သျှမ်းပြည် မြောက်ပိုင်း သန္နီမြိုနယ်တွင် အာဏာသိမ်း စစ်ကောင်စီ နှင့် တအာင်း (ပလောင်) အမျိုးသား တပ်မတော် (TNLA)တို့ ထိတွေ့တိုက်ပွဲဖြစ်ပွားခဲ့ကြောင်း သတင်းသိရသည်။
ယနေ့ နိုဝင်ဘာလ ၁၃ ရက်နံနက်ပိုင်း ၈ နာရီဝန်းကျင်တွင် သိန္နီမြို့နယ်မှ ကွမ်လုံဘက်သွားသည့် လမ်းပိုင်းရှိ ပန်တီးကျေးရွာအနီးတွင် ထိတွေ့တိုက်ပွဲဖြစ်ပွားခဲ့ခြင်းဖြစ်ကြောင်း ဒေသခံများထံ သိရသည်။
“တိုက်ပွဲစတဲ့အချိန်က ၈ နာရီလောက်မှာပါ၊ စစ်ကောင်စီ စစ်သားတချို့တော့ လမ်းပေါ်လည်းရှိနေတယ်၊ ပန်တီး ရွာ မရောက်ခင် အနီးမှာ TNLA စစ်သားတွေလည်း ရှိနေတယ်၊ စစ်ကူဖို့လားတော့ မပြောတတ်ဘူး၊ တိုက်ပွဲ ဖြစ်တာက ပန်တီးရွာရဲ့ အနီးမှာပဲ၊ အခုက အဲ့လမ်းကနေ ဖြတ်ရတဲ့ သိန္နီ-ကွမ်လုံကားတွေ ရပ်ထားရတယ်” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုထိတွေ့တိုက်ပွဲ ပစ်ခတ်သံများ ဖြစ်ပွားချိန်တွင် စစ်သားတချို့ လမ်းမကြီးပေါ်အထိ ရောက်ရှိနေသည့်အတွက် ကားသမားတချို့က နောက်ကြောင်းပြန်လည့်သလို အချို့လည်း ရပ်နားထားကြောင်း အထက်ပါ အမျိုးသား ဆက်ပြောသည်။
ထို့အပြင် ပစ်ခတ်မှုထွက်ပေါ်လာပြီး မရှေးမနှောင်းတွင်ပင် ကွတ်ခိုင်မြို့ရှိ စစ်ကောင်စီတပ်က လက်နက်ကြီးများဖြင့် ပစ်ခတ်နေကြောင်းလည်း ကွတ်ခိုင်မြို့ ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီတပ် ဗျူဟာကုန်းကနေ လက်နက်ကြီးနဲ့ ပစ်နေတာ၊ ၁၀ လောက်ရှိတယ်၊ ငါးမိနစ်ခြားပြီး ပစ်တာ၊ ထိခိုက်ပျက်စီးမှုတွေတော့ မသိရသေးဘူး” ဟု အထက်ပါ အမျိုးသမီးက ပြောသည်။
ပြီးခဲ့သည့် နိုဝင်ဘာလ ၁၁ ရက် နံနက်ပိုင်း ၄ နာရီဝန်းကျင်တွင်လည်း သီပေါမြို့ ကုန်းသားကျေးရွာ အခြေစိုက် စစ်ကောင်စီ နယ်မြေခံတပ် ၂၃ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA တို့ ထိတွေ့တိုက်ပွဲဖြစ်ပွားခဲ့ကြောင်းလည်းသတင်းသိရသည်။
စစ်ကောင်စီတပ်မှ နိုင်ငံတော် အာဏာသိမ်းယူပြီး တစ်နှစ်ကျော်ကြာလာသည့် အချိန်တွင် သျှမ်းပြည်မြောက်ပိုင်း၌ တိုင်းရင်းသားလက်နက်ကိုင် တပ်ဖွဲ့တို့နှင့် စစ်ကောင်စီတို့၏ ထိတွေ့တိုက်ပွဲ ပိုမိုများပြားလာကြောင်း သိရသည်။
သျှမ်းပြည်မြောက်ပိုင်းတွင် အာဏာသိမ်းစစ်ကောင်စီတပ်ဖွဲ့အပြင် ၎င်းတို့၏ လက်အောက်ခံ ပြည်သူ့စစ် တပ်ဖွဲ့များ နှင့် တိုင်းရင်းသားလက်နက်ကိုင် တပ်ဖွဲ့ဖြစ်ကြသည့် KIA တပ်ဖွဲ့၊ MNDAAတပ်ဖွဲ့၊ TNLA တပ်ဖွဲ့နှင့် SSPP/SSA တို့က သွားလာလှုပ်ရှားနေလျက်ရှိသည်။
