သျှမ်းပြည်တောင်ပိုင်း ကရင်နီပြည် (ကယားပြည်) နယ်စပ် မိုးဗြဲမြို့ အနီးပတ်ဝန်းကျင်ရှိ တောထဲရောက်ရှိနေသည့် စစ်ဘေးရှောင်များ အချိန်မှီ ရိက္ခာ အကူအညီ မရနိုင်ပါက အစာပြတ်နိုင်မည်ဟု စုံစမ်းသိရှိရသည်။
ပြီးခဲ့သည့် ၂၀၂၁ ခုနှစ် နောက်ပိုင်းမှ စတင်ပြီး မိုးဗြဲမြို့နယ်အတွင်း အာဏာသိမ်း စစ်ကောင်စီတပ်ဖွဲ့ နှင့် ဒေသခံ ပြည်သူ့ ကာကွယ်ရေး ပူးပေါင်းတပ်ဖွဲ့တို့၏ တိုက်ပွဲကြောင့် တောထဲသို့ ထွက်ပြေးတိမ်းရှောင် နေရသည့် ဒေသခံ များသည် ကျေးရွာသို့ ရိက္ခာပြန်ယူနိုင်ခြင်းလည်း မပြုနိုင်သည့်အတွက် စားနပ်ရိက္ခာခက်ခဲနေရကြောင်း စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“အခုဆို ထိတွေ့တိုက်ပွဲတွေ ပြန်များလာပြီး စစ်ကောင်စီဘက်ကလည်း လက်နက်ကြီးတွေ နဲ့ နေ့တိုင်းပစ်နေလို့ ရွာထဲပြန်ပြီး ရိက္ခာယူနိုင်ဖို့က ခက်ခဲတယ်။ လက်နက်ကြီးသံ ငြိမ်သွားမှ ဝင်ရဲတာ၊ တစ်နေ့ကို လက်နက်ကြီး ၄/၅ လုံးလောက် နေ့တိုင်းနီးပါး ပစ်နေတော့ ကြောက်ရတယ်။ ဒါပေမယ့် အခြေအနေကြည့်ပြီး ရိက္ခာယူနိုင်အောင် စွန့်စားရတယ်” ဟု တောထဲရောက်နေသည့် ကုန်းသာကျေးရွာမှ စစ်ရှောင်အမျိုးသားတစ်ဦးက ပြောသည်။
ပြီးခဲ့သည့် စက်တင်ဘာလ နှောင်းပိုင်းမှ စတင်ကာ အာဏာသိမ်း စစ်ကောင်စီတပ်ဖွဲ့ နှင့် ဒေသခံ PDF တို့၏ ထိတွေ့ တိုက်ပွဲ ထပ်မံပြင်းထန်လာခဲ့ပြီးသည့်နောက် ကုန်းသာတောင်ပေါ်တွင် နေရာယူထားသည့် စစ်ကောင်စီ တပ်ဖွဲ့ သည် ကုန်းသာကျေးရွာအုပ်စုအတွင်းသို့ လက်နက်ကြီးဖြင့် နေ့စဥ်နီးပါး ပစ်ခတ်နေကြောင်း သတင်းသိရသည်။
ယင်းကဲ့သို့ လက်နက်ကြီးဖြင့် ပစ်ခတ်မှုများကြောင့် တောထဲသို့ စစ်ရှောင်ရသည့် ပြည်သူများ နေရပ်ပြန် ရိက္ခာယူရန်လည်း ခက်ခဲနေကြောင်း သိရသည်။
“တခါတလေတော့လည်း သေမထူး နေမထူးတော့ဘူးဆိုပြီး လက်နက်ကြီးသံ ငြိမ်တာနဲ့ ရွာထဲကို ပြေးဝင်ပြီး ယူစရာရှိတာယူပြီး ပြန်လာတာ၊ လက်နက်ကြီးက ဘယ်ကနေ ဘယ်အချိန် လာမယ်မှန်းမသိလို့ ထိလို့သေရင်လည်း ကံပေါ့၊ ပြီးခဲ့တဲ့တစ်ပတ်က ရွာပြန်ချိန် ရွာဘေးမှာ ၅ လုံး/ ရွာလယ်မှာ ၂ လုံး လက်နက်ကြီး ကျထားတာ တွေ့ရတယ်” ဟု ကုန်းသာရွာခံ အမျိုးသားက ဆက်ပြောသည်။
လက်ရှိ ကျန်ရှိနေသေးသည့် ရိက္ခာများဖြင့် တစ်ပတ်အတွင်းသာ လုံလောက်နိုင်ချေရှိသည့်အတွက် အချိန်မှီ စားနပ်ရိက္ခာအကူအညီ မရပါက အစာပြတ်နိုင်ကြောင်း စစ်ရှောင်များက ပြောသည်။
မိုးဗြဲမြို့ ကုန်းသာကျေးရွာအုပ်စု အနီးတစ်ဝိုက်ရှိ တောထဲသို့ ရောက်ရှိနေသည့် စစ်ရှောင်လူဦးရေသည် ၅,၀၀၀ နီးပါးရှိကြောင်း သိရသည်။
ပြီးခဲ့သည့် စက်တင်ဘာလ အထိ စစ်ရှောင်ကူညီရေးကော်မတီမှ ထောက်ပံ့သည့် စားနပ် ရိက္ခာများ ရရှိသော်လည်း ထိတွေ့ တိုက်ပွဲထပ်မံဖြစ်လာပြီးသည့်နောက် ဆက်သွယ်ရေး လမ်းကြောင်းခက်ခဲမှုကြောင့် ပြင်ပအကူညီများ မရသည်မှာ တစ်လကျော် ရှိခဲ့ကြောင်း သိရသည်။
Leave a Comments