သျှမ်းပြည်မြောက်ပိုင်း လားရှိုးမြို့တွင် အိမ်ခြေမဲ့ နေထိုင်သူများ ယခု အောက်တိုဘာလ အတွင်း ၅ ဦးထက် မနည်း သေဆုံးကြောင်း စုံစမ်းသိရှိရသည်။
စစ်အာဏာသိမ်းပြီး နောက်ပိုင်း လားရှိုးမြို့တွင် လောင်းကစားဝိုင်းများ ပေါများလာခြင်းကြောင့် မူးယစ်ဆေးဝါး သုံးစွဲသူများ၊သူခိုး ဓားပြ များပြားခြင်း၊ အလုပ်လက်မဲ့ဖြစ်ပြီး အိမ်ခြေမဲ့ နေထိုင်သူများလည်း ပေါများလာရာ အစာအာဟာရပြတ်၍ နေစဉ်ဆက်တိုက် သေဆုံးလာနေကြောင်း လားရှိုးဒေသခံတစ်ဦးက သျှမ်းသံတော်ဆင့်ကို ပြောသည်။
“အရင်တုန်း ကတော့ ရှိတယ်ဆိုပေမယ့် အခုလိုတော့ မများဘူး။ စစ်အာဏာသိမ်းပြီးနောက်ပိုင်းမှ အဲ့လိုလူတွေ အရမ်းများလာတယ်။ ဘာကြောင့် သေဆုံးမှုများလည်းဆိုရင် ခုက ဆောင်းဝင်ခါစမှာ အရမ်းအေးလာပြီဆိုတော့ နွေးနွေးထွေးထွေး မနေရတာတွေ ပြီးတော့ အစာအာဟာရ ပြတ်တာတွေ ဖြစ်နိုင်တယ်။ ပြီးခဲ့ပတ်က ရပ်ကွက် ၅ ထဲမှာ ၃ လောင်း တွေ့ရတယ်။ ရပ်ကွက် ၇ မှာက ၂ လောင်း၊ အခုလ ထဲမှာ သေဆုံးမှုကတော့ ဆက်နေတာပဲ“ ဟု ၎င်းက ထပ်လောင်း ပြောသည်။
ထို့အပြင် အိမ်ခြေမဲ့ နေထိုင်သူများအပြင် မူးယစ်ဆေးဝါးသုံးစွဲ၍ ဆေးကြောင်နေသူများလည်း ပေါများလာသဖြင့် ဒေသခံများက လုံခြုံရေးအတွက် စိုးရိမ်နေရကြောင်း လားရှိုးဒေသခံ တစ်ဦး ကပြောသည်။
“မူးယစ်ဆေးဝါး သုံးစွဲတဲ့သူတွေတော့ အရမ်းများတယ်။ ခေတ်ပျက်ကြီးထဲမှာဆိုတော့ ဘယ်သူမှလည်း အရေးမယူဘူး။ ရပ်ကွက်လမ်းတွေမှာ ဖြတ်သွားရင် အရမ်းကြောက်နေရတယ်။ မူးယစ်ဆေးဝါး ကြောင်နေတဲ့သူက ဓားကိုင်ပြီး လျှောက်သွားနေကြတာ“ ဟု ၎င်း ဒေသခံတစ်ဦးက ပြောသည်။
ပြီးခဲ့သည့် အောက်တိုဘာ ၂၅ ရက်တွင် လားရှိုးမြို့ရှိ ရပ်ကွက် (၅) နှင့် (၇) ထဲတွင် အမျိုးသား နှစ်ဦး ဓားဖြင့် ခုတ်ခံရပြီး လားရှိုးမြို့ ပြည်သူ့ဆေးရုံသို့ ဆေးဝါးကုသမှု ခံယူနေရကြောင်း သိရသည်။
သျှမ်းပြည်အတွင်း လားရှိုးမြို့အပြင် တာချီလိတ်၊ မူဆယ်၊ နမ့်ခန်း စသည့် မြို့နယ်များတွင်လည်း အိမ်ခြေမဲ့ နေထိုင်သူများ နေ့စဉ်နီးပါး သေဆုံးမှုများ ရှိနေကြောင်း သိရသည်။
