သျှမ်းပြည် မြောက်ပိုင်း တန့်ယန်းမြို့နယ် လုံမုံကျေးရွာအုပ်စု နမ့်ပါတက်ကျေးရွာ တွင် ယမန်နေ့ (နိုဝင်ဘာလ ၂၁) ရက် မွန်းလွဲပိုင်းအချိန်၌ တောင်သူများရိတ်သိမ်းထားသည့် စပါးပုံမီးရှို့ဖျက်ဆီးခံရကြောင်း သတင်းသိရသည်။
နမ့်ပါတက် ကျေးရွာနေ လုံးစိုင်းပေါင်း နှင့် ပါနန်းယဥ် တို့ ပိုင်ဆိုင်သည့် လယ်မှ ရိတ်သိမ်းထားသည့် စပါးပုံ နှစ်ပုံ အနက် စပါး ၈ တင်း ခန့်ရှိသည့် စပါးပုံအကြီးက မီးရှို့ဖျက်ဆီးခံရကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“စပါးက ရိတ်ထားပြီး ပုံထားတာ တစ်ပတ်တောင် မပြည့်သေးဘူး၊ မနေ့က မွန်းလွဲပိုင်းအချိန်လောက်က မီးရှို့ဖျက်စီးခံရတာ၊ အဲ့အနီးမှာ လာဆော့တဲ့ ကလေးတွေက မီးရှို့သွားတယ်လို့ပဲ ပြောကြပေမဲ့ ဘယ်က ကလေးတွေ မှန်းမသိရဘူး၊ အခုလိုဖြစ်ရတော့ ပိုင်ရှင်တွေလည်း အရမ်းကို စိတ်ထိခိုက်နေကြတယ်။”ဟု အထက်ပါ ဒေသခံအမျိုးသားက သျှမ်းသံတော်ဆင့်ကို ပြောသည်။
စပါးဆုံးရှုံးမှုတန်ဖိုးသည် ကာလတန်ဖိုးအရ ငွေကျပ် ၁၀ သိန်းထက်မနည်း ဆုံးရှုံးရပြီး တစ်နှစ်လုံး ပင်ပန်းထား သမျှနှင့် အရင်းအနှီးများကြောင့် ပိုင်ရှင် မိသားစုတို့က စိတ်ထိခိုက် ကြေကွဲနေကြောင်း သိရသည်။
လက်ရှိကာလအချိန်သည် ပွင့်လင်းခြောက်သွေ့ရာသီ ဖြစ်လာသည့်အတွက် မီးဘေးအန္တရာယ်များကို အထူး ဂရုစိုက်ကြရန် လိုအပ်ပါသည်။
