သျှမ်းပြည်မြောက်ပိုင်း နမ့်ဆန်မြို့နယ် အတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် အာဏာသိမ်း စစ်ကောင်စီ တပ်ဖွဲ့တို့ကြား ထိတွေ့တိုက်ပွဲသည် ၆ ရက်ကြာ ဖြစ်ပွားခဲ့ပြီးနောက် ကုန်းသာရွာ လုံးကျွတ် ပျက်စီးသွားကြောင်း သတင်းသိရသည်။
ဒီဇင်ဘာ (၇) ရက်မှ (၁၂) ရက်နေ့ထိ တိုက်ပွဲကာလ အတွင်း စစ်ကောင်စီဘက်မှ တိုက်လေယာဥ် ရဟတ်ယာဥ်များဖြင့် ဗုံးကြဲတိုက်ခိုက်ခြင်း ရှိသည့် အတွက် ကုန်းသာကျေးရွာသို့ လက်နက်ကြီး ကျပြီး ဘုန်းကြီးကျောင်း အပါအဝင် ပြည်သူ့နေအိမ် ရွာလုံးကျွတ်နီးပါး ပျက်စီးကြောင်း ဒေသခံများက ပြောသည်။
“ကုန်းသာရွာထဲကို လက်နက်ကြီး အများအပြား ကျတယ်လေ၊ ဒါကြောင့် ရွာသားတွေလည်း စစ်ရှောင်ထွက်ပြေး ရတယ်၊ အိမ်တွေ ဘုန်းကြီးကျောင်းတွေလည်း လက်နက်ကြီးတွေ ထိပြီး မီးလောင်တာ၊ ပျက်စီးတာက ရွာလုံးကျွတ်နီးပါးပဲ၊ ရစရာကို မရှိတော့အောင် ဖြစ်နေပြီ” ဟု အမည်မဖော်လိုသူ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကုန်းသာကျေးရွာသည် လူနေအိမ်ခြေ ၆၀ ကျော် ရှိသည့် ရွာကြီး တစ်ရွာဖြစ်ပြီး၊ လက်ရှိတွင် စစ်ကောင်စီတို့ ပစ်လိုက်သည့် လက်နက်ကြီးကြောင့် အိမ်ခြေ ၅၀ ကျော်က လုံးဝ ပျက်စီးသွားပြီး ကျန်အိမ်များက ထိခိုက် ပျက်စီးမှု ရှိနေကြကြောင်း သိရသည်။
ယင်းကဲ့သို့ နှစ်ဖက် တိုက်ပွဲကြား ပြည်သူ့နေအိမ်များ ထိခိုက်ပျက်စီးရခြင်း နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် TNLA ကို ဆက်သွယ်မေးမြန်းရာ ပြန်လည်ပြုပြင် နေရာချထားရေး အတွက် မပြောနိုင်သေးကြောင်း သျှမ်းသံတော်ဆင့်ကို ပြောသည်။
“ပြည်သူလူထုနေအိမ် ထိခိုက်ပျက်စီးတာလည်း တော်တော်များတယ်လို့ သိရတယ်။ ဒါကြောင့် ပြန်လည်ထူထောင် ရေးတော့ ကျနော်တို့ မပြောတတ်သေးဘူး။ ခါတိုင်းကတော့ ကျနော်တို့ တပ်က တောက်လျှောက်လုပ်ခဲ့ ဖူးတယ်” ဟု TNLA ပြောရေးဆိုခွင့် ဒု – ဗိုလ်မှူးကြီး တားအိုက်ကျော် က သျှမ်းသံတော်ဆင့်ကို ပြောသည်။
ထို့အပြင် ကုန်းသာရွာ၊ ဟူးမန်းရွာ၊ ပိန်းလုံရွာတို့မှ စစ်ရှောင်ထွက်ပြေးရသည့် ပြည်သူများသည် မိသားစုဝင် နှင့် ကွဲပြီး တောထဲပျောက်ဆုံးနေသည့် စစ်ရှောင်များလည်း ရှိနေကြောင်း သတင်းသိရသည်။
ပျောက်ဆုံးနေသည့် စစ်ရှောင်များအနက် အသက်မပြည့်သေးသည့် ကလေးငယ် (၁၀) ဦး ထက်မနည်း ရှိနေပြီး သက်ကြီးပိုင်း အပါအဝင် (၃၀) ထက်မနည်း ပျောက်ဆုံးနေကြောင်း သတင်းသိရသည်။
