သျှမ်းပြည်မြောက်ပိုင်း ကျောက်မဲမြို့နယ် နမ့်မန်းကျေးရွာအနီးရှိ စစ်ဘေးရှောင်များ စျေးသွားရောင်းစဥ် လမ်းတစ်ဝက် အရောက်တွင် ရဲယောင်ဆောင်သည့် လူတစ်စုက ငွေကြေးလိမ်လည် တောင်းခံခဲ့ကြောင်း စုံစမ်းသိရသည်။

ပြီးခဲ့သည့် အောက်တိုဘာ ၂၁ ရက်၊ နံနက် ၂ နာရီ ဝန်းကျင်အချိန်တွင် နမ့်မန်းရွာမှ စစ်ဘေးရှောင် ရွာသား ၄ ဦး တို့သည် ဟင်းသီးဟင်းရွက်များ ရောင်းရန်အတွက် ဘူတာဈေးသို့ သွားနေစဥ် လူတစ်စုမှ ရဲယောင်ဆောင်ပြီး ငွေကြေး ခြိမ်းခြောက်တောင်းခံနေကြောင်း နမ့်မန်းရွာမှ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့ တောထဲကနေ ရှာလာတဲ့ ဟင်းသီးဟင်းရွက်တွေ၊ မျှစ်တွေကို ဘူတာဈေးမှာ ရောင်းဖို့ သွားတဲ့အချိန် လမ်း တစ်ဝက်မှာ အသက် (၁၇) နှစ် (၁၈) နှစ်လောက်ရှိတဲ့ လူငယ်တွေပါတဲ့ အမျိုးသားတစ်စုက လမ်းကို ပိတ်တားပြီး ပိုက်ဆံတောင်းတာ၊ သူတို့က ရဲတွေဖြစ်တယ်ဆိုပြီး ရဲ ဝတ်စုံလည်း မဝတ်ဘူး။ သူတို့ လက်ထဲမှာ ဓားတွေပဲ ရှိ တယ်။ သေနတ်တော့ မတွေ့ရဘူး။ သူတို့ကို တစ်ယောက် ၂ သောင်းပေးမှ လွတ်ပေးမယ် ဆိုပြီး ပြောပေမယ့် သူတို့က မရှိတော့ တစ်ယောက် ၂ ထောင်ပေးခဲ့ လိုက်ရတယ်” ဟု အထက်ပါ အမျိုးသားက ပြောသည်။

နမ့်မန်း စစ်ရှောင်များဖြစ်ကြသော အမျိုးသား ၂ ဦး နှင့် အမျိုးသမီး ၂ ဦး ဆိုင်ကယ် နှစ်စီးဖြင့် ဘူတာဈေးသို့ သွားနေစဥ် မျက်နှာဖုံးစွပ် အမျိုးသား လူငယ် (၈) ဦးခန့် ဓါးထုတ်ပြပြီး ရဲများဖြစ်သည်ဟု ဆိုကာ ပိုက်ဆံ တောင်းခြင်း ဖြစ်ကြောင်း ဒေသခံများက ပြောသည်။

“စစ်ရှောင်တွေက မျှစ်တွေရှာပြီး ဈေးကိုသွားရောင်းကြတာ၊ အစောကြီး မသွားရင် လာဝယ်တဲ့ ဈေးသည်တွေနဲ့ မတွေ့မှာဆိုးလို့ အဲ့လို မနက် ၂ နာရီလောက်မှာ သွားရတာဖြစ်တယ်၊ ဒီ လမ်းကိုပဲ သုံးပြီးသွားနေကြပဲ၊ ဒီလိုမျိုး တော့ ဒါ ပထမဆုံးအကြိမ် ကြုံရတာဖြစ်တယ်၊ အဲ့ကြောင့် အခုဆို စစ်ရှောင်တွေကလည်း ဈေးကို မသွားရဲတော့ ဘူး” ဟု ၎င်းက ပြောသည်။

နမ့်မန်းစစ်ရှောင်များသည် မိသားစု စားဝတ်နေရေးအတွက် တောထဲသို့ ဟင်းသီးဟင်းရွက်များ ရှာဖွေပြီး ဘူတာ ဈေးသို့ သွားရောက် ရောင်းချလေ့ရှိသော်လည်း ယခုလို ဖြစ်စဥ်မျိုးသည် ပထမဆုံးအကြိမ် ကြုံတွေ့ရခြင်း ဖြစ်ကြောင်း အထက်ပါ ပုဂ္ဂိုလ်က ဆက်ပြောသည်။

စစ်ရှောင်များထံမှ ငွေကြေးခြိမ်းခြောက် တောင်းယူသည့် လူတစ်စုသည် နောက်တကြိမ်လျှင် လွတ်မည်မဟုတ် ကြောင်း ပြောဆိုခြိမ်းခြောက်ထားသဖြင့် စစ်ရှောင်များလည်း ဟင်းရွက်ရှာဖွေ ရောင်းချခြင်းကို မသွားရဲတော့ ကြောင်း သတင်းသိရသည်။

ယင်းကဲ့သို့ ဟင်းသီးဟင်းရွက်များ ရောင်းချခြင်းများ မပြုလုပ်နိုင်သည့်အတွက် စစ်ရှောင်များ၏ ဝင်ငွေများလည်း ထိခိုက်လာနိုင်ကြောင်း နမ့်မန်းဒေသခံများက ပြောသည်။

ပြီးခဲ့သည့် ၂၀၂၁ ခုနှစ်တွင် သျှမ်းပြည်မြောက်ပိုင်း ကျောက်မဲမြို့နယ်အတွင်း တိုင်းရင်းသား လက်နက်ကိုင် တိုက်ပွဲကြောင့် ဒေသခံများ ထွက်ပြေးတိမ်းရှောင်ခဲ့ရပြီး လက်ရှိချိန်ထိ နေရပ်သို့ မပြန်နိုင်သေးပဲ စစ်ဘေးရှောင် စခန်းတွင်နေထိုင်ရင်း ကြုံရာ ကျပန်းအလုပ်များဖြင့် နေ့စားလိုက်နေရကြောင်း သိရှိရသည်။