သျှမ်းပြည်မြောက်ပိုင်း နမ့်ဆန်မြို့နယ် ကုန်းသာကျေးရွာအနီးရှိ TNLA တပ်စခန်းကို ဒီဇင်ဘာ (၇) ရက်က စပြီး စစ်ကောင်စီက လေကြောင်း နဲ့ တိုက်ခိုက်တာ၊ လက်နက်ကြီးနဲ့ ပစ်ခတ်တာ တွေကြောင့် စစ်ရှောင် (၁,၀၀၀) ကျော် ထွက်ပြေးတိမ်းရှောင်နေရပါတယ်။ တိုက်ပွဲ အခြေနေနဲ့ ပတ်သက်ပြီး တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) ရဲ့ ဒု – ဗိုလ်မှူးကြီး တားအိုက်ကျော် ကို သျှမ်းသံတော်ဆင့် မှ နန်းနောင့်နောင့် က ဆက်သွယ်မေးမြန်းထားပါတယ်။
မေး ။ ။ ဒီကနေ့မှာ သျှမ်းပြည်မြောက်ပိုင်း နမ့်ဆန်မြို့နယ်ထဲမှာ စစ်ကောင်စီတပ်ဖွဲ့နဲ့ အာဏာသိမ်း စစ်ကောင်စီ တပ်ဖွဲ့တို့ တိုက်ပွဲ အခြေအနေ ဘယ်လိုရှိလဲရှင့်။
ဖြေ ။. ။ ဒီနေ့မှာတော့ အသံငြိမ်နေပါတယ်။ ဘာတိုက်ပွဲသံမှတော့ မကြားရသေးဘူး။ ဒါပေမယ့် ကျနော်တို့ တိုက်ပွဲ ပြင်းထန်တာကတော့ ဒီဇင်ဘာလ ၇ ရက်နေ့ကနေ ၁၁ ရက် ည ပိုင်းအထိ ဖြစ်ပါတယ်။ ၁၁ ရက် ညပိုင်းရဲ့ နောက်ပိုင်း မှာတော့ အသံက ငြိမ်သွားပြီ။ ဒါပေမယ့် ဒီနေ့ ၁၃ ရက်နေ့ မနက်ပိုင်း ၁ နာရီလောက်မှာတော့ ရဟတ်ယာဥ်တစ်စီး နဲ့ ပစ်မှတ်ကိုလာရှာတဲ့ သဘောရှိတယ်။ အဲ့အချိန်မှာ ပစ်တော့ မပစ်သွားဘူး။ ၂ နာရီကျော်လောက် မှာတော့ အဲ့တိုက်ပွဲဖြစ်ပွားတဲ့ နားတစ်ဝိုက်မှာပဲ ဗုံးကြဲ တိုက်ခိုက်မှု ထပ်မံပြုလုပ်တယ်။ ၄ လုံးလောက် ပစ်သွားတာ။ နှစ်ဖက် ပစ်ခတ်တာတော့ မရှိတော့ဘူး။
မေး ။ ။ ဒီလိုမျိုးထိတွေ့တိုက်ပွဲ စတင်ဖြစ်လာပုံနဲ့ ထိတွေ့တိုက်ပွဲ ပြင်းပြင်းထန်ထန်ဖြစ်ရတာက ဘာကြောင့်လို့ ထင်မိပါသလဲရှင့်။
ဖြေ ။ ။ သူတို့ရဲ့ အကြောင်းရင်း နဲ့ ရည်ရွယ်ချက်ကိုတော့ ကျနော်တို့ မသိဘူး။ တိုက်ပွဲဖြစ်ရတဲ့ ကိစ္စကတော့ ကျနော်တို့ နေရာ ကို ဒီဇင်ဘာလ ၇ ရက်နေ့က ရဟတ်ယာဥ် ၅ စီး နဲ့ ၃ နေရာလောက်ကို စစ်သားတွေ လာချသွား တာ။ အဲ့လို လာချတဲ့ အချိန်မှာပဲ ကုန်းသာမှာ ရှိတဲ့ ကျနော်တို့ တပ်ဖွဲ့ဝင်တွေက သူတို့လူ ချချချင်းပဲ နှစ်ဖက်တိုက်ပွဲ ဖြစ်ပွားတာ။ တိုက်ပွဲဖြစ်ပြီး ဟိုဘက်က လေယာဥ်နဲ့ ပြန်လာပစ်တော့ နှစ်ဖက်တိုက်ပွဲ ပြင်းထန်သွားတာပေါ့။
