သျှမ်းပြည်မြောက်ပိုင်း ကွတ်ခိုင်မြို့နယ်တွင် ကချင် လွတ်မြောက်ရေး တပ်မတော် KIA တပ်ဖွဲ့မှ ကားသမားထံမှ အခွန်အဆမတန်ကောက်နေကြောင်း သတင်းသိရသည်။
ယခု နိုဝင်ဘာ လဆန်းပိုင်းမှ စတင်ကာ ကွတ်ခိုင်မြို့နယ် နမ့်ကွတ်ကျေးရွာ နှင့် အနီးတစ်ဝိုက်တွင် KIA တပ်ဖွဲ့မှ ၂၂ ဘီး ကုန်တင်ကားတစ်စီးလျှင် ကုန်ဖိုးအတွက် အခွန် ၅ သိန်း နှင့် ကားအခွန်တနှစ်စာအတွက် ၈ သိန်း တောင်းယူနေကြောင်း ဒေသခံ ကားသမားတစ်ဦးထံမှ သတင်းသိရသည်။
“တင်လာတဲ့ ကုန်အမျိုးအစားတွေပေါ် မူတည်ပြီးတော့ ကုန်ဖိုးရဲ့ အခွန်က ကွာသွားတယ်၊ ဘိလပ်မြေတွေ တင် လာရင် ၅ သိန်း ပေးရတယ်၊ ငါးတို့တခြားကုန်တို့ကျတော့ ဈေးနှုန်းတမျိုးဖြစ်သွားတယ်၊ ကားအခွန်ဖြစ်တဲ့ ဘီး လိမ့်ခွန်ကကျတော့ ၈ သိန်းခွဲပေးရတယ်၊ ဒီလိုလုပ်လာတာ ၁၅ ရက်လောက်ရှိပြီ၊ သူတို့ဆီအခွန်ဆောင်ပြီးရင် ဖြတ်ပိုင်းကဒ်ရတယ်။” ဟု အသက် ၃၀ ဝန်းကျင် ဒေသခံကားသမားက ပြောသည်။
ကုန်တင်ခွန်များသည် ကားပြေးဆွဲသည့် အခေါက်တိုင်း ပေးဆောင်ရခြင်း ဖြစ်ပြီး လီးလိမ့်ခွန်က တစ်နှစ်စာ အတွက်ဖြစ်ကြောင်းလည်း အထက်ပါ ကားသမားက ဆက်ပြောသည်။
KIA တပ်ဖွဲ့မှ ယင်းကဲ့သို့ အခွန်ကောက်ယူမှု ပမာဏ များပြားသည့်အတွက် ဒေသခံကားသမားများအတွက် အခက်အခဲများ ရှိနေသည့်အပြင် ယခင် ပြေးဆွဲသည့် ကားအရေအတွက်ထက် ပိုမိုလျော့နည်းလာကြောင်းလည်း သိရသည်။
“ခက်ခဲတာတော့ ခက်ခဲတာပေါ့၊ အရင်တုန်းက မူဆယ်ကွတ်ခိုင်လားရှိုး ပြေးဆွဲတဲ့ ပျှမ်းမျှကားအစီးရေက ထောင်ဂဏန်းပြေးဆွဲနေတာ၊ အခုချိန်ကြတော့ ၂၀၀ ကျော် ၃၀၀ လောက်ပဲ ရှိတော့တယ်၊ အခွန်တွေရော၊ ဆီဖိုးတွေရော ကားသမားတွေ အတွက် တော်တော်ကို ခက်ခဲတယ်” ဟု ၎င်းက ပြောသည်။
အဆိုပါ KIA တပ်ဖွဲ့မှ အခွန်ကောက်နေသည့် အနီးတစ်ဝိုက်တွင်ရှိ နမ့်ခိုင်တံတား၊ ကွတ်ခိုင်အဝင် နှင့် ရှုခင်းသာ တို့တွင် စစ်ကောင်စီတပ်ဖွဲ့မှ နေရာယူကာ လမ်းသွားလမ်းလာများကို စစ်ဆေးမေးမြန်းမှု ပြုလုပ်နေကြောင်း လည်း သိရသည်။
