သျှမ်းပြည်တောင်ပိုင်း တောင်ကြီးမြို့ စစ်ကောင်စီ ဉီးစီးပြီး ပြုလုပ်သော တန်ဆောင်တိုင် ဖွင့်ပွဲအတွက် တစ်ယောက်ကို ကျပ်ငွေ ၁ သောင်းပေးပြီး လူခေါ်ယူနေကြောင်း စုံစမ်းသိရှိရသည်။
ယနေ့ နိုဝင်ဘာလ ၇ ရက်မှစပြီး ၉ ရက်ထိ တောင်ကြီး တန်ဆောင်တိုင် ပွဲတော်ကို စိန်နပန် မီးပုံးပျံ ၂ လုံးနှင့် နေ့လွှတ် (အရုပ်) မီးပုံးပျံ လွှတ်တင်ခြင်း ပြိုင်ပွဲကို ပြုလုပ်မည်ဖြစ်ပြီး ထို ပွဲတော်ဖွင့်ပွဲ နှင့် ပိတ်ပွဲအတွက် စစ်ကောင်စီက တစ်ဦးလျှင် ကျပ်ငွေ ၁ သောင်း ပေးပြီး လူခေါ်ယူနေကြောင်း တောင်ကြီး ဒေသခံ အသက် ၂၀ နှစ် အရွယ် လူငယ်တစ်ဦးက သျှမ်းသံတော်ဆင့် ကိုပြောသည်။
“ မနေ့ကတော့ ဖွင့်ပွဲအနေနဲ့ မီးပုံးငယ်လေးတွေ စပြီးလွှတ်နေတယ်။ ပွဲထဲက လူတော့မစည်ဘူး၊ အဲ့ကြောင့် စစ်ကောင်စီက ပွဲထဲမှာ လူစည်ဖို့အတွက် မနေ့တစ်နေ့ ကတည်းက တစ်ယောက်ကို ကျပ်ငွေ ၁ သောင်းပေးပြီး လူခေါ်နေတယ် “ ဟု ၎င်း လူငယ်တစ်ဦးက ပြောသည်။
ယခု ၂၀၂၂ ခုနှစ် နိုဝင်ဘာလ ၇ ရက်မှစပြီး စစ်ကောင်စီက ဦးစီးပြီး ပြုလုပ်မည့် တောင်ကြီး တန်ဆောင်တိုင်ပွဲတော်ကြီးသည် မြန်မာနိုင်ငံတွင် ငြိမ်းချမ်း သာယာဖွယ်နေကြောင်းကို ဝါဒဖြန့်နေသည်ဟု ၎င်းက ဆက်ပြောသည်။
ထို့အပြင် နှစ်စဉ်နှစ်တိုင်း မီးပုံးပျံများကို ပြုလုပ်နေသည့် အဖွဲ့များကိုလည်း စစ်ကောင်စီ လက်အောက်ခံ ရပ်ကွက်လူကြီးများက အစည်းအဝေးခေါ်ယူပြီး မီးပုံးပျံများ လွှတ်တင်ခြင်းအတွက် အကြောင်းကြားနေကြောင်း တောင်ကြီးဒေသခံ တစ်ဦးက ပြောသည်။
“ ယခင်နှစ်တွေတုန်းက မီးပုံးပျံ လုပ်နေတဲ့ အဖွဲ့အစည်းတွေကို ရပ်ကွက် လူကြီးတွေက အစည်းအဝေး ခေါ်တယ်။ မီးပုံးပျံလုပ်ဖို့၊ လွှတ်ဖို့အတွက်ခေါ်တာ။ သူတို့ ဟိုရှေ့ကတည်းက ခေါ်ပြီးလုပ်ခိုင်းနေတော့ တော်တော်များများတောင် ဘယ်သူမှ မသိကြဘူး။ ကျနော်တို့ ရပ်ကွက်တော့ ဘယ်သူမှ မလုပ်ကြပါဘူး။ ရိုးရာပွဲကြီးကို ပိုက်ဆံပေးပြီး လူခေါ်လိုက်၊ မီးပုံးလုပ်ဖို့အတွက် အမိန့်ပေးလိုက်နဲ့ အနှစ်တွေ လုံးဝမတူတော့ ကျနော်က သဘောမကျဘူး “ ဟု ၎င်း ဒေသခံတစ်ဦးက ပြောသည်။
စက်တင်ဘာလ ၂၀ ရက်တွင် စစ်ကောင်စီ တပ်ဖွဲ့များက မီးပုံးပျံလုပ် ယမ်းများကို ဖောက်ခွဲရေး ပစ္စည်းဟု သတ်မှတ်ပြီး ယမ်းအသုံးပြုသူများ၊ ဝယ်ယူသူများကို လိုက်လံဖမ်းခဲ့သလို မီးပုံးပျံ အဖွဲ့အစည်းမှ ပါဝင်သူများကိုလည်း စစ်ကောင်စီမှ ဖမ်းဆီး အရေးယူ ဆောင်ရွက်ခဲ့ဖူးသည်။
ယမန်နေ့ နိုဝင်ဘာလ ၆ ရက်ကစပြီး တောင်ကြီးမြို့ပေါ်တွင် စစ်ကောင်စီ တပ်သားများ၊ ပြည်သူ့စစ် PNO နှင့် ရဲတပ်ဖွဲ့များက စစ်ဆေးရေးဂိတ်တွေမှာ စစ်ဆေးရေး တင်းကြပ်ထားနေပြီး မြို့ပေါ်လမ်းမကြီး နှင့် ရပ်ကွက်အတွင်းတွင်လည်း စစ်ကောင်စီ တပ်သားများ ကင်းလှည့်လည် စောင့်ဆိုင်းနေကြောင်း သိရသည်။
