သျှမ်းပြည်တောင်ပိုင်း တောင်ကြီးမြို့ နှစ်စဥ်နှစ်တိုင်း စဥ်ကားစွာ ကျင်းပသည့် တန်ဆောင်တိုင်ပွဲတော်ကို ယခုနှစ်တွင် အာဏာသိမ်း စစ်ကောင်စီမှ ဦးစီးပြီး ပြုလုပ်သဖြင့် ဒေသခံများ မသွားရဲကြကြောင်း စုံစမ်းသိရသည်။
တောင်ကြီးမြို့ တန်ဆောင်တိုင်ပွဲတော်သည့် မြန်မာနိုင်ငံ၏ အထင်ကရ ပွဲတော်တခုဖြစ်ပြီး ခရီးသွားဧည့်သည်များ အများအပြားလာရောက်လည်ပတ်သည့် ပွဲတော်တခုဖြစ်သလို တောင်ကြီး ဒေသခံများအတွက် ဂုဏ်ယူစရာပွဲတော် တခုဖြစ်သည်။
သို့သော် ၂၀၁၉ ခုနစ် ကိုဗစ်-၁၉ ကူးစက်ရောဂါကြောင့် တန်ဆောင်တိုင်ပွဲတော်ကို ပိတ်ခဲ့ရာ ယခုနှစ် အာဏာသိမ်း စစ်ကောင်စီလက်ထက်တွင် ပြန်လည်ကျင်းပခဲ့သည်။
စစ်ကောင်စီ ဦးစီးကျင်းပသည့်အတွက် တောင်ကြီးဒေသခံများသည် မလိုလားသဖြင့် သွားရောက်လည်ပတ်မှု မပြုကြကြောင်း သိရသည်။
ထို့ကြောင့် တန်ဆောင်တိုင်ဖွင့်ပွဲနေ့တွင် လူစည်းကားဖို့အတွက် စစ်ကောင်စီမှ တစ်ယောက်ကို ကျပ်ငွေ (၅,၀၀၀) ကျပ်မှ (၂၀,၀၀၀) ကျပ်ထိ ဈေးတင်ပေးပြီး လူခေါ်ယူခဲ့သည်။
“ အရင်တုန်းကတော့ တစ်ယောက်ကို ကျပ်ငွေ (ငါးထောင်) နဲ့ခေါ်တယ်။ တဖြည်းဖြည်း ပွဲလည်းနီးလာတော့ ကျပ်ငွေ (တစ်သောင်း) ကနေ (နှစ်သောင်း) ထိဈေးပေးပြီး ခေါ်နေတယ်။ သူတို့လိုက်ခေါ်နေတဲ့သူတွေက လောင်းကစားဝိုင်းက လောင်းကစားသမားတွေ၊ မူးယစ်ဆေးသမား၊ အရက်သမားတွေပဲ။ ပွဲမစည်အောင် စည်အောင်လုပ်နေတယ် “ ဟု တောင်ကြီးမြို့ အသက် ၂၅နှစ် အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုနှစ် နိုဝင်ဘာ ၇ ရက်တွင် တန်ဆောင်တိုင် ဖွင့်ပွဲအနေဖြင့် မီးပဒေသာပင် လှည့်လည်ပွဲပြုလုပ်ရာ စစ်ကောင်စီမှ လုံခြုံရေးယူထားပြီး စိန်းနပန်းမီးပုံးပျံ ၂ လုံးနှင့် ပိတ်ပွဲရက်များ ၃ ရက်ဆက်တိုက် ပြုလုပ်မည်ဖြစ်သော်လည်း မြို့ခံတောင်ကြီးသားများက ယခုနှစ်တွင် ပါဝင်ဆင်နွဲနိုင်ခြင်းမရှိခဲ့ကြောင်း ၎င်းလူငယ်က ပြောသည်။
ယခင်က စစ်အာဏာမသိမ်းခင်မှာ တောင်ကြီးမြို့ တန်ဆောင်တိုင်ပွဲတော်သည် ၉ ရက်ကြာ ပြုလုပ် ကျင်းပနိုင်ခဲ့သည်။