“အဲ့ဒီ KIA အခွန်ကောက်တဲ့ အနီးမှာ Vigo ကား သုံးစီး နဲ့ စကစတပ်သားတွေ စောင့်နေကြတယ်၊ နမ့်ကွတ်ဘက် ကနေ တက်လာတဲ့ကားတွေကို အခွန်ကောက်တာ ကြုံရလား၊ ဘယ်အဖွဲ့၊ ဘယ်လောက်ပေးခဲ့လဲဆိုတွေမေးပြီး လက်ဘက်ရည်ဖိုး ကွမ်းဖိုးတွေ ထပ်တောင်းတယ်”ဟု အသက် ၃၀ ဝန်းကျင် အထက်ပါ ကားသမားက ဆက် ပြောသည်။
ထို့အပြင် ပြီးခဲ့သည့် နိုဝင်ဘာလ ၁၂ ရက်နေ့ မနက်ပိုင်း ၁၁ နာရီဝန်းကျင်တွင် ကွတ်ခိုင်မြို့နယ် ဘုရားကျောင်းမှ ပြန်လာသည့် အိမ်စီး ကားတစ်စီးသည် ကွတ်ခိုင်မြို့ အကျော် နမ့်ဖတ်ကာနားမရောက်ခင် အမည်မသိ လက်နက် ကိုင် လူတစ်စု က ကားကိုတားပြီး ပိုက်ဆံ နှစ်သိန်းတောင်းယူခဲ့ကြောင်းလည်း သတင်းသိရသည်။
“အားလုံးက လူလတ်ပိုင်းအမျိုးသားတွေချည်းပဲ၊ ၅ ယောက်လောက်တော့ ရှိတယ်၊ ခါးကြားမှာ သေနတ်ထိုးထား တယ်၊ သူတို့ကိုယ် သူတို့ ရဲလို့ပြောပြီး ကျမတို့ကားကို ပိုက်ဆံ ၂ သိန်း တောင်းတာတဲ့၊ ကျမတို့က ဘုရားကျောင်း ကနေ ပြန်လာတာလို့ ပြောပြီး တောင်းတောင်းပန်ပန်နဲ့ ၃၀၀၀ တော့ပေးခဲ့ရတယ်” ဟု အထက်ပါ အမျိုးသမီးက ပြောသည်။
ကွတ်ခိုင်မြို့နယ်အတွင်း KIA တပ်ဖွဲ့မှ ကားသမားများထံ အဆမတန် အခွန်ကောက်တောင်းယူမှုများနှင့် ပတ်သက်ပြီး KIA တပ်ဖွဲ့မှ ပြောရေးဆိုခွင့်ရှိသူ ဗိုလ်မှူးကြီး နော်ဘူထံ ဆက်သွယ်မေးမြန်းခဲ့ပေမဲ့ ဖုန်းလက်ခံ ဖြေကြားခြင်း မရှိပေ။
စစ်ကောင်စီ အာဏာသိမ်းပြီးနောက်ပိုင်း ကွတ်ခိုင်မြို့အတွင်း လက်နက်ကိုင်တပ်ဖွဲ့များမှ အခွန်ကောက်ခံ တောင်းယူမှု ပိုမိုများပြားလာသည့်အပြင် လောင်းကစားဝိုင်းများ၊ မူးယစ်ဆေးဝါးများ ပေါများလာပြီး ဒေသတွင်း မလုံခြုံမှုနှင့် တရားဥပဒေ အကာအကွယ်မှုလည်း ကင်းမဲ့နေကြောင်း ဒေသခံများက ပြောဆိုနေ ကြသည်။
