စစ်ကောင်စီ၏ အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် တွေ့ဆုံရန်အတွက် NCA လက်မှတ်ရေးထိုးထားသည့် လက်နက်ကိုင်တပ်ဖွဲ့များ (EAOs) မှ အလွတ်သဘောဆွေးနွေး ညှိနှိုင်းရေး အဖွဲ့ ဖွဲ့စည်းခဲ့ကြောင်း သတင်းသိရသည်။
ယင်းကဲ့သို့ အလွတ်သဘော တွေ့ဆုံညှိနှိုင်းရေး အဖွဲ့ ဖွဲ့စည်းခြင်းသည် EAOs များ တပေါင်းတစည်းတည်း NSPNC နှင့် တွေ့ဆုံဆွေးနွေးရန် အတွက် ရည်ရွယ်ကြောင်း NCA-S EAO (၇) ဖွဲ့၏ အလွတ်သဘော ဆွေးနွေးညှိနှိုင်းရေးအဖွဲ့ ပြောရေးဆို ခွင့်ရ ဗိုလ်မှူးကြီး စောကျော်ညွန့်က သျှမ်းသံတော်ဆင့်ကို ပြောသည်။
အလွတ်သဘော တွေ့ဆုံဆွေးနွေးအဖွဲ့ အဖြစ် ဖွဲ့စည်းထားသည့် EAO ၇ ဖွဲ့သည် သျှမ်းပြည် ပြန်လည် ထူထောင်ရေး ကောင်စီ (RCSS)၊ မွန်ပြည်သစ်ပါတီ (MNSP)၊ ဒီမိုကရေစီအကျိုးပြု ကရင့်တပ်မတော် (DKBA)၊ ကရင်ငြိမ်းချမ်းရေး ကောင်စီ (KNU/KNLA (PC) ၊ လားဟူဒီမိုကရက်တစ် အစည်းအရုံး (LDU) ၊ ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) နှင့် ရခိုင်ပြည်လွတ်မြောက်ရေးပါတီ (ALP) တို့ဖြစ်သည်။
“ဒီအလွတ်သဘောဆွေးနွေးမှုမှာ စုဖွဲ့ထားတာကတော့ တိုင်းရင်းသား လက်နက်ကိုင် အဖွဲ့ ၇ ဖွဲ့ပဲ ရှိပါတယ်၊ NCA လက်မှတ် ထိုးထားပြီး နစက က ဖိတ်ခေါ်တဲ့ ငြိမ်းချမ်းရေး ဆွေးနွေးပွဲကို တက်ရောက်ခဲ့ပြီးတဲ့ အဖွဲ့အစည်းတွေပဲ ဖြစ်ပါတယ်၊ အရင်ကလို တစ်ဖွဲ့ချင်းတွေ့ဆုံတဲ့ အခင်းအကျင်းမဟုတ်တော့ပဲ ဒီအဖွဲ့ ၇ ဖွဲ့ကနေပြီးတော့ တခါတည်း တပေါင်းတစည်းတည်း တွေ့ဆုံနိုင်တဲ့ အခင်းအကျင်း ၊ စုပေါင်းတွေ့ဆုံနိုင်တဲ့ အကြောင်းအရာနဲ့ ကျနော်တို့က ပထမဆုံး အလွတ်သဘောနဲ့ ဆောင်ရွက်ဖို့ ကြိုးပမ်းတာပါ” ဟု ဗိုလ်မှူးကြီး စောကျော်ညွန့်က သျှမ်းသံတော်ဆင့်ကို ပြောသည်။
စစ်ကောင်စီတပ်ဖွဲ့မှ ဥက္ကဌ ဒုဗိုလ်ချုပ်ကြီး ရာပြည့် ဦးဆောင်သည့် NSPNC အဖွဲ့နှင့် တွေ့ဆုံရန်အတွက် NCA လက်မှတ်ရေးထိုးထားသည့် EAOs တပ်ဖွဲ့ (၇) ဖွဲ့က ဆွေးနွေးမှု မတိုင်ခင် အလွတ်သဘော ဆွေးနွေး ညှိနှိုင်းရေး အဖွဲ့ကို ဖွဲ့စည်းခြင်းဖြစ်ကြောင်း ဗိုလ်မှူးကြီး စောကျော်ညွန့်က ဆက်ပြောသည်။
