Thursday, June 20, 2024

စစ်ကောင်စီ၏ ဌာနဆိုင်ရာများထံ ကျပ်သိန်းရာဂဏန်းပေးပြီး လောင်းကစားဝိုင်းဖွင့်လှစ်နေ

Must read

သျှမ်းပြည်မြောက်ပိုင်း သီပေါမြို့ နယ်နှင့် ကျောက်မဲမြို့နယ်အတွင်း ဖွင့်လှစ်သည့် လောင်းကစားဝိုင်းများသည် စစ်ကောင်စီ လက်အောက်ခံ ဌာနဆိုင်ရာများထံ တစ်လ ကျပ်သိန်းပေါင်းများစွာပေးပြီး ဖွင့်လှစ်နေကြသည်ဟု စုံစမ်းသိရှိ ရသည်။

ကျောက်မဲမြို့မှ သီပေါမြို့ အဝင် ပြည်ထောင်စုလမ်းမ ပေါ်ရှိ စံဖိတ်ကျေးရွာအုပ်စု စံဖိတ်ရွာမ တွင်ဖွင့်လှစ် ထားသည့် လောင်းကစားဝိုင်း၊ ကျောက်မဲမြို့နယ် ပိန္နဲကုန်းအုပ်စု ကုန်းသာကျေးရွာ တွင်ဖွင့်သည့် လောင်းကစား ဝိုင်းများသည် စစ်ကောင်စီ လက်အောက်ခံ ဌာနဆိုင်များထံ တစ်လ ကျပ်သိန်း ၁၅၀ ပေးဆောင်ပြီး ဖွင့်လှစ် ထားသည်ဟု ဆိုသည်။

“အကုန်လုံးက အခွန်ဆောင်ပြီး ဖွင်ႉနေကြတာပဲ။ လာပိတ်ပေးဖို့ ကျနော်တို့ သွားတိုင်လည်း ဘာမှလာမပိတ် ပေးဘူး။ ပြောတာတော့ လာလုပ်ပေးမယ်လို့ပြောတယ်။ တကယ်တော့ ဖွင့်ထားတဲ့ နေရာကို လာမပိတ်ဘူး။ သူတို့က အခွန်ရထားတော့ အေးဆေးနေကြတာ” ဟု သီပေါမြို့ ဒေသခံတစ်ဦးက ပြောသည်။

သီပေါမြို့ စံဖိတ်တွင် ဖွင့်လှစ်သည့် လောင်းကစားဝိုင်းသည် ကျောက်မဲမြို့က တရုတ်အမျိုးသား ဉီးအားတီ ဆိုသူဖြစ်ပြီး ကျောက်မဲမြို့မှာ ဖွင့်လှစ်သည့် လောင်းကစားဝိုင်းတွင် တောင်နောက်(ဝ့်) ရွာက ဉီးဝင်းထွန်း ဆိုသူဖြစ် သည် ဟု ဒေသခံများက ပြောသည်။

သျှမ်းပြည်တွင်း လောင်းကစားဝိုင်း

အောက်တိုဘာလ ပထမပတ်အတွင်း သီပေါမြို့တွင် လူကြီးခရီးစဉ်ကြောင့် စံဖိတ်ဘုန်းကြီးကျောင်း လောင်းကစားကို ခေတ္တပိတ်ပြီး စရဖ ရုံးထဲ နှစ်ရက်ကြာ ပြောင်းလှဲ ဖွင့်လှစ်ခဲ့ကြောင်း သိရသည်။

အဆိုပါ လောင်းကစားဝိုင်းကြောင်ႉ ဒေသတွင်း ခိုးဆိုးလုယက်မှု၊ ဓားပြတိုက်မှု၊ ခိုက်ရန်ဖြစ်ပွားမှုများ ယခင်ကထက် ပိုများလာသောကြောင့် ပြည်သူ့ဘဝလုံခြုံရေးအတွက် စိုးရိမ်နေကြောင်း သိရသည်။

“သူခိုးတွေလည်း များလာတယ်။ ပြီးတော့ ဓားပြတွေလည်းရှိလာတယ်လေ။ အဲ့လောင်းကစားဝိုင်းက သူတွေလည်း ရန်တွေဖြစ်ကြတယ်။ ပတ်ဝန်းကျင်ကို ထိခိုက်လာတယ်” – ဟု ကျောက်မဲမြို့ ဒေသခံတစ်ဦးက ပြောသည်။

စစ်တပ်က အာဏာသိမ်းပြီးနောက်ပိုင်း သျှမ်းပြည်မြို့တော် တောင်ကြီးအပါအဝင် မြို့ကြီးများဖြစ်သည့် လားရှိုးမြို့၊ ကျိုင်းတုံမြို့အပြင် နယ်မြို့များလည်း လောင်းကစားဝိုင်းများ နေ့စဉ်ရက်ဆက် တိုးများလာနေသည် ဟု နိုင်ငံရေးလေ့လာသူများက သုံးသပ်ပြောဆိုနေကြသည်။ တချို့လောင်းကစားဝိုင်းများသည် ဒေသအတွင်း လှုပ်ရှားနေသည့် လက်နက်ကိုင်တပ်ဖွဲ့များထံလည်း အခွန်အခ ပေးဆောင်ရသည်ဟုလည်း ဒေသခံများက ပြောဆိုသည်။

Leave a Comments

- Advertisement -spot_img

Latest article