သျှမ်းပြည် မြောက်ပိုင်း ကွတ်ခိုင်မြို့ အမှတ် (၃) ရပ်ကွက်တွင် ဓားပြတိုက်မှုတစ်ခုဖြစ်ပွားခဲ့ပြီး တရုတ်ငွေ ၂ သိန်း ကျော်နှင့် မြန်မာငွေ သိန်း ၁၀၀ ကျော် အပါအဝင် ရွှေငွေ လက်ဝတ်လက်စားများလည်း ပါသွားကြောင်း သတင်း သိရသည်။
ယမန်နေ့ (နိုဝင်ဘာလ ၁) ရက် မနက် ၇ နာရီဝန်းကျင်တွင် ကွတ်ခိုင်မြို့ အမှတ် (၃) ရပ်ကွက်ရှိ နယ်မြေခံ တရုတ်လူမျိုး မိသားစုတစ်ခုကို အမည်မသိ မျက်နှာဖုံးစွပ် အမျိုးသား ၇ ယောက်က ကားနှင့် ရောက်လာပြီး ဓားပြတိုက် သွားကြောင်း အသက် ၃၀ ကျော် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“မနက်ပိုင်းကလေးတွေ တရုတ်ကျောင်း သွားနေတဲ့အချိန်မှာ အမျိုးသား ၇ ယောက်က ကားတစ်စီးနဲ့ ရောက်လာပြီး အိမ်သားတွေကို စုခိုင်းတယ်။ ပြီးတော့ တရုတ်ယွမ် ၂ သိန်းကျော်၊ မြန်မာငွေ သိန်း ၁၀၀ ကျော်ကို ဓားပြတိုက်ယူသွားတယ်၊ လက်ဝတ်ရတနာတွေရဲ့ တန်ဖိုး လည်းနည်းမှာမဟုတ်ဘူး၊ အိမ်ထဲရှိတဲ့ ပစ္စတိုသေနတ် လည်း ပါသွားတယ်” ဟု အထက်ပါ အမျိုးသမီးက ပြောသည်။
အဆိုပါ ဓားပြတိုက်ခံရသည့် နေအိမ် မိသားစုသည် ဌာနေပြည်သူ့စစ်တပ်ဖွဲ့နှင့်လည်း ဆက်စပ်ပတ်သက် နေကြောင်း ဒေသခံများက ပြောသည်။
ယင်းဓားပြတိုက်မှုဖြစ်ပွားပြီးသည့်နောက်တွင် ရဲများနှင့်တာဝန်ရှိသူများ၊ ပြည်သူ့စစ်များက လာရောက်စစ်ဆေး ပြီး သတင်းပျံ့နှံ့မှု မရှိစေရန် ပြောဆိုသွားကြောင်းလည်း သိရသည်။
“ရဲတွေရော ၊ ပြည်သူ့စစ်တွေရော လာစစ်တယ်၊ ကျူးလွန်သူတွေကို ရှာဖွေဖမ်းဆီးမယ်လို့ ပြောပြီး ပြန်သွား ကြတာ၊ ပြီးတော့ သတင်းတွေလည်း သိပ်မပျံ့စေနဲ့လို့ပြောသွားတယ်တဲ့၊ ဒါကြောင့်အိမ်ရှင်တွေက ဘယ်သူ့ကိုမှ မပြောဘူး၊ အခုထိ ဖြစ်စဥ်အသေးစိတ်ကို မသိရဘူး” ဟု အသက် ၅၀ ဝန်းကျင်ဒေသခံအမျိုးသား တစ်ဦးက ပြောသည်။
ထိုဓားပြတိုက်မှုကြောင့် ဒေသခံပြည်သူများလည်း လုံခြုံရေးအတွက် စိုးရိမ်ပူပန်နေကြပြီး သက်ဆိုင်ရာ တာဝန်ရှိသူများမှ ဖော်ထုတ်ဖမ်းဆီးအရေးယူပေးစေလိုကြောင်း ဒေသခံပြည်သူများက တောင်းဆိုနေကြသည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း နိုင်ငံရေးအခြေအနေ မတည်ငြိမ်မှုကြောင့် မကြာခဏ လုယက်မှု၊ ခိုးမှုများလည်း ရင်ဆိုင်နေရသည့် အတွက် ပြည်သူများက စိုးရိမ်ထိတ်လန့်နေကြကြောင်းလည်း သိရသည်။
