သျှမ်းပြည်မြောက်ပိုင်း သီပေါမြို့နယ်မှ ကုန်းသာကျေးရွာအုပ်စု ဒေသခံပြည်သူများ တချို့သည် စိုးရိမ်ကြောက် လန့်စိတ်ဖြင့် နေရပ်ပြန်သွားကြောင်း သတင်း သိရသည်။
ယနေ့ နိုဝင်ဘာလ ၂၈ ရက်နေ့တွင် သီပေါမြို့ ဘိုးတော်အောင်မင်္ဂလာ ကျောင်းတိုက်သို့ ရောက်ရှိလာသော ကုန်းသာကျေးရွာအုပ်စုမှ ဒေသခံ ၄၀၀ ကျော်တို့သည် စိုးရိမ်ကြောက်လန့်စိတ်ဖြင့် နေရပ်ပြန်သွားကြောင်း စစ်ရှောင်ကူညီပေးနေသူများက သျှမ်းသံတော်ဆင့်ကို ပြောသည်။
“စစ်ကောင်စီ တပ်သားတွေကတော့ ရွာက စာသင်ကျောင်းထဲမှာ စခန်းချ နေရာယူထားနေတုန်းပဲ၊ ဒါပေမယ့် စစ်ရှောင်တွေကလည်း စားဝတ်နေရေးတွေ ခက်ခဲနေကြတာ ဆိုတော့ ပြန်သွားကြတာ၊ သူတို့ဆီ စိုးရိမ်စိတ် ကြောက်လန့်စိတ်တော့ ရှိနေမှာတော့ အမှန်ပဲ” ဟု သီပေါမြို့မှ စစ်ရှောင်ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ရှောင်များသည် ပြီးခဲ့သည့် နိုဝင်ဘာလ ၂၅ ရက်တွင် ဖြစ်ပွားခဲ့သည့် အာဏာသိမ်း စစ်ကောင်စီ နှင့် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် SSPP/SSA တို့ တိုက်ပွဲကြောင့် ထွက်ပြေး တိမ်းရှောင်လာကြ သူများဖြစ်ကြသည်။
လက်ရှိတွင် ကုန်းသာကျေးရွာရှိ စာသင်ကျောင်း၌ စစ်ကောင်စီတပ်သားတို့မှ နေရာယူ စခန်းချထားလျက်ရှိပြီး တိုက်ပွဲဖြစ်ပွားစဉ်အတွင်း ဒေသခံ နေအိမ် ၂၀ အိမ်ခန့်က ကျည်ထိမှန် ပျက်စီးနေကြောင်းလည်း သတင်းသိရ သည်။
“သေနတ်ကျည်တွေ ထိမှန်ထားတဲ့ အိမ်တွေကို ပြန်ပြင်ဖို့အတွက် ပြန်သွားတဲ့သူ ရှိသလို စာသင်ကျောင်းနဲ့ အိမ် နီးတဲ့ တချို့ကလည်း အိမ်မပြန်ရဲကြသေးဘူး၊ ဗမာစစ်သားတွေကို ကြောက်လို့လေ၊ ကျည်ထိလို့ ပျက်စီးတဲ့ အိမ်တွေကို ပြန်လည်ပြုပြင်ဖို့အတွက်လည်း အကူအညီတွေ လိုအပ်ပါတယ်” ဟု စစ်ရှောင်ကူညီသူက ဆက် ပြောသည်။
ပြီးခဲ့သည့် နိုဝင်ဘာလ ၂၅ ရက် နံနက်ပိုင်း ၅ နာရီတွင် ဖြစ်ပွားခဲ့သည့် စစ်ကောင်စီ နှင့် SSPP/SSA တို့၏ ထိတွေ့တိုက်ပွဲသည် ငြိမ်သက်သွားသဖြင့် စစ်ရှောင်တချို့က နေရပ်ပြန်သွားရခြင်းဖြစ်ကြောင်း သိရသည်။
စစ်ကောင်စီ စခန်းချ နေထိုင်သော စာသင်ကျောင်းနှင့် အိမ် နီးသည့် နေရပ်မပြန်နိုင်သေးသည့် ကုန်းသာကျေးရွာ အုပ်စုမှ ဒေသခံများသည် အိမ်ထောင်စု ၁၀ စုကျော်ခန့် ရှိနေပြီး ဘိုးတော် အောင်မင်္ဂလာ ကျောင်းတိုက်တွင်ပင် ဆက်လက် နေထိုင်ရသေးကြောင်းလည်း သိရသည်။
ထိတွေ့တိုက်ပွဲများ ငြိမ်သက်သွားသော်လည်း စစ်ကောင်စီနှင့် SSPP / SSA တို့သည် နှစ်ဖက် တပ်ဖွဲ့ စစ်ရေးတင်းမာနေလျက်ရှိကြောင်းလည်း သတင်း သိရသည်။
