သျှမ်းပြည်တောင်ပိုင်း ဖယ်ခုံမြို့နယ် အင်းအရှေ့ဘက်ကမ်းတွင် စစ်ကောင်စီဘက်မှ လက်နက်ကြီး ခြိမ်းခြောက်ပစ်ခတ်မှုကြောင့် ၇ နှစ် ကလေး တစ်ဦး နှင့် အသက် ၃၀အရွယ် အမျိုးသားတစ်ဦး ထိမှန်ခဲ့ကြောင်း သတင်းရရှိသည်။

ယမန်နေ့ (နိုဝင်ဘာ ၁၄)ရက် ည ၁၀ နာရီဝန်းကျင်တွင် စစ်ကောင်စီဘက်မှ ဖယ်ခုံမြို့နယ် ဖလိုင်တောင်ခြေ ကျေးရွာမှ လူနေထိုင်မရှိသည့် နေအိမ်တလုံးကို လက်နက်ကြီးထိမှန်ကာမီးလောင် ပျက်စီး သလို လယ်ထွန်ကျေးရွာထဲမှ နေအိမ်ခြံဝန်းတလုံးထဲ လက်နက်ကြီးထိမှန်ကာ အသက် (၇)နှစ်အရွယ်ကလေး နှင့် အသက် ၃၀အရွယ်ရှိ အမျိုးသားတစ်ဦးကျည်စမှန်ခဲ့ကြောင်း ဒေသခံ တစ်ဦးက သျှမ်းသံတော်ဆင့်ကိုပြောသည်။

“ ဖလိုင်တောင်ခြေ က နေအိမ်တစ်လုံး ပျက်စီးသွားတယ်။ အိမ်ထဲမှာ လူတွေမရှိတော့ ထိခိုက်ဒဏ်ရာ ရတာမရှိဘူး။ လယ်ထွန်ကျေးရွာကတော့ အရပ်သား ၂ဦးထိတယ်။ တစ်ယောက်က ၇ နှစ်အရွယ် ပဲရှိသေးတယ်။ ထပ်တစ်ယောက်က အသက် ၃၀ ရှိပြီး။ သူကတော့ နားတွေသိပ်မကောင်းဘူး” ဟု ဖယ်ခုံမြို့နယ် နယ်တွင်းလှည့်လည်ကူညီပေးနေသည့် ကျန်းမာရေးအဖွဲ့ဝင်တစ်ဦးက ပြောသည်။

အဆိုပါ လက်နက်ကြီးစထိမှန်သည့် အသက် ၃၀ အမျိုးသားသည် ခြေသလုံးဖောက်ထွင်းဒဏ်ရာ နှင့် ဝမ်းဗိုက်ဒဏ်ရာရရှိခဲ့ပြီး ၊ ၇ နှစ်အရွယ်ကလေးသည် ဝဲဘက်ပေါင်ရင်းထိခိုက်ဒဏ်ရာရရှိခဲ့ကြောင်း သိရသည်။

လက်ရှိ ထို အရပ်သား ၂ ဦးကို နယ်တွင်းလှည့်လည်နေသည့် ကျန်းမာရေးအဖွဲ့က လွှတ်မြောက်နယ်မြေ ပို့ဆောင်ထားပြီး ဆေးကုသပေးထားကြောင်းသိရသည်။

ထိုအပြင် စစ်ကောင်စီ၏ လက်နက်ကြီး ရမ်းသမ်းပစ်ခတ် ခြိမ်းခြောက်မှုကြောင့် ဖယ်ခုံမြို့နယ်အတွင်း နယ်လှည့်လည် နေသည့် ကျန်မားရေးအဖွဲ့ ကားလည်း ထိမှန်ပြီးပျက်စီးသွားကြောင်းသိရသည်။

“ ကျနော်တို့ကားလည်း လက်နက်ကြီးထိမှန်ပြီး ပျက်စီးသွားတယ်။ အဲကားနဲ့ပဲ လူနာတွေကိုကူညီပေးနေတာ” ဟု ၎င်းတို့အဖွဲ့က ပြောသည်။

ထို့အပြင် ဖလိုင်တောင်ခြေကျေးရွာ နှင့် လယ်ထွန်ကျေးရွာ ဒေသခံများက စစ်ဘေးရှောင်နေကြပြီး အချို့သည် ကျေးရွာတွင်းသို့ ပြန်လာနေထိုင်ကြပြီး စပါးပြန်လာရိတ်သိမ်းကြခြင်း အချို့က နေအိမ်ကို သန့်ရှင်းရေးလာလုပ်ကြောင်း သိရသည်။

“ တစ်ချို့က စစ်ဘေးရှောင်စခန်းတွေမှာပဲနေတာ။ တစ်ချို့က ပြန်လာကြတယ်။ လာကြတာဆိုလည်း မဖြစ်မနေပြန်လာတာ။ စပါးပြန်လာရိတ်သိမ်းတဲ့သူတွေနဲ့ အိမ်တွေ ပြန်လာကြည့်ပြီး သန့်ရှင်းရေး ပြန်လာလုပ်ကြတာ” ဟု ဖယ်ခုံမြို့နယ် ဒေသခံက ပြောသည်။

ဖယ်ခုံမြို့နယ် အရှေ့ဘက်ကမ်းတွင် မကြာခဏ စစ်ကောင်စီက လက်နက်ကြီး ပစ်ခတ်လေ့ရှိသည့် နေရာဒေသ တစ်ခုဖြစ်သည်။

အောက်တိုဘာလကုန်ပိုင်းတွင် စစ်ကောင်စီဘက်မှ ပစ်ခတ်မှု ခဏငြိမ်လာသဖြင့် ပြည်သူများက ပြန်လာနေကြပြီးနောက်ပိုင်း နိုဝင်ဘာ ၉ရက်မှစတင်ကာ ဖယ်ခုံမြို့နယ်အနောက်ဘက်ကမ်း လအိကျေးရွာထဲတွင် စစ်ကောင်စီက လက်နက်ကြီးရမ်းသမ်းပစ်ခတ်ခဲ့သောကြောင့် ၈ နှစ်အရွယ်ကလေး တစ်ဦး နှင့် အရပ်သား ၃ ဦး ထိခိုက်ဒဏ်ရာရရှိခဲ့ကြောင်း သိရသည်။