သျှမ်းပြည်မြောက်ပိုင်း ကျောက်မဲမြို့နယ်၊ နမ့်ဟူးတောင်း ကျေးရွာအုပ်စု ပန်မောင်ရွာ ဒေသခံ အမျိုးသားတစ်ဦးကို သျှမ်းပြည် တိုးတက်ရေးပါတီ၊ သျှမ်းပြည်တပ်မတော် (SSPP/SSA) အတွက် ဆက်ကြေး(အခွန်) ကောက်ပေးသည်ဟုဆိုကာ စစ်ကောင်စီက ဖမ်းဆီးထားကြောင်း စုံစမ်းသိရှိရသည်။
ဖြစ်စဉ်မှာ အောက်တိုဘာ ၂၈ ရက် နံနက် ၉ နာရီတွင် အသက်( ၆၀)အရွယ် ရှိ လုံးပညာကို စစ်ကောင်စီက ကျောက်မဲမြို့ အဝင်တိုးဂိတ်ကို သွားရောက်စောင့်ဆိုင်းရန် ခေါ်ဆိုပြီး ဖမ်းဆီးသွားခြင်းဖြစ်ကြောင်း မိသားစုဝင် တစ်ဦးက သျှမ်းသံတော်ဆင့်ကို ပြောသည်။
ထိုဖမ်းဆီးမှုပြီးနောက်ပိုင်းလည်း လုံးပညာကို ကျောက်မဲရဲစခန်းတွင်ချုပ်နှောင်းထားပြီး မိသားစုဝင်များနှင့် ယနေ့ထိတိုင် တွေ့ဆုံခွင့်မပြုကြောင်း မိသားစုဝင်များက ပြောသည်။
“ ဖမ်းသွားတာ ၁၅ ရက်ကျော်နေပြီး။ တိုးဂိတ်ကို သွားစောင့်ဆိုပြီးတော့ ဖမ်းသွားတာ။ အခုထိ ပြန်မလွှတ်ပေးသေးဘူး။ ရဲစခန်းကို သွားလိုက်မေးလည်း မပေးတွေ့ဘူး။ ဘာအမှုလည်း မသိရဘူး။ နေ့တိုင်းသွားတွေ့လည်း စခန်းမှူးက မပေးတွေ့ဘူး” ဟု လုံးပညာ၏ မိသားစုဝင်တစ်ဦးက ဆိုသည်။
လုံးပညာသည် ကျောက်မဲမြို့နယ် SSPP/SSA အတွက် ဆက်ကြေးကောက်ခံပေးပြီး ဆန်ဝယ်ပို့ပေးသူတစ်ဦးဖြစ်ကြောင်း ကျေးရွာထဲမှ အချို့ပြည်သူများက စစ်ကောင်စီကို သွားရောက်တိုင်ကြားသည့်အတွက် ဖမ်းဆီးခံရခြင်းဖြစ်ကြောင်း သိရသည်။
” သူကို SSPP/SSA က အခွန်ကောက်ခိုင်းပြီး ဆန်တွေဝယ်ခိုင်းတာ။ တစ်ချို့ကလည်း ဆန်တွေဝယ်လာပေးတယ်။ သူကပိုက်ဆံတွေကောက်လို့ဆိုပြီး တိုင်တဲ့သူရှိလို့ စစ်ကောင်စီက ဖမ်းသွားတာ။ သူကိုဘာလို့ဖမ်းလဲဆိုပြီးတော့ ကျမက ကျေးရွာအုပ်စု ဥက္ကဌ ကိုသွားမေးမှသိရတာ။ သူကိုတိုင်လိုက်တာဆိုတာ” ဟု မိသားစုဝင်က ထပ်လောင်းပြောသည်။
ထိုဖမ်းဆီးခံရပြီးနောက် မိသားစုဝင်များက (SSPP/SSA) တာဝန်ရှိသူများကို သွားရောက်တိုင်ကြားသော်လည်း ညှိနှိုင်းဆောင်ရွက်ပေးမည်ဟု ပြောဆိုကာ ယနေ့ထိ ပြန်မလွှတ်လာသေးသဖြင့် မိသားစုဝင်များက စိုးရိမ် စိတ်ပူနေကြသည်။
“ ဖမ်းဆီးခံရပြီး (SSPP/SSA) ကို သွားပြောတယ်။ သူတို့ကတော့ ညှိနှိုင်းပေးမယ်တဲ့။ သူတို့ထဲက တာဝန်ရှိတဲ့သူကို လွှတ်ပေးမယ်လို့ပြောတယ်။ အခုထိလည်း ဘာမှ မထူးခြားလာဘူး။ နေ့တိုင်းသွားတောင်းတွေ့လည်း မတွေ့ရဘူး။ စိုးရိမ်နေရတယ်။ သူဘယ်လိုဖြစ်နေလဲဆိုတာ စိတ်ပူပြီး နေနေရတာ” ဟု လုံးပညာ၏ နီးစပ်သူတစ်ဦးက ဆိုသည်။
အဆိုပါ ကိစ္စနှင့်ပတ်သတ်ပြီး (SSPP/SSA) ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန် နှင့် ဗိုလ်မှူးကြီး စိုင်းဆုတို့ကို သျှမ်းသံတော်ဆင့်မှ အကြိမ်ကြိမ်ဆက်သွယ်ခဲ့ပြီး ဖုန်းဝင်ခဲ့သော်လည်း လက်ခံဖြေကြားခြင်းမရှိခဲ့ပေ။
လုံပညာကို ဖမ်းဆီးပြီးကျောက်မဲရဲစခန်းတွင် ချုပ်နှောင်းထားခဲ့သည်မှာ ၁၅ရက်ရှိလာပြီဖြစ်ပြီး၊ မိသာစုဝင်များက လုံးပညာကိုတွေ့ဆုံရန် အကြိမ်ကြိမ်ညှိနှိုင်းခဲ့သော်လည်း ရဲစခန်းမှ တာဝန်ရှိသူက ကျပ်ငွေ ၅သောင်းပေးပါက တွေ့ဆုံခွင့်ပေးမည်ဟု ပြောဆိုခဲ့သည်။
“ လုံးပညာနဲ့တွေ့ချင်ရင် ပိုက်ဆံပေးရမယ်တဲ့။ ပိုက်ဆံ ၅ သောင်းတောင်းတယ်။ သူတို့ ဒီလိုတောင်းတာ ၂ ကြိမ်ရှိပြီး။ ကျမတို့လည်း လုံးပညာကိုမတွေ့ရလို့ ပိုက်ဆံမပေးလိုက်ရဘူး။ သူကရွာက သက်ကြီးရွယ်အိုတစ်ယောက်ပဲ။ ဘာမှလည်းမလုပ်ဘူး။ အခုချိန်ထိ သူဘယ်လိုနေထိုင်နေရလဲ။ သူကျန်းမာရေးအခြေနေ မသိရသေးဘူး” ဟု မိသားစုဝင်က ပြောသည်။
သို့သော်လက်ရှိအချိန်ထိ တွေ့ဆုံးခွင့်မရသေးသည့်အပြင် ကျန်းမာရေးအခြေအနေလည်း မသိရှိရသေးကြောင်းသိရသည်။
ယခုလအတွင် နိုဝင်ဘာ ၉ ရက်တွင်လည်း ကျောက်မဲမြို့ပေါ်ရှိ ကားဂိတ်တခုထံ ပစ္စည်းသွားပို့သည့် လူငယ် (၂)ဦးကို မသင်္ကာမှုနှင့်စစ်ကောင်စီက ဖမ်းဆီးခဲ့ကြောင်းသိရသည်။
