သျှမ်းပြည်မြောက်ပိုင်း နမ့်ခမ်းမြို့ လွယ်ဟွမ်ရွာတွင် နေထိုင်သည့် အသက် ၁၆ နှစ် အရွယ်ရှိ လွေးအိုဟန်မိုးသည် သူငယ်ချင်းတစ်ဦးနှင့် ဈေးဝယ်သွားရင်း ပျောက်ဆုံးနေကြောင်း စုံစမ်းသိရသည်။

ယခု (ဒီဇင်ဘာလ) ၁၂ ရက် ညနေပိုင်း ၄ နာရီဝန်းကျင်တွင် လွေးအိုဟန်မိုးသည် သူငယ်ချင်း အမျိုးသားတစ်ဦးနှင့် ဈေးဝယ်သွားရန် အိမ်ကိုအကြောင်းကြားပြီး ထွက်သွားရာမှ ယနေ့ (ဒီဇင်ဘာ ၁၄)ရက် အချိန်ထိ အိမ်ကိုပြန်မလာဘဲ ပျောက်ဆုံးနေကြောင်း ၎င်းနှင့်နီးစပ်သည့် အသိုင်းအဝိုင်းက သျှမ်းသံတော်ဆင့်ကို ပြောသည်။

“ ဟိုတစ်နေ့က သူ့ သူငယ်ချင်းကောင်လေး တစ်ယောက်နဲ့ ဈေးသွားမယ်ဆိုပြီး ထွက်သွားတာ။ ဈေးခဏသွားမယ်နော် ဆိုပြီး ထွက်သွားကတည်းက ဒီနေ့ဒီချိန်ထိ ပြန်မလာသေးဘူး။ သူတို့နှစ်ယောက်ကလည်း ဘာဖုန်းမှ မရှိဘူး။ လွေးအိုဟန်မိုးကတော့ အထဲအင်္ကျီအပွ နဲ့ အပေါ်က ဂျင်းအင်္ကျီအပါးလက်ရှည် ထပ်ထားတယ်“ ဟု ၎င်းနီးစပ်သည့်အသိုင်းအဝန်းမှ အမျိုးသားတစ်ဦးက ပြောသည်။

အဆိုပါ ပျောက်ဆုံးသွားသည့် ရက်မှစ၍ သက်ဆိုင်ရာ ရဲတပ်ဖွဲ့နှင့် လက်နက်ကိုင် တပ်ဖွဲ့များကို တိုင်ကြားထားခြင်း မရှိသေးကြောင်းလည်း သိရသည်။

ပျောက်ဆုံးနေသည့် အသက် ၁၆ နှစ် လွေးအိုဟန်မိုးနှင့် အသက် ၁၈ နှစ်အရွယ် အညီ ဆိုသူဖြစ်ပြီး ၎င်းနှစ်ဦးကို တွေ့ရှိထားပါက ဖုန်းနံပါတ် 09 425 174 303 ကို ဆက်သွယ်ပြီး အကြောင်းကြားပေးရန်လည်း ၎င်းနီးစပ်သူများက ပြောဆိုလိုက်သည်။

နမ့်ခမ်းမြို့ဒေသတွင် တိုင်းရင်းသားလက်နက်ကိုင် အများအပြားလှုပ်ရှားသည့် နယ်မြေဖြစ်သည်။