သျှမ်းပြည်တောင်ပိုင်း တောင်ကြီးမြို့နယ် နောင်ကားကျေးရွာတွင် ပအိုဝ်းအမျိုးသားအဖွဲ့ချုပ် (PNO) ဦးစီးပြီး ဒီဇင်ဘာ ၇ ရက်တွင် စတင်ကျင်းပမည့် ဘောလုံးပွဲကို တစ်အိမ်လျှင် ၅,၀၀၀ ကျပ်ပေးဆောင်ရကြောင်း စုံစမ်း သိရှိသည်။
ပအိုဝ်းအမျိုးသားအဖွဲ့ချုပ် PNO မှ ဦးဆောင်ပြီး လုပ်ဆောင်ပေးသည့် ဘောလုံးပွဲအတွက် ၎င်းတို့ ထိန်းချုပ်သည့် နေရာတွင် နေထိုင်သည့် ပြည်သူများ အားလုံး ကျပ်ငွေ ၅,၀၀၀ မဖြစ်မနေ ငွေပေးဆောင်ရသည်။
PNO ထိန်းချုပ်သည့် နယ်မြေများမှာ တောင်ကြီးမြို့နယ်မှ ပုံးအင်းဒေသ ၊ ဆီဆိုင်မြို့နယ်၊ ပင်လောင်းမြို့နယ်၊ ဟိုပုံးမြို့နယ်တို့ ဖြစ်သည်။
“သူတို့ ထိန်းချုပ်ရနယ်မြေထဲက အကုန်ကောက်တာပဲထင်တယ်။ ကျနော်တို့က ၅,၀၀၀ ပေးလိုက်ရတယ်။ မဖြစ်မနေ ပေးရမယ်တဲ့။ ဘောလုံးပွဲအတွက် သီးသန့်လာကောက်တာပဲ။ ဆယ်အိမ်မှူးက လာကောက်တာ” ဟု ဆီဆိုင်မြို့နယ် ဒေသခံတစ်ဦးက ပြောသည်။
ထိုအပြင် ပုံးအင်းဒေသခံ အမျိုးသားတစ်ဦးကလည်း “ ဟုတ်တယ်။ ကျနော်တို့ ရွာထဲထိလာကောက်တယ်။ ဘောလုံးပွဲဆိုပြီးတော့ပဲလာကောက်တာ” ဟု ဆိုင်လဲကျေးရွာ ဒေသခံတစ်ဦးက ပြောသည်။
ယခင်နှစ်တွေ ပြုလုပ်တုန်းကလည်း ငွေကောက်ယူခဲ့ပေမဲ့ စေတနာရှိသလောက် ထည့်လို့ရပြီး ယခုနှစ်တွင် ဈေးအကန့်သတ်ဖြင့် ထည့်ရကြောင်း သိရသည်။
လက်ရှိ ကိုဗစ် – ၁၉ ကာလ နှင့် နိုင်ငံရေး အခြေနေကြောင့် ပြည်သူများကလည်း အခွန်ဆောင်ရတာများသည့် အတွက်ကြောင့် ငွေကြေးအတွက် အခက်ခဲရှိလာကြောင်း သိရသည်။
“ အခွန်က တစ်ခုပဲ ဆောင်နေရတာ မဟုတ်ဘူးလေ။ မီတာခတွေကော၊ ရပ်ရွာကအတွက်တွေကော ဆောင်ရတယ်။ အခုက စီးပွားရေးတွေလည်း အဆင်မပြေတော့ ပေးရတာများလာတော့ ခက်ခဲတာပေါ့။ ပိုက်ဆံ ၅,၀၀၀ ဆိုလည်း အရမ်းမများပေမဲ့လည်း ထမင်းတစ်နပ်ရတယ်။ အရင်ကတော့ စေတနာရှိသလောက်ဆိုပြီး လာကောက်တာ။ အခုတော့ အကန့်သတ်နဲ့ လာကောက်တာ” ဟု ဆီဆိုင်မြို့နယ် နောင်ကျကျေးရွာ ဒေသခံ အမျိုးသမီးက ပြောသည်။
အဆိုပါ ငွေကောက်ယူမှုသည် ဘောလုံးကန်မည့် အသင်းမှ ဝတ်စုံချုပ်ရန်၊ ဘိုးဖိနပ်ဝယ်ရန် အတွက် ကျေးရွာအုပ်စုများမှ ပေါင်းပြီး ကောက်ယူကြောင်း ပအိုဝ်းအမျိုးသားအဖွဲ့ချုပ် ပြောရေးဆိုခွင့်ရှိသူ ဗိုလ်မှူးသန်းကြွယ်က သျှမ်းသံတော်ဆင့်ကို ပြောသည်။
“ ကျနော်တို့ တပ်ဖွဲ့အနေနဲ့ ကောက်တာမဟုတ်ဘူး။ ကျနော်တို့တပ်ဖွဲ့ ဦးဆောင်လုပ်ပေးတာ မတည်ငွေ သိန်း ၅၀၀ ပေးထားတယ်။ ဘောလုံးကန်မဲ့ အသင်းတွေအတွက် ကျေးရွာအုပ်ချုပ်ရေးမှူးတွေ၊ ဆယ်အိမ်မှူးတွေက ကောက်ပေးတာဖြစ်တယ်” ဟု ၎င်းက ပြောသည်။
နောင်ကားဘောလုံးပွဲကို ၁ လတိတိ ကျင်းပမှာဖြစ်ပြီး အကြီးတန်း ဘောလုံးကန်သည့်အသင်း ၁၉ သင်းရှိပြီး အငယ်တန်းကန်မည့်အသင်းက ၉၀ သင်းရှိကြောင်း သိရသည်။
