Thursday, June 20, 2024

မိုင်းယော်တိုက်နယ်အတွင်း စစ်ရေးတင်းမာနေဆဲ ဒေသခံများလယ်ယာ မသွားနိုင်သေး

Must read

သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်အတွင်းတွင် စစ်ရေးတင်းမာမှုများ ဆက်လက်ရှိနေသေးသဖြင့် ဒေသခံများလယ်ယာမသွားနိုင်သေးကြောင်း သတင်းသိရသည်။

မိုင်းယော်တိုက်နယ်

ပြီးခဲ့သည့် နိုဝင်ဘာလ ၂ ရက်တွင် အာဏာသိမ်းစစ်ကောင်စီနှင့် ကိုးကန့်တပ်မတော် MNDAA တပ်ဖွဲ့တို့၏ တိုက်ပွဲအပြီး ယနေ့အချိန်ထိ နှစ်ဖက် စစ်ရေးတင်းမာမှုများရှိနေသေးသည့်အတွက် ဒေသခံများက လယ်ယာမသွားရဲကြောင်း မန်ဝိန်းရွာမှ အမည်မဖော်လိုသူ အမျိုးသားတစ်ဦးက သျှမ်းသံတော်ဆင့်ကိုပြောသည်။

“တိုက်ပွဲဖြစ်ပြီးကတည်းက ကျနော်တို့ ရွာအနားမှာ စစ်ကောင်စီတပ်က နေရာယူထားတယ်၊ ရွာသားတွေကို သူတို့နေတဲ့နားမလာဖို့လည်း ပြောထားတယ်၊ စကစတွေ နေတဲ့နေရာက ကျနော်တို့ လယ်ယာသွားတဲ့ လမ်းဖြစ် နေပေမဲ့ ကျနော်တို့လည်း မသွားရဲဘူး၊ ပြီးတော့ အချင်းချင်း လက်နက်ကြီးနဲ့ ချကြလို့ ကျနော်တို့ ရွာနားမှာ လက်နက်ကြီးတစ်လုံးကျသေးတယ်။” ဟု အထက်ပါ အမျိုးသားက ပြောသည်။

ထို့အပြင် မန်ဝိန်းကျေးရွာ နှင့် မနီးမဝေးရှိ တောင်တန်း၌ ကိုးကန့်တပ်ဖွဲ့ MNDAA တို့မှ နေရာယူ လှုပ်ရှားနေလျက် ရှိပြီး နှစ်ဖက်တပ်ဖွဲ့က စစ်ရေးတင်းမာနေလျက်ရှိကြောင်း ဒေသခံများက ပြောသည်။

နိုဝင်ဘာလ ၂ ရက်တွင် ဖြစ်ပွားသည့် တိုက်ပွဲမှ စစ်ကောင်စီဘက် တပ်သားကျဆုံးမှုများ ရှိနေသည့်အတွက် မကျေနပ်ချက်ဖြင့် တိုက်ပွဲပြန်လည် ပြင်းထန်လာမည်ကို ဒေသခံများက စိုးရိမ်နေကြောင်း အထက်ပါ ပုဂ္ဂိုလ်က ဆက်ပြောသည်။

“ပြီးတဲ့ တိုက်ပွဲမှာ စစ်ကောင်စီဘက်က ၃ ယောက် ကျတယ်လို့ သိရတယ်၊ အဲ့လိုတွေကြောင့် စကစက မကျေနပ် ချက် နဲ့ တိုက်ပွဲတွေ ပြန်စမယ်ဆိုရင် တိုက်ပွဲ ပိုပြင်းလာမှာကို ကြောတယ်၊ အခုက စပါးတွေ အိမ်မသယ်ရသေးတဲ့ သူတွေ၊ တောင်ယာ မသိမ်းရသေးတဲ့ သူတွေအများကြီးရှိသေးတယ်၊ တိုက်ပွဲဖြစ်ရင် ဒါတွေက လုပ်မရတော့ စိုးရိမ်ရတယ်။” ဟု အထက်ပါ အမျိုးသားက ပြောသည်။

လက်ရှိအချိန်သည် ဒေသခံများ စပါးရိတ်သိမ်းချိန် နှင့် တောင်ယာမှ ပြောင်း၊ မြေပဲတို့ကို သိမ်းယူနေချိန် ဖြစ်သည့်အတွက် တိုက်ပွဲဖြစ်ပါက ဒေသခံများ သီးနှံဆုံးရှုံးမှုဖြစ်ပေါ်နိုင်ပြီး စားဝတ်နေရေးများကိုလည်း ထိခိုက်နိုင်ကြောင်း သတင်းသိရသည်။

မိုင်းယော်တိုက်နယ်အတွင်းတွင် အာဏာသိမ်း စစ်ကောင်စီအပြင် မြောက်ပိုင်းမဟာမိတ် တပ်ဖွဲ့ဝင်များ၊ ပြည်သူ့စစ်တပ်ဖွဲ့များ နှင့် တိုင်းရင်းသား လက်နက်ကိုင်တပ်ဖွဲ့များ သွားလာလှုပ်ရှားနေလျက်ရှိသည့်အပြင် ထိတွေ့တိုက်ပွဲ မကြာခဏ ဖြစ်ပွားရာလည်း ဖြစ်သည်။

Leave a Comments

- Advertisement -spot_img

Latest article