သျှမ်းပြည်မြောက်ပိုင်း ပြောင်းစိုက်ပျိုး တောင်သူမှာ နှစ်စဉ်နှစ်တိုင်း အရှုံးပေါ်နေသော်လည်း အရဲစွန့်ပြီး စိုက်ပျိုးနေ ရကြောင်း တောင်သူများထံမှ သိရသည်။
ယခု ဒီဇင်ဘာလ သည် ပြောင်းချိုးသည့် ကာလအတွင်း ပြောင်းထွက်နှုန်းမှာ ယခင်နှစ်ထက် တစ်ဝက်လျှော့ကျကာ အထွက်နှုန်း နည်းလာသည့်အတွက် စိုက်ပျိုးကုန်ကျစရိတ် နှင့် တွက်ချေမကိုက်သဖြင့် ထပ်မံ အရှုံးပေါ်နေကြောင်း သီပေါမြို့ဒေသခံ ပြောင်းစိုက်ပျိုးတောင်သူ စိုင်းဆိုင်မွမ်းက သျှမ်းသံတော်ဆင့်ကို ပြောသည်။
ထို့အပြင် တရုတ်နယ်စပ်ဒေသတွင် ပြောင်းဝယ်ယူသော တရုတ်ကုမ္ပဏီများ မရှိသဖြင့် လက်ရှိ ပြောင်းဈေးနှုန်း တစ်ပိဿကို ၉၀၀ ကျပ်သာ ပေးဝယ်ယူနေကြောင်း သိရသည်။
“ပြောင်းမျိုးစေ့က ကျနော်တို့ ပွဲစားဆီမှာ ဝယ်ရတယ်လေ။ ပြောင်းမျိုးစေ့ကလည်း ဗမာပြည်ဘက်ကလာတဲ့ ပြောင်းစေ့ဆိုတော့ အရည်အသွေး နည်းနည်း ညံ့တယ်။ အရင်နှစ်က တစ်ဧကကို ပြောင်း ၅၅ ပိဿအိတ်၊ ၂၀ အိတ်ရတယ်ဆိုပေမယ့် ဒီနှစ်ကတော့ ၁၅ အိတ် လောက်ဘဲရတော့တယ် “ ဟု ၎င်း အမျိုးသားတစ်ဦးက ပြောသည်။
လက်ရှိ သျှမ်းပြည်တောင်သူများသည် ပြောင်းကို မြို့နယ်အလိုက် ပွဲစားငယ်များ၌ ရောင်းချပေးရပြီး အောက်မြန်မာပြည်မှ မန္တလေးမြို့ ပြောင်းပွဲစားရုံထံသို့ တင်ပို့ရောင်းချပေးနေရကြောင်း သိရသည်။
သျှမ်းပြည်မှ ပြောင်းစိုက်ပျိုးတောင်သူမှာ နှစ်စဉ်နှစ်တိုင်း အရှုံးပေါ်နေသော်လည်း စားဝတ်နေရေးအတွက် အရဲစွန့်ပြီး စိုက်ပျိုးနေကြောင်း သိရသည်။
“ နယ်စပ်မှာ ပိတ်လိုက်၊ ဖွင့်လိုက် နဲ့ ဖြစ်နေတော့ ပြောင်းဈေးလည်း ပုံမှန်မရဘူး။ အရင်(နိုဝင်ဘာလ)က ပြောင်း တစ်ပိဿကို ၁ ထောင်ကျော်ရတယ်၊ အခု ဂိတ်က ပြန်ပိတ်သွားတော့ ပြောင်းဈေး ပြန်ကျသွားပြီ။ တစ်ပိဿကို ၉၀၀ ကျပ် ပေးပြီး ပြန်ဝယ်တယ်။ ကျနော်တို့ ပြောင်းစိုက်လာတာ ဆယ့်နှစ်ချီနေပြီလေ၊ ရှုံးနေလဲ အရဲစွန့်ပြီး စိုက်ရတာပေါ့ “ ဟု ၎င်း တောင်သူတစ်ဦးက ပြောသည်။
စစ်အာဏာသိမ်းပြီး ၂ နှစ်နီးပါးကာလတွင် မြန်မာကျပ်ငွေ တန်ဖိုးကျဆင်းလာပြီး ဒေါ်လာငွေမှာ တန်ဖိုး အဆမတန် မြင့်တက်လာသည့်အတွက် ငွေကြေးဖောင်းပွလာရာ နှောင်နှစ် ပြောင်းစိုက်ပျိုးတဲ့ တောင်သူများမှာလည်း စားရိတ်ပိုကုန်ကျလာနိုင်ကြောင်း သိရသည်။
