေ သက်ကြီးရွယ်အိုတွေက မြေကြီးတွေ အော်တို မှောက်ပြီးသားပဲ၊ ကြောက်ကြ တာလေ၊ ကျနော်တို့လည်း တတ်နိုင်သလောက်တော့ အားပေးစကား ပြောပေးခဲ့ပါတယ်” ဟု ၎င်း အမျိုးသား က ဆက်ပြောသည်။

ဒီဇင်ဘာလ ၁၃ ရက်နေ့တွင် တအာင်းအမျိုးသမီးအဖွဲ့အစည်း (TWO) မှ ဇယန်းကြီး ဘုန်းကြီးကျောင်းရှိ စစ်ရှောင်များ လိုအပ်သည့် အစားအသောက် အပါအဝင် စောင်၊ အိပ်ယာခင်း၊ အမျိုးသမီး လစဉ်သုံးပစ္စည်း၊ သွားတိုက်ဆေး/တံ နှင့် စသည့် အခြေခံ အသုံးအဆောင်ပစ္စည်းများ သွားရောက် ကူညီပေးခဲ့ကြောင်းလည်း သိရသည်။

လက်ရှိ ဇယန်းကြီး ဘုန်းကြီးကျောင်းရောက် စစ်ရှောင်များသည် နမ့်ဆန်မြို့နယ် ဟူးမန်း၊ ကုန်းသာ၊ မန်လုံး၊ တာလတ်၊ ဆာငါမ်ကျေးရွာ များမှ ဖြစ်ကြပြီး အိမ်ထောင်စု ၅၇၁ စုနှင့် လူဦးရေ (၁,၇၀၀) ကျော်ရှိနေကြောင်း သိရသည်။

“ကျမတို့ သွားကူညီပေးခဲ့တာ ဟုတ်ပါတယ်။ စားနပ်ရိက္ခာကတော့ နောက်တစ်ပတ်လောက်ထိ လုံလောက်နိုင် ပါသေးတယ်။ ဒါပေမဲ့ ဆောင်းရာသီ ဖြစ်နေတော့ စောင်တွေ အနွေးထည်တွေ ပြီးတော့ ကလေးဒိုင်ဘာတွေက လိုအပ်တယ်၊ ပြီးတော့ အိမ်သာလည်း လုံလောက်မှု မရှိဘူး” ဟု TWO မှ အမည်မဖော်လိုသူ တစ်ဦးက သျှမ်းသံတော်ဆင့်ကို ပြောသည်။

နမ့်ဆန်မြို့နယ်အတွင်းတွင် ပြီးခဲ့သည့် ဒီဇင်ဘာလ ၇ ရက်မှ ၁၃ ရက်နေ့အထိ တစ်ပတ်ခန့်ကြာအောင် စစ်ကောင်စီနှင့် TNLA ကြား ထိတွေ့တိုက်ပွဲပြင်းထန်လျှက်ရှိပြီး ယနေ့အချိန်ထိ စစ်ကောင်စီဘက်မှ ရဟတ်ယာဥ်ဖြင့် ပစ်ကွင်းရှာပြီး ဗုံးကြဲချ တိုက်ခိုက်နေကြောင်း သတင်းသိရသည်။