သျှမ်းပြည်မြောက်ပိုင်း မူဆယ်မြို့တွင်း ပြည်သူ့ကာကွယ်ရေးတပ်ဖွဲ့ PSDF သည် ပြည်သူ့စစ်ပိုင်သည့် မိုတယ်ကို တိုက်ခိုက်ရာ အရပ်သား ၁၀ဦးထက်မနည်း ထိခိုက်ဒဏ်ရာရရှိခဲ့သဖြင့် ပြည်သူများ အိမ်ပြင်ထွက်ရန် စိုးရိမ်ထိတ်လန့်နေကြကြောင်း စုံစမ်းသိရသည်။

ပြီးခဲ့သည့် နိုဝင်ဘာ ၁၄ ရက်နေ့ မနက် ၁၁ နာရီဝန်းကျင်တွင် မူဆယ်မြို့ ကောင်းမူးတုံရပ်ကွက် မင်္ဂလာမူဆယ် လမ်းမကြီးဘေးရှိ Top One မိုတယ်ရှေ့တွင် ဗုံးပေါက်ကွဲမှုဖြစ်ပွားခဲ့ပြီး ပြည်သူ ၁၁ ဦးထိခိုက်ဒဏ်ရာရရှိခဲ့ရာ ထိုထဲတွင် အသက် (၅)နှစ်အရွယ် ကလေး ၁ဦး၊ အမျိုးသမီး (၃)ဦး ပါဝင်ကြောင်း ဒေသခံများ ပြောပြချက်အရသိရသည်။

ထိုဗုံးပေါက်ကွဲမှုဖြစ်သည့်အချိန်သည် ပြည်သူများအပြင်ထွက် အလုပ်သွားလုပ်ချိန်၊ လမ်းသွားလမ်းလာချိန်ဖြစ်သဖြင့် အရပ်သားပြည်သူဒဏ်ရာရရှိခဲ့သူများပြားရခြင်းဖြစ်သည်။

ထို့ကြောင့် လက်ရှိမှာ ပြည်သူများ အိမ်ပြင်ထွက် အလုပ်လုပ်ရန် စိုးရိမ်ပူပန်မှုများစွာ ဖြစ်နေကြသည်။

“ အခုဆိုရင် ကောင်းစွာသွားလာလို့မရတော့ဘူးပေါ့။ ပြီးတော့ လမ်းဘေးတွေမှာ ၊ ပြည်သူတွေသွားလာတဲ့နေရာမှာ ဖြစ်တာဆိုတော့ ပိုပြီးကြောက်ကြတယ်။ လုံခြုံရေးလည်း မရှိတော့ဘူး။ ဘယ်သွားသွား စိုးရိမ်နေရတာပေါ့။ ဘယ်နားဗုံးပေါက်ကွဲမလဲဆိုတာတောင် မသိဘူးလေ” ဟု ဒေသတွင်း လှုပ်ရှားသည့် ပရဟိတအဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။

လက်နက်ကိုင်တပ်ဖွဲ့များအနေဖြင် ပြည်သူများအလုပ်လုပ်သည့်အချိန်တွင် နှင့် သွားလာလှုပ်ရှားသည့်နေရာတွင် သတိထားပြီး ဖောက်ခွဲမှု တိုက်ခိုက်မှု ပြုလုပ်စေလိုကြောင်းလည်း မူဆယ်ဒေသခံများကဆိုသည်။

“ လူတွေ အလုပ်လုပ်ချိန်တွေ သတိထားဖို့လိုပါတယ်။ ဟိုနေ့က ဖြစ်တာကလည်း ပြည်သူတွေသွားလာတဲ့နေရာဖြစ်တယ်။ အဲဗုံးပေါက်ခွဲတဲ့သူလည်း တာဝန်ယူမှုရှိစေချင်တယ်။ ပြီးတော့ လုပ်ရင်လည်း ပြည်သူတွေသွားလာတဲ့နေရာ၊ ရှာဖွေ စားသောက်တဲ့ချိန် မလုပ်စေချင်ဘူး” ဟု ဒေသခံ အသက် ၄၀ ကျော် အမျိုးသားတစ်ဦးက ပြောသည်။

စစ်အာဏာသိမ်းပြီးနောက် နယ်စပ်ဒေသ မူဆယ်မြို့သည် လုပ်ကိုင်စားသောက်မှုခက်ခဲလာပြီး ရုန်းကန်ရှာဖွေစားသောက် နေရသဖြင့် ပြည်သူများကို ငဲ့ညှာသည့်အနေဖြင့် လက်နက်ကိုင်အဖွဲ့များ တိုက်ခိုက်မှုကိစ္စကို သတိထားစေလိုကြောင်းလည်း ၎င်းက ဆိုသည်။

