Thursday, December 1, 2022

မူဆယ်မြို့ လောင်းကစားများ လူမြင်ကွင်းတွင် ပေါ်တင်ဖွင့်လှစ်

Must read

သျှမ်းပြည် မြောက်ပိုင်း မူဆယ်မြို့ လမ်းဘေးများတွင် လောင်းကစားဝိုင်းများကို ပေါ်တင် ဖွင့်လှစ်ဆော့ ကစားနေကြောင်း သတင်းသိရသည်။

မူဆယ်မြို့

မူဆယ်မြို့ပေါ် ရပ်ကွက်များဖြစ်ကြသည့် စွမ်စော်ရပ်ကွက်၊ ကောင်းမူးတုံရပ်ကွက်၊ ဆင်ဖြူဈေး၊ ကောင်းမူးလွယ် နှင့် AYA ဘဏ်တို့ ဘက်တွင် လောင်းကစားဝိုင်းများကို လမ်းဘေးတွင် ပေါ်တင်စွာ ဖွင့်လှစ်နေကြကြောင်း ဒေသခံ များက သျှမ်းသံတော်ဆင့်ကို ပြောသည်။

ထိုလောင်းကစားဝိုင်းများကို ပေါ်တင်ဖွင့်လှစ် နေမှုကြောင့် အပြင်သွားလာပါက လုံခြုံရေးမရှိသည့်အပြင် လက်ရှိအချိန်ထိ လောင်းကစားဝိုင်းများကို အရေးယူခြင်း မရှိသေးကြောင်း မူဆယ်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“လောင်းကစားဝိုင်းတွေက နေရာတိုင်းမှာရှိနေတော့ ညနေရောက်ပြီဆိုတာနဲ့ အပြင်မထွက်ရဲကြတော့ဘူး၊ ဥပဒေ အရဆိုလည်း ဘယ်သူကို အားကိုးရမလဲ မသိဘူး။ လမ်းဘေးမှာ ရောင်စုံမီးနဲ့ ဖွင့်နေကြတဲ့ လောင်းကစားဝိုင်းတွေ ကို ဘယ်အဖွဲ့ မှလည်း နှိမ်နင်းအရေးယူပေးတာ မရှိဘူး” ဟု မူဆယ်မြို့နယ်မှ အမည်မဖော်လိုသူ အမျိုးသား တစ်ဦး က သျှမ်းသံတော်ဆင့်ကို ပြောသည်။

ယင်းကဲ့သို့ လောင်းကစားဝိုင်းများ ပေါများသည့် နေရာများတွင် အပြင်ထွက်သွားလာပါက သူခိုးများ ဓါးထောက် လုယက်မှုများ လည်း ကြုံတွေ့ရလေ့ရှိသည့်အတွက် လုံခြုံရေး မရှိကြောင်း ဒေသခံများက ဆက်ပြောသည်။

အဆိုပါ လောင်းကစားဝိုင်းများသည် စစ်ကောင်စီနှင့် ပြည်သူ့စစ်တပ်ဖွဲ့တို့ ပူးပေါင်းပြီး လွတ်လပ်စွာ ဖွင့်ခွင့်ပေး ထားခြင်း ဖြစ်ကြောင်း အသက် ၄၅နှစ်အရွယ်ရှိ အမျိုးသားတစ်ဦးကလည်း သျှမ်းသံတော်ဆင့်ကိုပြောသည်။

“လောင်းကစားဝိုင်းတိုင်းမှာ တရုတ်ပိုက်ဆံရှိတဲ့သူတွေက ဒိုင်ကိုင်ထားကြတာ၊ ပြီးတော့ တရုတ်လူမျိုးတွေ ဖြစ်ကြတဲ့ ပြည်သူ့စစ်တွေကလည်း ရှိနေကြတယ်၊ ကိုဗစ် အခြေနေကြောင့် နဲ့ စားဝတ်နေရေး ခက်ခဲပါတယ်ဆို၊ အခုက လောင်းကစားဝိုင်းကြောင့် ပိုပြီး ခက်ခဲလာရတယ်” ဟု ၎င်းက ပြောသည်။

မူဆယ်မြို့နယ်သည် စစ်ကောင်စီ တပ်ဖွဲ့အပြင် ၎င်းတို့၏ လက်အောက်ခံ တရုတ်လူမျိုးများ ပါဝင်နေသည့် ပြည်သူ့စစ်တပ်ဖွဲ့၊ တိုင်းရင်းသား လက်နက်ကိုင်တပ်ဖွဲ့တို့မှ သွားလာလှုပ်ရှားနေသည့်နေရာဖြစ်သည်။

စစ်ကောင်စီမှ အာဏာသိမ်းပြီးနောက်ပိုင်းတွင် မူဆယ်မြို့နယ်အတွင်း၌ မူးယစ်ဆေးဝါး နှင့်လောင်းကစား ဝိုင်း များပြားလာပြီးစက်တင်ဘာ လတွင် ဆယ်ကျော်သက်ကလေး တစ်ဦး ၊ အောက်တိုဘာအတွင်း ကလေး ၂ဦး ပြန်ပေးဆွဲခံရကာ သက်ဆိုင်ရာက ကူညီဖြေရှင်းပေးခြင်းမရှိခဲ့ပေ ။

Leave a Comments

- Advertisement -spot_img

Latest article