သျှမ်းပြည်မြောက်ပိုင်း လားရှိုးမြို့ ရပ်ကွက် (၆) တွင်းရှိ လောင်းကစားဝိုင်းအတွင်း လာရောက် ဆော့ကစားသူများကို ထမင်းခေါ်ကျွေးနေကြောင်း စုံစမ်း သိရှိရသည်။
အောက်တိုဘာလတွင်းမှ စတင်ပြီး စစ်ကောင်စီ လက်အောက်ခံ မန်နားပြည်သူ့စစ်ခေါင်း ဦးဆောင်ကာ လောင်းကစားဝိုင်းထဲသို့ လာရောက် ဆော့ကစားသူများတိုင်း အိမ်ပြန်စရာမလိုရန် ဒိုင်မှ ထမင်းခေါ်ကျွေးနေကြောင်း လားရှိုးမြို့ဒေသခံ တစ်ဦးက သျှမ်းသံတော်ဆင့်ကို ပြောသည်။
“လောင်းကစားဝိုင်းမှာ လာဆော့တဲ့သူ နဲ့ မဆော့ပဲ အဲ့မှာ အကြာကြီး နေနေရင်တော့ စားချင်ရင်ပြောလိုက် ကျွေးတယ်။ ရိုးရိုးရှင်းရှင်းပဲ ဆော့နေရင်း ထမင်းကြော်၊ ကြက်၊ ဝက်ဟင်းနဲ့ ပန်းကန်ထဲထည့်လာပေးပြီး လာပေးတယ်။ ဘယ်နှစ်နပ် ကျွေးတယ်ဆိုတာ မရှိဘူး၊ ဆာတဲ့ အချိန်စားလို့ရတယ်။ သူတို့က ခြံနဲ့ဝင်းနဲ့အစောင့်တွေနဲ့ ဖွင့်တာပါ။ အဲ့ထဲမှာ ဓာတ်ပုံရိုက်ခွင့်မရှိဘူး CCTV တပ်ထားတယ် “ ဟု ၎င်း ဒေသခံတစ်ဦးက ပြောသည်။
လောင်းကစားဝိုင်းထဲတွင် ဖဲဝိုင်း နှင့် ကြက်ဝိုင်းများ ရှိပြီး လာရောက် ဆော့ကစားသူများလည်း စည်ကားနေလျက်ရှိကြောင်း ၎င်းက ဆက်ပြောသည်။
“အရင်ကလည်း ကျွေးရင် ကျွေးမှာပေ့ါနော်။ ကျနော်တို့ မသိရဘူး။ ခုက ထမင်းကျွေးတယ်လို့ နာမည်ကြီးပြီး လာရောက် ဆော့ကစားတဲ့သူတွေ စည်မှ စည်ပဲ” ဟု လားရှိုးမြို့ ဒေသခံ အမျိုးသား တစ်ဦးကပြောသည်။
ထို့အပြင် လားရှိုးမြို့တွင် လောင်းကစားဝိုင်းများ ပေါများလာခြင်းကြောင့် ခိုးယူလုယက်မှုများ၊ မူးယစ်ဆေးဝါး သုံးစွဲသူများလာပြီး ဒေသခံများက လုံခြုံရေးအတွက် စိုးရိမ်နေရကြောင်း သိရသည်။
“အရင်က ဒီလောင်းကစားဝိုင်း ပိတ်သွားပြီ၊ အခုမှ ပြန်ပြီးစဖွင့်လာတာ။ ခုတော့ ဘယ်သူမှ မတိုင်ရဲ၊ မပြောရဲပဲ ပိုပြီးပွင့်လင်းလာတဲ့ သဘောပါ။ ခိုးဆိုးလုနှိုက်တွေပါမယ်၊ မူးယစ်ဆေးဝါး သုံးတဲ့သူတွေပေါလာတယ်။ အဲ့သူတွေက လူသတ်ဖို့ ဝန်မလေးဘူး။ လောင်းကစားဝိုင်း ထမင်းခေါ်ကျွေးတယ်ဆိုတော့ ပိုဆိုးလာတော့မှာပေါ့။ “ ဟု ၎င်း ဒေသခံတစ်ဦးက ထပ်လောင်းပြောသည်။
ထို့အပြင် စစ်အာဏာသိမ်းပြီး ၂ နှစ်ကာလ နီးပါးအချိန်တွင် လားရှိုးမြို့ အပါအဝင် သျှမ်းပြည်တစ်ပြည်လုံးရှိ မြို့နယ်အလိုက် လောင်းကစားဝိုင်းများ ပေါများလာခြင်းကြောင့် အိမ်ထောင်ရေး ပြိုကွဲခြင်း၊ သူခိုး၊ ဓားပြ ပေါများလာခြင်း လူသတ်သည့် အဆင့်ထိ ဖြစ်ပေါ်လာကြောင်း ဒေသခံများကဆိုသည်။
