Friday, December 2, 2022

တရုတ်ပြည်ဝယ်လက်မရှိသဖြင့် ဖရဲသီး စိုက်ပျိုးသူများ အရှုံးပေါ်နေ

Must read

တရုတ်ပြည် ရွှေလီ – ဝမ်တိန်တွင် လော့ဒေါင်း မကြာခဏချထားမှုကြောင့် ဂိတ်ပုံမှန်ဖွင့်လှစ်မရှိခြင်း၊ တရုတ်ပြည်ဘက်မှ ဝယ်လက်များ မရှိသဖြင့် သျှမ်းပြည်ထွက် ဖရဲသီး စိုက်ပျိုးသူများ အရှုံးပေါ်နေကြောင်း စုံစမ်း သိရှိရသည်။

ဖရဲသီး

ပြီးခဲ့သည့် အောက်တိုဘာလထဲတွင် ကိုဗစ် – ၁၉ ရောဂါကူးစက်နှုန်း ပြန်လည်မြင့်တက်လာပြီး Lockdown ကို မကြာခဏ ချထားခြင်းကြောင့် တရုတ်ပြည်ဘက်မှ ဝယ်လက်များ မရှိသဖြင့် ဖရဲသီးများကို ၁ တန်လျှင် တရုတ်ယွမ်ငွေ ၁,၆၀၀ (မြန်မာငွေ ကာလပေါက်စျေး ၄၆၀,၀၀၀ ကျော်) ပေးကာ ဝယ်ယူနေကြောင်း သီပေါမြို့ဒေသခံ ဦးလုံးမောက် က သျှမ်းသံတော်ဆင့် ကိုပြောသည်။

“လွန်ခဲ့တဲ့ ၃ ရက်လောက်က ဝမ်တိန်မှာ ကိုဗစ် ကူးစက်တဲ့သူ ထပ်တွေ့တယ်လို့ ပြောတယ်။ ဒီနေ့ ဒီချိန်ထိ သူတို့က စစ်ဆေးမှုတွေ လုပ်နေတယ်။ မနေ့က ၁ တန်ကို တရုတ်ယွမ်ငွေ ၁,၆၀၀ ထိပဲ ပေးတယ်။ ဂျုတီခတွေ၊ ကားခတွေက ကုန်ကျစရိတ်များတော့ တွက်ချေ မကိုက်တော့ဘူး။ ဝမ်တိန်ဂိတ်ကလည်း သူတို့ပိတ်လိုက်၊ ဖွင့်လိုက် လုပ်နေတယ် ပုံမှန်ကိုမရှိဘူး “ ဟု ၎င်း ဒေသခံ တစ်ဦးက ပြောသည်။

ယခင်က ဖရဲသီးကို ၁ တန်လျှင် တရုတ်ယွမ်ငွေ ၃,၉၀၀ (မြန်မာ ငွေကာလပေါက်စျေး ၁၁သိန်းကျော်) ထိရှိသော်လည်း လက်ရှိတွင် တရုတ်ပြည်ဘက်မှ ကိုဗစ်-၁၉ ရောဂါကို တင်းကြပ်ထားသဖြင့် ဝယ်လက်များမရှိကာ ဖရဲသီးဈေးနှုန်း ကျဆင်းနေကြောင်း သိရသည်။

ထို့အပြင် တရုတ်နယ်စပ် မူဆယ်၊ နမ့်ခမ်း နှင့် ဖရဲသီးစိုက်ပျိုးဒေသ ဖြစ်သည့် သီပေါ၊ ကျောက်မဲ စသည့်ဖြင့် တောင်သူများသည် ပြင်ပမှ ကုမ္ပဏီများ ဝင်ရောက်ဝယ်ယူခြင်း မရှိတော့သဖြင့် လက်ရှိ ခြံအတွင်းရှိ ဖရဲသီးများ ပျက်စီးမည်ကို စိုးရိမ်နေကြောင်း နယ်စပ် တောင်သူ အမျိုးသမီးတစ်ဦးက ပြောသည်။

“ အခု ၃ နှစ်အတွင်းမှာ ဖရဲသီး စိုက်တဲ့သူတွေတော့ အရှုံးပေါ်နေတယ်။ တချို့ကလည်း မျှော်လင့်ချက်ရှိသေးလို့ စိုက်ကြတယ်။ အရင်နှစ်က ကျနော်တို့ သီပေါမြို့နယ်က တောင်သူတွေ သွားရောင်းတယ်။ ဖရဲသီးကတော့ ထွက်နှုန်း ကောင်းပေမယ့် ဝမ်တိန်မှာ ဂိတ်တွေဖွင့်လိုက် ပိတ်လိုက်လုပ်နေတော့ ဖရဲသီးအလုံး ၂၀၀ ကျော် လောက်မှာ ရောင်းမရဘဲ အလကားပျက်စီးသွားတယ်။ ဒီနှစ်လည်း ရောင်းမထွက်ရင် အပြင်မှာ ဈေးပေါပေါ နဲ့ ပုံရောင်းရတော့မယ် “ ဟု ၎င်းအမျိုးသမီးတစ်ဦးက ပြောသည်။

ပြီးခဲ့သည့် အောက်တိုဘာ ၂၆ ရက်တွင် ရွှေလီမြို့နယ် နောင်တောင်းကျေးရွာအုပ်စု၊ စယ်ဆိုင်ကျေးရွာအုပ်စုရှိ ဒေသခံများ နှင့် မြန်မာရွှေ့ပြောင်းအလုပ်သမားများက တရုတ်အစိုးရ ကျန်းမာရေးဌာနမှ ကိုဗစ် – ၁၉ လာရောက် စစ်ဆေးပေးခြင်းကို လက်မခံကြောင်း ဆန္ဒထုတ်ဖော်ကြကြောင်း သိရသည်။

Leave a Comments

- Advertisement -spot_img

Latest article