“ ကျနော်တို့လူငယ်တွေတော့ အရင်တွေလောက် မီးပုံးပျံတန်ဆောင်တိုင်ပွဲဆိုပြီးတော့ စိတ်ထဲမှာတောင် မရှိတော့ဘူး။ စစ်ကောင်စီက လုပ်တဲ့ပွဲကြီးမို့ စိုးရိမ်စရာတော့အများကြီးတာပေါ့။ ကျနော်ကိုယ်တိုင် ဒီနှစ်တိုင်ဆောင်ပွဲကို သွားမလည်ဘူး။ သွားလည်မယ်ဆိုရင်လည်း ကိုယ့်အတွက်အန္တရာယ်ရှိတယ်။ ဒီချိန်က ပွဲလုပ်မယ့်အချိန်မဟုတ်ဘူး “ ဟု အသက် ၂၀ အရွယ်ရှိ သျှမ်းလူငယ် တစ်ဦးက သျှမ်းသံတော်ဆင့်ကိုပြောသည်။
ထို့အပြင် စက်တင်ဘာလ ၂၀ ရက်တွင် စစ်ကောင်စီ တပ်ဖွဲ့များက မီးပုံးပျံလုပ် ယမ်းများကို ဖောက်ခွဲရေး ပစ္စည်းဟု သတ်မှတ်ပြီး ယမ်းအသုံးပြုသူများ၊ ဝယ်ယူသူများကို လိုက်လံဖမ်းခဲ့သလို မီးပုံးပျံ အဖွဲ့အစည်းမှ ပါဝင်သူများကိုလည်း စစ်ကောင်စီမှ ဖမ်းဆီး အရေးယူ ဆောင်ရွက်ခဲ့ဖူးသည်။
“ ဒီပွဲကို အရင်လိုတော့မဟုတ်တာသေချာတယ်။ အရင်က ကျနော်တို့လူငယ်တွေ ပွဲမတိုင်ခင် ၂လလောက်ဆိုရင် ရင်ခုန်နေပြီ၊ မီးပုံးလုပ်တဲ့သူကလုပ်ပေါ့။ အာဏာသိမ်းပြီးနောက်မှာ မီးပုံးလုပ်ယမ်းကိုင်တဲ့သူလည်းဖမ်းတော့ ဘယ်သူက လုပ်ရဲမှာလဲ” ဟု ဝါပြားရပ်ကွက်နေ ပအိုဝ်းလူငယ်တစ်ဦးက သျှမ်းသံတော်ဆင့်ကိုပြောသည်။
တန်ဆောင်တိုင်ပွဲတော်ရောက်ပါက တခြားဒေသရောက် တောင်ကြီးသူ၊တောင်ကြီးသားများသည် မိမိဒေသကို အရောက်ပြန်လာကြပြီး ပွဲတော်ကို ဆင်နွှဲကြသလို ပွဲတော်အတွင်း လွှင့်တင်ရန် မီးပုံးပျံကိုလည်း ကိုယ်တိုင်ရင်ခုန်စွာ ပြုလုပ်ကြလေ့ရှိကြောင်း ပအိုဝ်းလူငယ် က ဆိုသည်။
စစ်ကောင်စီသည် အာဏာသိမ်းမှုကို ဆန့်ကျင်ဆန္ဒပြသည့် ပြည်သူများကို နည်းမျိုးစုံ အနိုင်ကျင့်ခြင်း၊ သတ်ဖြတ်ခြင်း၊ ဖမ်းဆီးခြင်းတို့ကို ဆက်တိုက်ပြုလုပ်ခဲ့သည်။ ထို့ကြောင့် စစ်ကောင်စီ ဦးစီးကျင်းပသည့် ပွဲတော်ကို မသွားရောက်ရန်လည်း အာဏာရှင်တော်လှန်သည့် အဖွဲ့အစည်းများက တိုက်တွန်းနှိုးဆော်ထားသည်။
တောင်ကြီးမြို့ပေါ်တွင် ပြီးခဲ့သည့် နိုဝင်ဘာ ၆ ရက်မှ ယနေ့အချိန်ထိ စစ်ကောင်စီ တပ်သားများ၊ ပြည်သူ့စစ် PNO နှင့် ရဲတပ်ဖွဲ့များက စစ်ဆေးရေးဂိတ်တွေမှာ စစ်ဆေးရေး တင်းကြပ်ထားနေပြီး မြို့ပေါ်လမ်းမကြီး နှင့် ရပ်ကွက်အတွင်း တွင်လည်း စစ်ကောင်စီ တပ်သားများ ကင်းလှည့်လည် စောင့်ဆိုင်းနေကြောင်း သိရသည်။
Leave a Comments