မေး ။. ။ လက်ရှိ ထိတွေ့တိုက်ပွဲဖြစ်ပွားတဲ့နေရာက TNLA တပ်ဖွဲ့အတွက် ကျင်လည်သွားလာတဲ့ နေရာလို့ သိရပါတယ်။ ဆိုတော့ နှစ်ဖက် ထိတွေ့တိုက်ပွဲမှာလည်း TNLA ဘက်က အသာစီး ရင်ဆိုင်နိုင်ခဲ့တယ်ဆိုတာ ဟုတ်လားရှင့်။
ဖြေ ။ ။ အသာစီးနဲ့ အောက်စီး ရယ်လို့တော့ ကျနော် မသုံးသပ်လိုဘူး၊ တိုက်ပွဲက အပြန်အလှန်ပစ်ခတ်တာ ဖြစ်တယ်။ သူတို့ဘက်ကနေ လက်နက်ကြီး နဲ့ နမ့်ဆန်တပ်ကနေ ရမ်းပစ်နေတာရှိတယ်၊ လေကြောင်းနဲ့ ပစ်တာ ကတော့ နေ့ရော ညရော၊ ဂျက်လေယာဥ်တွေနဲ့ အများအပြား လာပစ်သွားတာ။ အဲ့နဲ့ ဒီနယ်မြေတွေက TNLA ဘက်က ကျွမ်းကျင်တယ်လို့ ပြောနိုင်တယ်။
မေး ။ ။ ထိတွေ့ တိုက်ပွဲဖြစ်ပွားစဥ်က နှစ်ဖက်တပ်ဖွဲ့ရဲ့ ထိခိုက်ကျဆုံးမှုနဲ့ ကျေးရွာထဲ ထိခိုက်ပျက်စီးမှုကရော ဘယ်လို ရှိသလဲရှင့်။
ဖြေ ။ ။ ထိခိုက်ကျဆုံးမှုကတော့ နှစ်ဖက်လုံးက ရှိပါတယ်၊ ဒါပေမယ့် အတိအကျတော့ မသိရသေးဘူးပေါ့နော်၊ လူနေအိမ် ထိခိုက်မှုလည်းရှိတယ်။ အများဆုံးကတော့ ကုန်းသာရွာကပေါ့။ တချို့က လုံးဝ ပျက်စီးသွားတာ ရှိတယ်။ တချို့လည်း အနည်းအကျဥ်း ထိခိုက်မှုပေါ့၊ ဘုန်းကြီးကျောင်း သာသနာ့ အဆောက်အဦးလည်း ထိခိုက်တယ်။ လုံးဝ မီးလောင်သွားတဲ့ နေအိမ် အရေအတွက်ကိုတော့ ကျနော် မသိ ရသေးဘူး။ ပြန်ပြီး စိစစ်နေတုန်းပဲ ရှိသေးတယ်။
မေး ။ ။ စစ်ကောင်စီဘက်က စစ်ရဟတ်ယာဥ် အသုံးပြုမှု ဘယ်လောက်များလဲ။
ဖြေ ။ ။ ခန့်မှန်းခြေ အရတော့ အကြိမ် ၄၀ နဲ့ ၅၀ ကြားရှိပါတယ်။ ရဟတ်ယာဥ်ရယ်။ ဂျက်လေယာဥ်တွေနဲ့ပေါ့။
မေး ။ ။ အခုလိုမျိုး စစ်ကောင်စီဘက်ကနေ TNLA တပ်ဖွဲ့ကို ရဟတ်ယာဥ်တွေ နဲ့ ဗုံးကြဲတိုက်ခိုက်ရတာက ဘာကြောင့်လဲရှင့်။
