သျှမ်းပြည်တောင်ပိုင်း၊ ဆီဆိုင်မြို့တွင် စစ်ကောင်စီတပ်သားများသည် မြို့ပြင်မှနေရ၍ နောင်ထောင်ကျေးရွာဘက်သို့ လက်နက်ကြီးဖြင့် နေစဉ် ရမ်းသမ်းပစ်ခတ်နေကြောင်း သတင်းရရှိသည်။

ပြီးခဲ့သည့် ဩဂုတ်လ ၆ ရက်မှ စပြီး ယနေ့ ( ဩဂုတ်လ ၈ )ရက်အထိ နေ့စဉ် စစ်ကောင်စီတပ်သားများသည် ဆီဆိုင်မြို့ပြင်မှ နောင်ထောင်ကျေးရွာဘက်သို့ လက်နက်ကြီးဖြင့် ပစ်ခတ်နေကြေောင်း၊ စစ်ဘေးရှောင်ရန် ကျန်ရှိနေသေးသည့် နောင်ထောင်ကျေးရွာဒေသခံများ ထွက်ပြေးတိမ်းရှောင်နေရကြောင်း ဒေသခံများထံ သိရသည်။

လက်ရှိ စစ်ကောင်စီဘက်မှ တဖက်သတ် လက်နက်ကြီးဖြင့် ရမ်းသမ်းပစ်ခတ်မှုကြောင့် ဆီဆိုင်ဒေသခံများသည် တကြော့ပြန်တိုက်ပွဲများဖြစ်သွားမည်ကို စိုးရိမ်နေကြောင်း သိရသည်။

“ မြို့ပြင်ကနေ လက်နက်ကြီးနဲ့ ရမ်းသမ်းထုနေတော့ နောင်ထောင်ဘက်မှာ မရှောင်ရသေးတဲ့ခြံသမားတွေလည်း အခုဆိုရင် ထော်လဂျီတွေနဲ့ ရှောင်နေပြီ။ မနေ့က လက်နက်ကြီးလေးလုံးလောက်ပစ်တယ်။ နောက်ထပ် တိုက်ပွဲဖြစ်မှာတော့ ကြောက်တယ်” ဟု ဆီဆိုင်မြို့က အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

ထို့အပြင် နောင်ထောင်ကျေးရွာအတွင်းရှိ ပအိုဝ်းအမျိုးသားလွတ်မြောက်ရေးတပ်မတော် (PNLA) တပ်စခန်းကို စစ်ကောင်စီတပ်နှင့် ပအိုဝ်းပြည်သူ့စစ် PNOတို့က ထိုးစစ်ဆင်နေပြီး ထိတွေ့တိုက်ပွဲဖြစ်နေကြောင်း ၎င်းက ဆက်ပြောသည်။

စစ်ကောင်စီဘက်မှ ရမ်းသမ်းပစ်ခတ်နေသည့် လက်နက်ကြီးများသည် နောင်ထောင် ကျေးရွာများ၏ စိုက်ပျိုးရေးခြံထဲကျရောက်သဖြင့် ခြံလုပ်သားများလည်း စစ်ဘေးရှောင်နေရသည်။

ပြီးခဲ့သည့် ဇွန်လ (၆)ရက်နေ့တွင် ဆီဆိုင်မြို့နယ် နောင်ကျောကျေးရွာအုပ်စုထဲမှ ကောင်ထိုကျေးရွာ၊ စလောင်းထောင်ကျေးရွာ၊ နောင်ဘိုကျေးရွာနှင့် နောင်ထော်ကျေးရွာအုပ်စုထဲမှ တပူထိုးကျေးရွာ၊ လွယ်ငွန်းကျေးရွာ၊ ပင်စက်ကျေးရွာ၊ တောင်ရှေ့ကျေးရွာ မှ ဒေသခံ စုစုပေါင်း (၆၀၀၀)ကျော်ကို PNO က အကြောင်းပြချက်မရှိရွှေ့ပြောင်းခိုင်းခဲ့သည်။

ထိုအချိန်တွင် လယ်ယာစိုက်ပျိုးရန် အတွက် နောင်ထောင်ကျေးရွာအုပ်စုထဲတွင် ကျန်ရှိခဲ့သည့်သူများရှိသည်။

“ PNO ထွက်ခိုင်းတုန်းက စိုက်ခင်းတွေ ပေါင်းမရှင်းရသေးလို့ မထွက်လိုက်ဘူး။ ခုတော့ သူတို့က လက်နက်ကြီးနဲ့ ရမ်းပစ်တော့ စိုက်ခင်းနား တောင်ထဲတွေ လာလာကျတော့ မလုံခြုံတော့ဘူး။ စိုက်ထားတဲ့ အပင်တွေက ပြုစုဖို့ မလိုတော့ဘူးကော ။ဒါကြောင့် ရွာက ထွက်လာလိုက်တာ။”ဟု ခြံလုပ်သား အမျိုးသမီးတစ်ဦးက ပြောသည်။

အဆိုပါ နောင်ထောဝ်ကျေးရွာအုပ်စုအတွင်း ပြောင်း၊နှင့် စပါးအများဆုံးစိုက်ပျိုးကာ စိုက်ပျိုးရေး လုပ်ကိုင်ကြသည်။

လက်ရှိ ထပ်မံစစ်ဘေးရှောင်သည့် နောင်ထောင် ကျေးရွာဒေသခံများသည် ဆီဆိုင်မြို့ပေါ်နှင့် ဘုရားဖြူကျေးရွာ ရှိ ဓမ္မာရုံတို့တွင် ခိုလှုံနေရပြီး၊ စစ်ရှောင်နေထိုင်သူ များပြားလာသောကြောင့် နေရာထိုင်ခင်းနှင့် အစားသောက်များလိုအပ်နေကြောင်း စစ်ဘေးရှောင်ကူညီနေသူများက ပြောသည်။

နောင်ထောင်ကျေးရွာသည် ဆီဆိုင်မြို့နှင့်တစ်နာရီကျော်ကွာဝေးပြီး၊ ဆီဆိုင်မြို့သို့သွားရာတွင်လည်း PNO၏ ဂိတ် လေးခုကို ဖြတ်သန်းရသည်။