သျှမ်းပြည်မြောက်ပိုင်း မူဆယ်မြို့နယ်အတွင်းသို့လာရောက်နေထိုင်သည့် တခြားဒေသမှ ပြည်သူများခရီးသွားရန်အတွက် ရပ်ကွက်ထောက်ခံစာတောင်းခံရာ တွင် ခက်ခဲရှိနေကြောင်း စုံစမ်းသိရှိရသည်။

မူဆယ်မြို့နယ်ထဲသို့ လွန်ခဲ့သည့် ၂ လမှစပြီး တစ်ခြားမြို့နယ် မှတ်ပုံတင်နံပါတ်ကိုင်ဆောင်ထားသူများက လာရောက်နေထိုင်ပြီး ခရီးထွက်ရန် ရပ်ကွက်ထောက်ခံစာတောင်းခံရာတွင် တစ်ချို့က မရရှိကြောင်း သိရသည်။

“ သူတို့ မြို့ခံမဟုတ်ရင်တော့ ထောက်ခံစာရဖို့က ခက်တယ်။ ကျနော်ဆိုရင် ကျောက်မဲကလူ။ ဒီကိုလာနေတာ နှစ် ၂၀ လောက်တော့ရှိပြီ။ မှတ်ပုံတင်ကတော့ ကျောက်မဲမြို့ပေါ့။ ခရီးထွက်ဖို့ ထောက်ခံစာတောင်းရင် မရဘူး။ တော်တော်ပြောယူပြီးမှ ထောက်ခံစာရတာ။ တစ်ခါတစ်လေဆို မရဘူး” ဟု မူဆယ်မြို့တွင် နေထိုင်သူ ဒေသခံတစ်ဦးက ပြောသည်။

ယခုနှစ် ဧပြီလမှစပြီး ခရီးသွားပြည်သူများ ခရီးသွားပါက မှတ်ပုံတင်ပါရှိရန်ဟု ထုတ်ပြန်ခဲ့ပြီးနောက် ယခုနောက်ပိုင်း ဩဂုတ်၊ စက်တင်ဘာ လမှ စပြီး တွင် ရပ်ကွက်ထောက်ခံစာပါ စစ်ဆေးပြီး တောင်းခံနေကြောင်း မူဆယ်- လာရှိုး ယာဉ်မောင်းထံသိရသည်။

လက်ရှိ မူဆယ်မြို့တွင် ထောက်ခံစာတောင်းခံရန် ခက်ခဲသည့် အကြောင်းအရင်း သည် မြို့ခံမဟုတ်ကြောင်း နှင့် တစ်ခုခုဖြစ်ပါက ရပ်ကွက် အုပ်ချုပ်ရေးမှူးများက တာဝန်ယူရသောကြောင့် ၎င်းတို့ မထုတ်ပေးခြင်းဖြစ်သည်ဟု မူဆယ်မြို့ ဒေသခံတစ်ဦးက ပြောသည်။

“တစ်ခုခုဖြစ်မယ်ဆိုရင် သူတို့ တာဝန်ယူရလို့တဲ့။ အဲ့ကြောင့်မလို့ ကျနော်တို့ တစ်ခြားမြို့က လာနေတဲ့သူဆိုရင် မထုတ်ပေးချင်ဘူး။ လမ်းမှာ ပြသာနာတွေဖြစ်လာရင် သူတို့ မြို့က လူမဟုတ်တော့ တာဝန်မယူချင်ဘူးလို့ပြောတယ်” ဟု ၎င်းက ပြောသည်။

ထိုသို့ ထောက်ခံစာ ရရှိရန်အတွက်လည်း အနည်းဆုံးငွေကြေး ၅,၀၀၀ ပေးရကြောင်း ကိုယ်တိုင် သွားထုတ်ခဲ့သည့် အထက်ပါ သူက ပြောသည်။

အလားတူ မူဆယ်မြို့သို့ ပြောင်းရွှေ့နေထိုင်လာသည့် နယ်ခြားဒေသခံပြည်သူများကို ထောက်ခံစာ ထုတ်ပေးရန် ခက်ခဲကြောင်းလည်း ရပ်ကွက်အုပ်ချုပ်ရေးမှူးတစ်ဦးကလည်း ပြောသည်။

“ကျနော်တို့ ရပ်ကွက်ထဲကဆိုရင် ဘယ်သူမဆိုထုတ်ပေးတယ်။ ငွေကြေးတွေတောင်းခံနေတာမရှိဘူး။ တစ်ချို့ စေတနာရှိသလောက်ပေးတာ။ တစ်ခြားမြို့က လာနေတဲ့သူတွေကိုတော့ ထောက်ခံစာထုတ်ပေးဖို့ခက်တယ်။ တစ်ချို့က စစ်ကိုင်းကလာတာရှိတယ်လေ။ တစ်ခုခုဖြစ်ရင် လည်းကျနော်တို့က တာဝန်ယူရတယ်ဆိုတော့ အဲကြောင့်ထောက်ခံစာရေးပေးရတာခက်တယ်။ ထောက်ခံစာရေးပေးတာတော့ ရေးပေးပါတယ်” ဟု မူဆယ်မြို့ ရပ်ကွက်အုပ်ချုပ်ရေးမှူးတစ်ဦးက ပြောသည်။

လက်ရှိတွင်လည်း ခရီးသွားပြည်သူများကို စစ်ကောင်စီက ပြည်ထောင်စုလမ်းမကြီးပေါ်တွင် မှတ်ပုံတင် နှင့် ရပ်ကွက်ထောက်ခံစာများကို စစ်ဆေးနေပြီး မပါရှိပါက ငွေကြေးတောင်းခံနေကြသည်။