သျှမ်းပြည်တောင်ပိုင်း အောင်ပန်းမြို့ သွေးလှူရှင်အသင်းခေါင်းဆောင် ကိုတရုတ်ကြီး နှင့် ၎င်း၏ အဖွဲ့ဝင်(၄)ဦးကို တောင်လေးလုံးထောင်သို့ ပို့ဆောင်လိုက်ပြီးဖြစ်ကြောင်း စုံစမ်းသိရသည်။
ယခု နိုဝင်ဘာလ ပထမပတ်အတွင်း ကိုတရုတ်ကြီးကို မိသားစုဝင်များက အောင်ပန်းရဲစခန်းသို့ သွားရောက်တွေ့ဆုံခဲ့ပြီးနောက်မှာ စစ်ကောင်စီမှ လုံခြုံရေးအရ ဟုဆိုပြီး ၎င်းကို တောင်လေးလုံးသို့ ပို့ဆောင်လိုက်ကြောင်း အောင်ပန်းမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ သူကို လုံခြုံရေးအရဆိုပြီးတော့ တောင်လေးလုံးထောင်ကိုပို့လိုက်ပြီ။ သူမိသားစုဝင်တွေက သွားလို့ဆိုပြီးတော့ ပို့လိုက်တာပါ။ ဒီလအတွင်းထဲမှာပို့လိုက်တာ။ သူအဖွဲ့ဝင်သားတွေလည်းပါမယ်ထင်တယ်” ဟု အောင်ပန်းမြို့ ဒေသခံအမျိုးသားတစ်ဦးက ပြောသည်။
ကိုတရုတ်ကြီးကို လက်ရှိမည်သည့်အမှုဖြင့်ဖမ်းဆီးထားကြောင်း မသိရှိရသေးသော်လည်း ၎င်း၏ ဖုန်းထဲတွင် PDF ကို ထောက်ပံ့ပေးထားသည့်အချက်လက်ကိုတွေ့ရှိထားသည်ဆိုပြီး ဖမ်းဆီးသွားခြင်းဖြစ်သည်။
“ သူကိုတောင်လေးလုံးထဲမှာပဲ စစ်ဆေးမယ်တဲ့။ အခုထိတော့ ဘာအမှုနဲ့ ဖမ်းထားလဲမသိရဘူး။ ဘာပုဒ်မနဲ့လည်း မသိရသေးဘူး။ သူတို့ (စစ်ကောင်စီ) တွေက စစ်ဆေးတဲ့အခါမှာ သူဖုန်းထဲမှာ PDF တွေကို ထောက်ပံ့ထား တာတွေ့တယ်တဲ့” ဟု ကိုတရုတ်ကြီးနှင့် နီးစပ်သူက ပြောသည်။
ကိုတရုတ်ကြီး နှင့် ၎င်းအဖွဲ့ဝင်များကို စစ်ကောင်စီက အောက်တိုဘာ ၁၀ ရက် ည ၅ နာရီဝန်းကျင်တွင် လာရောက် ဖမ်းဆီးသွားကြောင်း သိရသည်။
လက်ရှိအောင်ပန်းမြို့သည် ဖမ်းဆီးမှုနည်းပါးလာသော်လည်း စစ်ဆေးမှုက တင်းကြပ်နေဆဲ ဖြစ်ကြောင်း သိရသည်။
“ အောင်ပန်းမှာက အခုတလောစစ်ဆေးမှုကတော့ တင်းကြပ်နေဆဲဖြစ်တယ်။ ဖမ်းဆီးတာတွေတော့ သိပ်မရှိတော့ဘူး။ ပြီးတော့အခုက မီးတွေခနခနပျက်တယ်” ဟု အောင်ပန်းမြို့ ဒေသခံတစ်ဦးက ပြောသည်။
အောင်ပန်းမြို့တွင် အောက်တိုဘာလအတွင်း ဖမ်းဆီးခံရသူ စုစုပေါင်း ၁၀ ဦးထက်မနည်းရှိထားပြီး နိုဝင်ဘာလတွင် ဖမ်းဆီးမှုမရှိကြောင်း ဒေသခံများပြောပြချက်အရသိရသည်။
စစ်တပ်က အာဏာသိမ်းပြီးနောက်ပိုင်း ပြည်သူ (၂၄၃၂) ဦး သတ်ဖြတ်ခံထားရပြီး ( ၁၆၁၃၆ ) ဖမ်းဆီးခံထားရကြောင်း နိုင်ငံရေးအကျဉ်သားများ ကူညီစောင့်ရှောက်ရေးအသင်း AAPP၏ နိုဝင်ဘာ ၁၀ ရက် ထုတ်ပြန်ချက်အရသိရသည်။
Leave a Comments