“ ဗုံးပေါက်ကွဲမှုတွေ မဖြစ်စေချင်ဘူးပေါ့။ အခုလိုဖြစ်တော့ မိသားစုဝင်တွေကလည်း စိုးရိမ်နေကြရတယ်။ သောကတွေရတယ်။ ထိခိုက်သူတွေကလည်း ငွေကုန်တယ်။ အချိန်ကုန်တယ်။ ပြီးတော့ အခုကလည်း ရှာစား ရတာခက်တဲ့ချိန်ဖြစ်တယ်။ ဖြစ်နိုင်တော့ မဖြစ်စေချင်ဘူး။ ပြည်သူတွေမထိခိုက်စေချင်ဘူး” ဟု Top One KTV ဗုံးပေါက်ကွဲသည့်နေရာအနီးတွင်နေထိုင်သူ အမျိုးသားက ဆိုသည်။

အဆိုပါ မူဆယ်မြို့ Top One KTV ဗုံးပေါက်ကွဲမှုသည် PSDF လက်ချက်ဖြစ်ပြီး ပြည်သူများ ထိခိုက်ဒဏ်ရာ ရရှိခဲ့သော ကြောင်း ဝမ်းနည်းမိပါကြောင်း ထုတ်ပြန်ခဲ့သည်။

ထိုအပြင် ပြည်သူများအနေဖြင့်လည်း စစ်ကောင်စီ နှင့် ပြည်သူ့စစ်များ၏ ကင်းပုံးနေရာ၊ စခန်းများ ၊ စီးပွားရေးနေရာများတွင် ရှောင်ရှားပြီး သွားလာကြပါရန် ပြည်သူ့လုံခြုံရေး နှင့် ကာကွယ်ရေးအဖွဲ့ PSDF ထုတ်ပြန်ချက်တွင်ရေးသားထားသည်။

PSDF တို့ ဗုံးပေါက်ခွဲမှုဆက်ပြုလုပ်နေသည့်အပေါ်တွင် ပြည်သူများအပေါ်ဆက်လက်ထိခိုက်လာပါက ပြည်သူများ အမုန်းပွားလာနိုင်ကြောင်း ဒေသခံများက ပြောသည်။

“ သူတို့တော်လှန်ရေးလုပ်တာက နားလည်ပါတယ်။ လုပ်ရင်လည်း သူတို့ကို ထိခိုက်စေတဲ့ နေရာကိုပဲ လုပ်စေချင်တယ်။ ပြည်သူတွေကို မထိခိုက်စေချင်ဘူး။ နောက်ဆက်ပြီး ပြည်သူတွေကိုထိခိုက်လာရင်တော့ ပြည်သူတွေလည်း အမြင်မကြည်ပဲ မုန်းလာနိုင်တယ်လေ” ဟု ၎င်းက ပြောသည်။

မူဆယ်မြို့သည် မြန်မာ- တရုတ်နယ်စပ်မြို့ဖြစ်ပြီး လက်နက်ကိုင်အဖွဲ့အစည်း အများပြားနေထိုင်သည့် ဒေသ တစ်ခုဖြစ်သည်။

လက်ရှိတွင်လည်း မူဆယ်မြို့နယ် လောင်းကစားဝိုင်းတွေများပြားလာပြီး လက်နက်ကိုင်ဆောင်သူများကလည်း များပြား လာကြောင်း လောင်းကစားဝိုင်းသွားလာခဲ့သူက ပြောသည်။

“ လောင်းကစားဝိုင်းတွေကလည်းအရမ်းများလာတယ်။ပြီးတော့ လက်နက်တွေ ကိုင်ဆောင်နေတာက များလာတယ်။ ပြည်သူစစ်အဖွဲ့ထဲမဟုတ်ရင်တောင် ပြည်သူ့စစ်နဲ့ ဆက်သွယ်နေရင်လည်း လက်နက်တွေ ကိုင်ဆောင်လို့ရနေပြီး။ လောင်းကစားဝိုင်းဝင်တဲ့သူတွေက ပစ္စတိုတွေရှိကြတယ်” ဟု လောင်းကစားဝိုင်းတွင် သွားခဲ့သူက ပြောသည်။

စစ်တပ်က အာဏာသိမ်းပြီးနောက်ပိုင်းတွင် မူဆယ်မြို့တွင် ဒုစရိုက်တွေ တစ်နေ့ထက်တစ်နေ့ ပိုများပြားလာပြီး လုံခြုံရေးမရှိတဲ့ မြို့တစ်မြို့ဖြစ်လာကြောင်း ဒေသခံ များပြောပြချက်အရသိရသည်။