Sunday, February 5, 2023

ကျိုင်းတုံမြို့တွင်း ဆိုင်ကယ် သူခိုးများတာဝန်ရှိသူ ဖမ်းဆီးပေးခြင်းမရှိ

Must read

သျှမ်းပြည်အရှေ့ပိုင်း ကျိုင်းတုံမြို့တွင်း ဆိုင်ကယ်သူခိုးများပြားလာပြီး သက်ဆိုင်ရာမှ ဖမ်းဆီးနှိမ်နင်းပေးခြင်းမရှိကြောင်း ဒေသခံများထံ စုံစမ်း သိရသည်။

ကျိုင်းတုံမြို့ပေါ် ရပ်ကွက်များတွင် ယခုအောက်တိုဘာလအတွင်း၌ ဆိုင်ကယ် ၅ စီးထက်မနည်း ပျောက်ဆုံး နေလျက်ရှိပြီး ရဲစခန်းသို့ တိုင်ကြားထားသော်လည်း သူခိုးကို ဖမ်းဆီးနိုင်ခြင်း မရှိသေးကြောင်း ဒေသခံများက ပြောသည်။

“ဒီလအတွင်းမှာပဲ ကျနော်တို့ သိရတဲ့ ဆိုင်ကယ်ပျောက်မှုက ၅ စီးရှိနေပြီ၊ ကျနော်တို့ မသိရဘဲ ပျောက်သွားတဲ့ ဆိုင်ကယ်လည်း အများကြီးရှိမှာပဲ၊ ဒီအကြောင်းတွေကို ရဲစခန်းဆီသွားတိုင်လည်း သူခိုးတွေကို မဖမ်းမိသေးဘူး” ဟု ကျိုင်းတုံမြို့မှ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ ဆိုင်ကယ်ပျောက်ဆုံးမှုများကို ရဲစခန်းမှ တာဝန်ယူ ဖြေရှင်းပေးမှု မရှိခြင်း၊ ပျောက်ဆုံးသည့် ဆိုင်ကယ်ပိုင်ရှင် မိသားစုများလည်း ငွေကြေး အခက်အခဲကြောင့် အသစ်မဝယ်နိုင်သဖြင့် သွားရေးလာရေး ခက်ခဲနေကြောင်း သိရသည်။

ဆိုင်ကယ်လာရောက်ခိုးယူသူ

“တချို့ မိသားစုဝင်တွေက ဆိုင်ကယ် တစ်စီးတည်းပဲ ရှိတာကို သူခိုးက လာခိုးသွားသေးတယ်၊ အဲ့လိုဆိုတော့ သူတို့ အတွက် ခက်ခဲတာပေါ့၊ သွားရေး လာရေးကအစ ကလေးကျောင်းကြို/ပို့လည်း မလွယ်ဘူး၊ ဆွေမျိုးတွေ ဆီက ခဏငှားစီးရတာရှိသလို တချို့ မိသားစုကျတော့လည်း တစ်နေ့လုပ် တစ်နေ့စားတွေမို့ အသစ်ကို မဝယ်နိုင် တော့တာတွေ ရှိတယ် ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

ဆိုင်ကယ် လာရောက်ခိုးယူသူသည် အနည်းဆုံး ၂ ဦး မှ ၃ ဦးအထိ ရှိကြောင်း ၊ အိမ်ရှေ့ဝင်း အတွင်း ရပ်ထားသည့် ဆိုင်ကယ်များကို သော့ရိုက်ချိုးပြီး၊ ဝါယာကြိုးဖြုတ်ကာ ခိုးယူလေ့ရှိ ကြောင်း ဒေသခံများက ပြောသည်။

“ခိုးယူခံရတဲ့ ဆိုင်ကယ် အများစုက Wave 110 အမျိုးအစားပါ၊ CCTV မှတ်တမ်းနဲ့ ရဲကို တိုင်တော့လည်း ဘာမှ မလုပ်ပေးဘူး၊ သူခိုးတွေကို မဖမ်းမိရင်တောင်မှ ဆိုင်ကယ်ကို ရအောင် လိုက်ပေးရင်လည်း တမျိုးသက်သာ တယ်လေ၊ အခုက သူခိုးလည်း မမိ၊ ဆိုင်ကယ်ပျောက်တာလည်း မဖော်နိုင် ဆိုတော့ ဆိုင်ကယ်ပျောက်မှုတွေက ဆက်ရှိနေအုံးမှာပဲ” ဟု ၎င်းက ပြောသည်။

ပြည်သူများ၏ ဆိုင်ကယ်ပျောက်ဆုံးမှုကို ရဲစခန်းသို့ တိုင်ကြားသော်လည်း စာရွက်စာတမ်း အချက်အလက်များ၊ မှတ်ပုံတင် နှင့် ယာဥ်လိုင်စင် အပြည့်အစုံတင်ပြပြီးမှသာ ဆောင်ရွက်ပေးမည်ဟု ပြောဆိုပြီး ပျောက်ဆုံးသည့် ဆိုင်ကယ်များကို ဖော်ထုတ်ပေးနိုင်ခြင်း မရှိသည့်အတွက် ကျိုင်းတုံမြို့မ ရဲစခန်းကို ဒေသခံများက ဝေဖန် ပြောဆို နေကြောင်း ကျိုင်းတုံဒေသခံ များက ပြောသည်။

စစ်အာဏာသိမ်းပြီးနောက်ပိုင်း ကျိုင်းတုံမြို့ အပါအဝင် မြန်မာနိုင်ငံ တစ်ဝှမ်းလုံးတွင် သူခိုး၊ ဓါးပြများ ပြားလာပြီး၊ တရားဥပဒေစိုးမိုးမှုလည်း ကင်းမဲ့လာခြင်း၊ အိမ်ဖောက်ထွင်းမှု မကြာခဏ ဖြစ်ပွားလေ့ရှိကြောင်း သိရှိရသည်။

Leave a Comments

- Advertisement -spot_img

Latest article