သျှမ်းပြည်မြောက်ပိုင်း ကျောက်မဲမြို့နယ် နမ့်ဟူတောင်းကျေးရွာအုပ်စု ပန်မောင်ကျေးရွာ နေ အသက် ၆၀ကျော် အရွယ်ရှိ လုံးပညာ ကို စစ်ကောင်စီက SSPP/SSA အတွက် အခွန်ကောက်ဟုဆိုကာ ဖမ်းဆီးထားပြီး ရိုက်နှက် စစ်ဆေးမှုပြုလုပ်ကြောင်း စုံစမ်းသိရှိရသည်။
လုံးပညာကို SSPP ၏ ဆက်ကြေးကောက်ပေးသူဟုဆိုပြီး စစ်ကောင်စီမှ စက်တင်ဘာ ၂၈ရက် နံနက်ပိုင်းတွင် ဖမ်းဆီးသွားခဲ့ပြီး ကျောက်မဲမြို့နယ် ရဲစခန်းတွင် ချုပ်နှောင်းထားသည်။
ထိုဖမ်းဆီးပြီးနောက် စစ်ကောင်စီဘက်မှ ရိုက်နှက်စစ်ဆေးမှုကိုလည်းခံရကြောင်း နိုဝင်ဘာ(၁၉)ရက်တွင် လုံးပညာနှင့် ၎င်းမိသားစုဝင်များဖုန်းဖြင့် စကားပြောခဲ့ချိန်တွင် ပြောပြခဲ့သည်။
“ ၁၉ ရက်နေ့က သူနဲ့ ပထမဆုံးစကားပြောရတာ။ သူကအခု ကျောက်မဲရဲစခန်းထဲမှာ ရေဖို၊ မီးဖိုအတွက်ဆိုပြီး ငွေ ၅ သောင်းတောင်းခဲ့တယ်။ အဲတာပေးလိုက်တယ်။ လူတော့မပေးတွေ့ဘူး။ ဖုန်းပဲပြောရတာ။ ပြီးတော့ သူရိုက်နှိက် စစ်ဆေးခံထားရတယ်လို့ ပြောတယ်” ဟု လုံးပညာ၏ မိသားစုဝင်တစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်ထိ လုံးပညာကို ကျောက်မဲမြို့ ရဲစခန်းတွင် ချုပ်နှောင်ထားပြီး မည်သည့်အမှုဖွင့် စွဲထားသည် ကိုမိသားစုဝင်များက မသိရှိရသေးကြောင်းပေ။
“ သူတို့ပြောတာ ရုံးထုတ်မှ လူတွေ့ခွင့်ပေးမယ်တဲ့။ သူကို နေ့တိုင်းသွားတောင်းတွေ့လည်း သူတို့က မပေးတွေ့ဘူး။ ဘာအမှုနဲ့ တရားစွဲထားလဲ မသိရသေးဘူး။ အခုထိ ကျောက်မဲမြို့ ရဲစခန်းထဲမှာပဲ” ဟု မိသားစုဝင်က ပြောသည်။
လုံပညာသည် ရှမ်းပြည်တိုးတက်ရေးပါတီ ၊ ရှမ်းပြည်တပ်မတော် (SSPP/SSA) အတွက် အခွန်ကောက်ပေးသည် ဟုဆိုပြီး ဒေသခံအချို့ စစ်ကောင်စီဘက်ကိုတိုင်းကြားသည့်အတွက် ၎င်းကို လာရောက်ဖမ်းဆီးသွားသည်ဟု သိရသည်။
လက်ရှိအချိန်ထိ လုံးပညာဖမ်းဆီးခံထားရသည့်အပေါ် SSPP/SSA ဘက်မှ တစ်စုံတစ်ရာ ကူညီပေးခြင်းမရှိသေးကြောင်း သိရသည်။
“ ကျမသူတို့ကို SSPP က လူကို တစ်ခါဖုန်းထပ်ဆက်တယ်။ သူတို့ခရီးသွားနေလို့ဆိုပြီးတော့ ဘာမှ ပြန်လုပ်မပေးဘူး။ အခုထိလည်း ဘာမှ ပြန်မပြောလာသေးဘူး” ဟု ၎င်းမိသားစုဝင်က ဆိုသည်။
အလားတူ သျှမ်းသံတော်ဆင့်မှလည်း SSPP/SSA ပြောရေးဆိုခွင့်ရှိသူ ဗိုလ်မှူးကြီး စိုင်းဆု နှင့် ဗိုလ်မှူး စိုင်းဖုန်းဟန်ကို အကြိမ်ကြိမ်ဆက်သွယ်ခဲ့သော်လည်း စက်ပိတ်ထားသည်။
SSPP/SSA သည် အာဏာသိမ်းစစ်ကောင်စီ၏ ငြိမ်းချမ်းရေးဖိတ်ခေါ်ချက်အရ သြဂုတ် ၃ရက်တွင် ပထမအကြိမ်နှင့် စက်တင်ဘာ ၂၈ရက်တွင် ဒုတိယအကြိမ်အနေဖြင့် သွားရောက်တွေ့ဆုံခဲ့သည့် အဖွဲ့တစ်ဖွဲ့လည်း ဖြစ်သည်။