“သက်ဆိုင်သူတွေ အားလုံးပါဝင်တဲ့ နိုင်ငံရေး တွေ့ဆုံဆွေးနွေးမှု မတိုင်ခင်မှာ မလုပ်နိုင်သေးတဲ့ စပ်ကြားမှာ လက်ရှိ နေပြည်တော်သွားခဲ့တဲ့ အဖွဲ့ ၇ ဖွဲ့ကနေ စုပေါင်းဖွဲ့စည်းထားတဲ့ ဒီအလွတ်သဘော ဆွေးနွေးညှိနှိုင်းရေး အဖွဲ့နဲ့ စုပေါင်းအဖြေရှာနိုင်တဲ့ အခင်းအကျင်းတစ်ခုကို ကျနော်တို့ စတင် အစပျိုးလို့ရအောင် ကျနော်တို့အနေနဲ့ အလွတ်သဘောပေါ့လေ ပွင့်ပွင့်လင်းလင်း စတင်အခြေပြုတာဖြစ်ပါတယ်၊ ပြောရမယ်ဆိုရင် ဒါက အခုမှ စတင် အခြေပြုတယ်၊ ကမ်းလှမ်းတယ်၊ ညှိနှိုင်းတယ်ပေါ့ဗျာ၊ အလွတ်သဘော ဆွေးနွေးမှု မလုပ်နိုင်သေးဘူး” ဟု ဗိုလ်မှူးစောကျော်ညွန့်က ပြောသည်။
EAO (၇) ဖွဲ့၏ အလွတ်သဘောဆွေးနွေးညှိနှိုင်းရေးအဖွဲ့အနေနှင့် ရေရှည်တည်တံ့သော ငြိမ်းချမ်းရေး တည်ဆောက်နိုင်ရန် ရည်ရွယ်ကာ နှစ်ဖက်လက်ခံနိုင်သော ဘုံသဘောထားနှင့် သဘောတူညီချက်များ ရရှိနိုင်ရေး ကြိုးပမ်းသွားရန် ဆန္ဒရှိကြောင်းလည်း သတင်းသိရသည်။
EAOs အဖွဲ့ (၇) ဖွဲ့ နှင့် NSPNC တို့၏ အလွတ်သဘော တွေ့ဆုံဆွေးနွေးမှု မတိုင်ခင် ၃ ရက်အလိုတွင် (NSPNC) ဥက္ကဌ ဒုဗိုလ်ချုပ်ကြီး ရာပြည့်ထံ ပေးပို့သည့် EAOs အဖွဲ့ (၇) ဖွဲ့၏ စာလည်းပေါက်ကြား လာသည်။
ထို စာထဲတွင် ဒီဇင်ဘာလ ၁၂ ရက်တွင် ထိုင်းနိုင်ငံ ချင်းမိုင်မြို့၌ တဖက်လျှင် ကိုယ်စားလှယ် အနည်းငယ် ဖြင့် သိုသိပ်စွာ အလွတ်သဘောဆွေးနွေးလိုကြောင်း၊ ဒီဇင်ဘာ ၁၅ ရက်မှ ၁၆ ရက်အထိ တောင်ကြီးမြို့ (သို့မဟုတ်) မော်လမြိုင်မြို့တွင် နှစ်ဖက်ကိုယ်စားလှယ်စုံညီစွာဖြင့် အလွတ်သဘောဆွေးနွေးလိုကြောင်း စာအရ သိရသည်။
ထို့နောက် ဒီဇင်ဘာ ၂၀ ရက်မှ ၂၁ ရက်အထိ ရန်ကုန်မြို့တွင် တရားဝင် ဆွေးနွေးမှုများ ဆက်လက် ပြုလုပ်ရန် အဆိုပြုပြီး ရရှိသည့် ဘုံသဘောထားများနှင့် သဘောတူညီချက်များကို နှစ်ဖက်သင့်တော်မည့် နေရာနှင့် အချိန် ကာလတွင် လက်မှတ်ရေးထိုးရန် အဆိုပြုကြောင်း EAOs (၇)၏ အလွတ်သဘော ဆွေးနွေးညှိနှိုင်းရေး အဖွဲ့ က ပြောဆိုသည်။
ပြီးခဲ့သည့် ဩဂုတ်လ ၂၂ ရက်က နေပြည်တော်တွင် ပြုလုပ်သည့် စစ်ကောင်စီ၏ အစိုးရအဖွဲ့ အစည်းအဝေးတွင် စစ်ကောင်စီ ဥက္ကဌက NCA လက်မှတ်ထိုးပြီးနောက် တိုင်းရင်းသားလက်နက်ကိုင်အဖွဲ့ (EAO) များ အနေနှင့် လက်နက် ဆက်လက်ကိုင်ချင်ပါက မြန်မာစစ်တပ်နှင့် နယ်ခြားစောင့်တပ် (BGF) ထဲဝင်ခွင့်ပြုမည်ဖြစ်ကြောင်း ပြောဆိုခဲ့ ဖူးသည်။
