သျှမ်းပြည်မြောက်ပိုင်း တန့်ယန်းမြို့ ရပ်ကွက် ၇ အတွင်းတွင် ကျောက်တောင်သို့ သဲ၊ ကျောက် သွားသယ်ရန် သွားသော ထော်လာဂျီကားတစ်စီး တိမ်းမှောက်ပြီး အမျိုးသမီး ၁ ဦးသေဆုံး၊ ၇ ဦးထိခိုက်ဒဏ်ရာရရှိကြောင်း စုံစမ်းသိရှိရသည်။
ဖြစ်စဉ်မှာ ယနေ့ နိုဝင်ဘာလ ၁၅ ရက် နံနက်ပိုင်း ၈ နာရီခွဲတွင် ရေဆိပ်လမ်းမှ ကျောက်တောင်သွားလမ်း ပေါ် ကုန်းဆင်းတစ် နေရာတွင် ထော်လာဂျီကား ဘရိတ်ပေါက် တိမ်းမှောက်ခဲ့ပြီး ထော်လဂျီပေါ်မှ အမျိုးသား (၄) ဦး၊ အမျိုးသမီး (၃) အနက် အသက် (၃၀) နှစ် ပတ်ဝန်းကျင် အမျိုးသမီးတစ်ဦး သေဆုံးသွားကြောင်း တန့်ယန်းမြို့နယ် အရန်မီးသတ်တပ်ရင်းမှ သွားရောက်ကူညီခဲ့ကြောင်း သိရသည်။
“ သူတို့ ရပ်ကွက် (၇) ကနေ ကျောက်တောင်ကို ကျောက်သွားသယ်ဖို့ သွားတာ။ ရပ်ကွက် (၇) နဲ့ ကျောက်တောင် ကြားအဆင်းတစ်နေရာမှာ လမ်းကလည်း မကောင်းတာနဲ့ ကားပရိတ်ပေါက်ပြီး ထိုးကျသွားတာ။ အမျိုးသား (၃) ယောက်၊ အမျိုးသမီး (၃)ထဲက တစ်ယောက်ကတော့ ဆုံးသွားတယ်။ ထိခိုက်ဒဏ်ရာရတဲ့ သူအားလုံးကိုတော့ ဆေးရုံကို ပို့ထားတယ် “ ဟု ၎င်း တာဝန်ခံရှိသူ တစ်ဦးက သျှမ်းသံတော်ဆင့်ကိုပြောသည်။
ထိုထဲမှာ ကားမောင်းနှင်သူ ကားဆရာတစ်ဦးမှာ စိုးရိမ်ရသော ထိခိုက်ဒဏ်ရာရခဲ့ပြီး သတိမေ့နေသဖြင့် တန့်ယန်းဆေးရုံပြည်သူ့ဆေးရုံတွင် ပို့ဆောင်ထားကြောင်း သိရသည်။
ထို့အပြင် ရပ်ကွက် (၇) နှင့် ကျောက်တောင်ကြား အဆင်းလမ်းတစ်နေရာတွင် ကားလမ်းအချို့ ပျက်စီးနေသဖြင့် သတိထားမောင်းနှင်စေလိုကြောင်း ၎င်းကထပ်လောင်းပြောသည်။
ယခုနှစ် အတွင်း တန့်ယန်းမြို့နယ်အတွင်း ယာဥ်တိုက်မှု (၅)ကြိမ်ထက်မနည်း ဖြစ်ပွားခဲ့ကြောင်းသိရသည်။
