မြန်မာ – တရုတ်နယ်စပ်ဂိတ်တွင် ပြောင်းဖူး နှင့် ဆန်များကို တရုတ်နိုင်ငံသို့ တင်ပို့ရန်အတွက် သက်တမ်း ကုန်ဆုံးတော့မည် ဖြစ်သဖြင့် ပိတ်ဆိုင်းသွားမည် ဟု စုံစမ်းသိရှိရဿည်။
လာမည့် ဒီဇင်ဘာ ၂၀ ရက် တွင် တရုတ်နိုင်ငံဘက်သို့ တင်ပို့ရန် ပြောင်းဖူး နှင့် ဆန်တို့သည် တင်ပို့ရန် သက်တမ်း ကုန်တော့ မည်ဖြစ်ကြောင်း သိရသည်။
“ လာမယ့် ၂၀ ရက် ကျရင်သူက ပြောင်းဖူး နဲ့ ဆန် တင်ပို့ဖို သက်တမ်းက ကုန်သွားပြီ။ နယ်စပ်ဂိတ်က ပိတ်သွားတာတော့မဟုတ်ဘူး။ သူတို့ကတင်ပို့ဖို့ ပေးထားတာက ၃ လပဲလေ။ ကိုဗစ်ကို ဖြေလျှော့ပေးတဲ့ အနေနဲ့ ၂၅ ရက် ထိရမယ်လို့ကြားတယ်” ဟု ပြောင်းဖူးကုန်သည် အမျိုးသမီးတစ်ဦးက ပြောသည်။
အဆိုပါ ပြောင်းဖူးတင်ပို့မှုကို ပိတ်တော့မည်ဖြစ်သည့်အတွက်ကြောင့် ပြောင်းဖူး စိုက်ပျိုးသူများကလည်း မရောင်းရမည်ကို စိုးရိမ်နေကြောင်း သိရသည်။
“ ဒီလကုန်ရင် တရုတ်ဘက်က ပိတ်ပြီတဲ့ မန္တလေးဘက် ရောင်းသွားမယ်လို့ကြားတယ်။ တကယ်လို့ တရုတ်ဘက်က မဝယ်ယူတော့ဘူးဆိုရင်တော့ ဘာမှ မျှော်လင့်စရာ မရှိတော့ဘူးပေါ့။ ပွဲစားတွေနားက ပေးတဲ့ဈေးပဲ စောင့်ကြည့်ရတော့မယ် ” ဟု ပြောင်းဖူး စိုက်ပျိုးသူတစ်ဦးက ပြောသည်။
အဆိုပါ တရုတ်နိုင်ငံဘက်မှ ကိုဗစ် ၁၉ ကို ဖြေလျှော့ပေးလိုက်သော်လည်း ကုန်တင်ပို့ရန်အတွက် ရှန်တိန်စနစ် လူအစားထိုး မောင်းပေးနေရသဖြင့် အချိန်ကြာမြင့်ပြီး ကုန်ကျစရိတ်လည်း ပိုများကြောင်း သိရသည်။
ထိုသို့ အချိန်ကြာမြင့်သည့်အတွက်ကြောင့် လက်ရှိ တင်ပို့ရန် ကျန်ရှိနေသည့် ပြောင်းဖူး အများအပြား ကျန်ရှိနေကြောင်းသိရသည်။
“ ကိုဗစ်တော့ ဖြေလျှော့ပေးတယ်။ စစ်တာလည်း ဖြေလျှော့ပေးတယ်။ ဒါမဲ့ လူအစားထိုး မောင်းနေရတာတော့ရှိတယ်။ ဒါက ကုန်ကျစရိတ်များတယ်။ ၁၀၅ မိုင်ကနေ ကျင်စန်းကျော့ဆိုလည်း ၂ သိန်း လောက်ကုန်နေပြီး။ တရုတ်ဘက်ဆိုလည်း ၃ သိန်းထပ်ကုန်တယ်။ အခုလည်း ပို့ဖို့ အများကြီး ကျန်နေသေးတယ်” ဟု အထက်ပါ ကုန်သည် အမျိုးသမီးတစ်ဦးက ပြောသည်။
တရုတ်နိုင်ငံတွင် ပြီးခဲ့သည့် နိုဝင်ဘာ ၂၉ ရက်က စပြီး တရုတ်နိုင်ငံ သမ္မတ ရှီကျင့်ဖျင် ၏ ကိုဗစ် သုည မူဝါဒကို ဆန္ဒပြ ကန့်ကွက်ခဲ့ကြပြီး ဒီဇင်ဘာ ၈ ရက်နေ့တွင် Lockdown ဖြေလျှော့ပေးခဲ့သည်။
Leave a Comments