သျှမ်းပြည်အရှေ့ပိုင်း တာချီလိတ်မြို့ ဆန်ဆိုင်းရပ်ကွက်ရှိ (A389 bar) အနီးပတ်ဝန်းကျင်၌ ရပ်ထားသော ကားတစ်စီးကို အမည်မသိ အမျိုးသားတစ်ဦးက မီးရှို့ရန် ကြိုးစားနေကြောင်း သိရသည်။
ယနေ့ ဒီဇင်ဘာ ၆ ရက် မနက်ပိုင်းအချိန်က (A389 bar) ဆိုင်ရှေ့တွင် ရပ်ထားသည့် ကားတစ်စီးကို အသက် (၃၀) ဝန်းကျင် အရွယ်ရှိ အမည်မသိ အမျိုးသားတစ်ဦးက ကား၏ ဓာတ်ဆီဖုံးကိုဖွင့်ပြီး မီးရှို့ရန်ကြိုးစားနေစဉ် ဒေသခံများက အချိန်မှီသွားရောက် တားဆီးနိုင်ခဲ့ကြောင်း တာချီလိတ်ဒေသခံ အသက် ၂၇ နှစ်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ သူက ဆေးကြောင်တာလည်း မဟုတ်ဘူး။ အဲ့လမ်းဘေးနားမှာပဲ နေပြီး ထမင်းဆိုလည်း အဲ့နား (bar) တွေမှာဘဲ တောင်းစားတယ်။ ဘာကြောင့် မီးရှို့ဖို့ လုပ်တာလည်းမေးတာ့ မဖြေဘူးဗျာ။ ကျနော်ထင်တာတော့ သူက စိတ်ပိုင်းဆိုင်ရာ တစ်ခုခုဝင်နေတာထင်တယ် “ ဟု ၎င်း အမျိုးသားတစ်ဦးက ပြောသည်။
အဆိုပါ အမျိုးသားတစ်ဦးကို ဒေသခံများက စစ်ဆေးမေးမြန်းပြီးနောက် ပြန်လွှတ်ပေးခဲ့ကြောင်း ၎င်း အနီးပတ်ဝန်းကျင်မှာ ကားများရပ်လျှင် သတိထား ဆင်ခြင်သင့်ကြောင်း ၎င်းက ထပ်လောင်းပြောသည်။
“တာချီလိတ်မှာ လူမျိုးပေါင်းစုံနေတော့ ဆေးသုံးတဲ့သူတွေ၊ ဆေးကြောင်တဲ့သူတွေ အရမ်းများတယ်။ သူခိုး၊ ဓားပြတွေလည်းရှိတယ်။ အပြင်သွားရင်တော့ သတိထားပြီးသွားရတာပေါ့။ ဆိုင်ကယ် လုခံရမလား၊ ဓားထောက်ခံရမလားဆိုတာ စိုးရိမ်ပြီး ကြောက်နေရတယ်“ ဟု တာချီလိတ် ဒေသခံ အသက် ၄၀ အရွယ် အမျိုးသားတစ်ဦးက ပြောသည်။
တာချီလိတ်မြို့သည် ထိုင်း – မြန်မာ နယ်စပ်မြို့တစ်မြို့ဖြစ်ပြီး လောင်းကစားမျိုးစုံရှိခြင်း၊ KTV အများအပြားရှိခြင်း နှင့် မူးယစ်ဆေးဝါးပေါများရာ မြို့တစ်မြို့ဖြစ်သည်။
Leave a Comments