သျှမ်းပြည်တောင်ပိုင်း၊ ဆီဆိုင်မြို့ မြို့မဈေးရှိ သင်္ကန်းအရောင်းဆိုင် မီးရှို့ခံခဲ့ရပြီး တရားခံများကို ရဲဌာနမှ လိုက်လံစုံစမ်းနေကြောင်း သတင်းရရှိသည်။
ဖြစ်စဉ်မှာ ယမန်နေ့ ဒီဇင်ဘာလ ၁၆ ရက်နေ့ ည ၈ နာရီအချိန်တွင် ဆီဆိုင်မြို့မဈေးမှ သင်္ကန်းအရောင်းဆိုင်ကို အမည်မသိ လူ (၄)ဦးမှ ဓာတ်ဆီဖြင့် ပက်ကာ မီးရှို့သွားခဲ့သောကြောင့် မီးလောင်မှုဖြစ်ပွားခဲ့ကြောင်း မျက်မြင်တွေ့ရှိသူတစ်ဦးက သျှမ်းသံတော်ဆင့်ကိုပြောသည်။
“သူများတွေ ဈေးဆိုင်သိမ်းပြီး ပြန်တဲ့အချိန်မှာ လူ (၄)ဦးက မီးရှို့သွားတာလို့သိရတယ်။ ဈေးစောင့်က ရှိပေမဲ့ နဲနဲမူးနေတာဆိုတော့ ဘယ်သူဘယ်ဝါမှန်း မသိလိုက်ဘူးတဲ့။ ရှိသမျှလူ အကုန်လုံး ဝိုင်းငြိမ်းပေးခဲ့ရတာ။ တခြားဆိုင်ခန်းတွေ မီးမကူးလို့ တော်သေးတယ်။”ဟု ၎င်းက ပြောသည်။
အဆိုပါ မီးရှို့သွားသည့် လူ(၄)ဦးကို ရဲဌာနမှ လိုက်လံစုံစမ်းနေပြီး ယနေ့ (ဒီဇင်ဘာ ၁၇)ရက် အထိ မဖမ်းမိသေးကြောင်း မီးဟပ်သော အခြားဈေးဆိုင်ခန်းများကိုလည်းသက်ဆိုင်ရာက ပစ္စည်းများကိုလည်း နေရာရွှေ့ခွင့်မပေးသေးကြောင်း ၎င်းက ဆက်ပြောသည်။
ထိုသို့ ဈေးဆိုင်ခန်း မီးရှို့ခံရခြင်းသည် အချင်းချင်းကြား မနာလိုမှု၊ ရန်ငြိုးရန်စ ရှိနိုင်ကြောင်း မြို့ခံများက ပြောသည်။
“မီးရှို့တဲ့သူလည်း ဖမ်းမမိသေးဘူးဆိုတော့ ဈေးရောင်းတဲ့ ပစ္စည်းတွေ ဒီတိုင်း ထားခဲ့ရမှာ စိမ်မချဘူး။ မီးရှို့ခံရမှာ အခိုးခံရမှာ စိတ်ပူတာ။”ဟု ဈေးသည် အမျိုးသမီးတစ်ဦးက ပြောသည်။
ဆောင်းရာသီ ခြောက်သွေ့ကာလ ဖြစ်လာသောကြောင့် မီးဘေးအန္တရာယ်များကို အထူးသတိပြုရန် လိုအပ်ပြီး ဂက်စ်အိုးများကိုလည်း သတိရှိစွာ အသုံးပြုသင့်ကြောင်း အဆိုပါ ဈေးသည် အမျိုးသမီးက ပြောသည်။
ယခုကဲ့သို့ ဆီဆိုင်မြို့တွင် ဈေးဆိုင်ခန်းများ မီးရှို့ခံရသည့် ဖြစ်စဉ်မျိုး မရှိခဲ့ဖူးသော်လည်း ပြီးခဲ့သည့် ၂၀၂၄ ခုနှစ် ဖေဖော်ဝါရီလက စစ်ကော်မရှင်၏ လက်နက်ကြီးကြောင့် ဆီဆိုင်မြို့မဈေး မီးလောင်ပျက်စီးသွားခဲ့၍ ပြီးခဲ့သည့် ၂၀၂၅ ခုနှစ် မတ်လ (၃၀)ရက်မှ ဆီဆိုင်မြို့မဈေးကို ပြန်လည် ဖွင့်လှစ်ခဲ့သည်။
Leave a Comments