ဖြေ ။ ။ သူတို့ရဲ့ ရည်ရွယ်ချက်ကတော့ ကျနော်တို့ မသိရဘူး၊ ဒါပေမယ့် ဒီဟာက စစ်ကောင်စီဘက်ကနေ တိုင်းရင်းသား အင်အားစု ပေါ်မှာ လုပ်နေကျ လုပ်နည်းအတိုင်းတွေပါပဲ၊ တစ်ဖက်မှာ တိုက်ပွဲနားပြီးရင် နောက်တစ်ဖက်မှာ ထပ်တိုက် အဲ့လိုမျိုးတွေပေါ့။
မေး ။ ။ ထိတွေ့တိုက်ပွဲ ဖြစ်ပွားတဲ့ ကာလမှာရော TNLA တပ်ဖွဲ့ကို မဟာမိတ်တပ်ဖွဲ့တွေက လာရောက် စစ်ကူပေးတာ ရှိလားရှင့်။
ဖြေ ။ ။ မဟာမိတ်တပ်ဖွဲ့က လာပြီးစစ်ကူတိုက်ပေးတာမျိုးမရှိဘူး။ အထူးသဖြင့် ဒီတိုက်ပွဲဖြစ်ပွားတဲ့နေရာက ကျနော်တို့ TNLA တပ်ဖွဲ့တစ်ဖွဲ့တည်း လှုပ်ရှားတဲ့ နေရာဖြစ်ပါတယ်။ ကျန်တဲ့ မဟာမိတ်က လာပြီး ကူတာ မရှိဘူး။
မေး ။ ။ အခုအခြေအနေအရဆိုရင် နေရပ်စွန့်ခွာပြီး စစ်ရှောင်ထွက်ပြေးရတဲ့ ပြည်သူတွေရော နေရပ်ပြန်လာလို့ အဆင်ပြေနိုင်ပြီလားရှင့်။
ဖြေ ။ ။ ဟုတ်ကဲ့။ ကျနော်ထင်တာကတော့ တိုက်ပွဲလည်းမရှိတော့ဘူး။ စကစဘက်ကလည်း မရှိတော့ဘူး ဆိုရင် ကျနော်တို့ဘက်က လက်နက်ကြွင်း လက်နက်ကျန်တွေ၊ မှိုင်းတွေကို ရှင်းလင်းရမယ့် ကိစ္စတွေ ရှိသေးတယ်။ ကျနော်ထင်တာကတော့ ဒီ တစ်ရက် နှစ်ရက်အတွင်း ပြန်လို့ မရသေးဘူး။ သင့်လည်း မသင့်သေးဘူး။ နောက် တစ်ရက် နှစ်ရက်တော့ စောင့်ပါအုံးလို့ ပြောချင်ပါတယ်။
မေး ။ ။ နောက်တစ်ခု မေးချင်တဲ့ မေးခွန်းကတော့ နှစ်ဖက်ထိတွေ့တိုက်ပွဲကြား ပျက်စီးသွားတဲ့ ပြည်သူ့ နေအိမ်တွေ ကို လက်နက်ကိုင် တပ်ဖွဲ့အနေနဲ့ ပြန်လည် ပြုပြင်မေးမြန်းဖို့အတွက် အစီအစဥ် ဘယ်လိုရှိလဲ။
ဖြေ ။ ။ ဒါကတော့ နောက်ဆက်တွဲ ကိစ္စပေါ့နော်။ ဘယ်လို ဆက်လုပ်ရမလဲ ဆိုတာ ကျနော်တို့ မသိရသေးဘူး။ ပြည်သူလူထုနေအိမ် ထိခိုက်ပျက်စီးလည်း တော်တော်များတယ်လို့ သိရတယ်။ ဒါကြောင့် ပြန်လည်ထူထောင်ရေး အပိုင်းကိုတော့ ကျနော်တို့ မပြောတတ်သေးဘူး။ ခါတိုင်းကတော့ ကျနော်တို့ တပ်က တောက်လျှောက်လုပ်ခဲ့ ဖူးတယ်။
မေး ။ ။ နောက်ဆုံးအနေနဲ့ ဘာများ ဖြည့်စွက် ပြောချင်ပါသလဲရှင့်။
ဖြေ ။ ။ မရှိတော့ပါဘူး။
အခုလို အချိန်ပေးပြီး ဖြေကြားတဲ့အတွက် ကျေးဇူးတင်ပါတင်ရှင့်။
