သျှမ်းပြည်အရှေ့ပိုင်း တာချီလိတ်မြို့ နှင့် ကျိုင်းတုံမြို့တို့တွင် တရားမဝင် လာရောက်နေထိုင်သော တရုတ် နှင့် ထိုင်း နိုင်ငံသားတို့ကို ဖမ်းဆီးရမိကြောင်း သတင်းသိရသည်။

ပြီးခဲ့သည့် ဒီဇင်ဘာလ ၃ ရက် နံနက်ပိုင်းတွင် ကျိုင်းတုံမြို့နယ်၊ ကတ်တောင်ကျေးရွာ၊ သင်္ချိုင်းကုန်း အနီး၌ ပြည်ဝင်ခွင့် အထောက်အထား လက်မှတ်မပါရှိသော တရုတ်နိုင်ငံသား ၇ ဦးကို ဖမ်းဆီးရမိခဲ့ကြောင်း တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ပူးပေါင်းတပ်ဖွဲ့တွေ နယ်မြေ ကင်းလှည့်ချိန် မသင်္ကာတဲ့ ကားတွေ့လို့ ဝင်စစ်ဆေးတော့ PAJERO(io) အဖြူရောင်ကားတစ်စီးနဲ့ အထောက်အထားမဲ့ တရုတ်လူမျိုး ၇ ဦး ဖမ်းမိတယ်၊ အခုတော့ ရဲစခန်းမှာ ချုပ်ထားပါပြီ” ဟု ကျိုင်းတုံမြို့မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် အဆိုပါ တရုတ်လူမျိုး ၇ ဦးကို မြန်မာနိုင်ငံ လူဝင်မှု ကြီးကြပ်ရေး အက်ဥပဒေပုဒ်မ ၁၃/၁နှင့်(ပ)၄၄၈/၂၀၂၂တို့ဖြင့် အမှုဖွင့် အရေးယူထားကြောင်း သတင်းသိရသည်။

အလားတူ ဒီဇင်ဘာလ ၃ ရက် ညနေပိုင်းတွင် တာချီလိတ်မြို့၊ ဆန်ဆိုင်း (ခ) ရပ်ကွက်တွင် တရားမဝင် ဝင်ရောက်နေထိုင်သော ထိုင်းနိုင်ငံသား ၃ ဦးကို သက်ဆိုင်ရာ တာဝန်ရှိသူများက ဖမ်းဆီးရမိကြောင်း သတင်းသိရသည်။

“မြရွှေရည် ဟိုတယ်ကို ဝင်စစ်ဆေးတဲ့အချိန်မှာ အထောက်အထားမဲ့တဲ့ ထိုင်းနိုင်ငံသား ၃ ဦးကို ဖမ်းမိတယ်” ဟု နီးစပ်သူ အသက် ၅၀ ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ထိုင်းနိုင်ငံသား ၃ ဦးသည် Mr.Nattapat Saha-ampan (နာတာဖစဟာအမ်ပန်း) ၄၀ နှစ်၊ Mr. Thiwanon Kulalao (ထီဂနွန်း တူလားလောင်) ၃၃ နှစ်၊ နှင့် Mr.Thibet Kawsawas (ထီဘတ်ခါဆဝပ်) ၂၉ နှစ် တို့ ဖြစ်ကြောင်း သတင်းသိရသည်။

ယခု ရက်ပိုင်းအတွင်းတွင် မြန်မာနိုင်ငံအတွင်းသို့ တရားမဝင် နည်းလမ်းဖြင့် ဝင်ရောက်လာသော နိုင်ငံခြားသားများ ဖမ်းဆီးရမှုများ မကြာခဏ ဖြစ်ပွားနေသည်။

ထိုတရားမဝင် လာရောက်သည့် တရုတ်နှင့် ထိုင်းလူမျိုးများသည် သျှမ်းပြည်အရှေ့ပိုင်းတွင် တရားမဝင် စီးပွားရေးလာရောက် လုပ်ကိုင်ကြသည့်သူများဖြစ်ပြီး၊ လက်ရှိ တာချီလိတ်တွင် Online ဂိမ်းများ၊ Online လောင်းကစားများ၊ မူးယစ်ဆေးဝါးဂိုဏ်းများ ခြေရှုပ်နေသည့် နေရာတခုဖြစ်ကြောင်း သိရသည်။

ထို့အပြင် ထိုင်းနိုင်ငံတွင်းသို့ တရားမဝင် ဝင်ရောက်လာသည့် မြန်မာနိုင်ငံသားများလည်း ထိုင်းအာဏာ ပိုင်များမှ ဖမ်းဆီးရမှု နေ့စဥ် နီးပါးရှိနေသည်။