သျှမ်းပြည်မြောက်ပိုင်း နမ့်ခမ်းမြို့နယ် မိုင်းဝီးဒေသခံများကို မြို့တက်ပြီး စပါးမရောင်းရန် လက်နက်ကိုင်တပ်ဖွဲ့မှ တားဆီးနေကြောင်း စုံစမ်းသိရှိရပါသည်။

ယခု အောက်တိုဘာလသည် စပါးရိတ်သိမ်းချိန်ဖြစ်ပြီး မိုင်းဝီးပြည်သူများ စပါးစိုက်ချိန်တွင် ချေးယူထားသည့် အရင်းအနှီးငွေကြေးများကို ပြန်ဆပ်ရမည် အချိန်ဖြစ်နေကြောင်း မိုင်းဝီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လက်ရှိ အချိန်က တောင်သူလယ်သမားတွေ ကောက်စိုက်စရိတ်တို့ လယ်ထွန်စရိတ်တို့ တခြားချေးငွေတွေကို ပြန်ဆပ်ဖို့ ငွေလိုနေတဲ့ အချိန်ဖြစ်တယ်။ ဒါပေမယ့် TNLA တပ်ဖွဲ့က ရွာသားတွေ မြို့တက်စပါးမရောင်းဖို့ တားမြစ်ထားတယ်။ အကြွေးရှင်ဘက်လည်း ပိုက်ဆံလာတောင်းနေကြပြီ။ စပါးတွေ မရောင်းရပဲ ဘယ်လို အကြွေးဆပ်နိုင်မလဲ။ အားလုံးကလည်း အဖက်ဖက်က ခက်ခဲနေကြရတယ်” ဟု ဒေသခံအမျိုးသားတစ်ဦး ကပြောသည်။

လက်ရှိ မိုင်းဝီးဒေသခံပြည်သူများ လယ်ယာရိတ်သိမ်းပြီး အိမ်သို့ စပါးသီးနှံများ ရောက်ရှိလာသော်လည်း TNLA တပ်ဖွဲ့ မှ ယင်းစပါးသီးနှံများကို မြို့သို့ သယ်ဆောင်ရောင်းချခြင်းမပြုရန် တားမြစ်ထားသည့်အတွက် အကြွေးကို မဆပ်နိုင်ကြသေးကြောင်း ဒေသခံအမျိုးသားတစ်ဦးက ပြောသည်။

၎င်းကိစ္စရပ် နှင့် ပတ်သက်ပြီး သျှမ်းသံတော်ဆင့်မှ TNLA တပ်ဖွဲ့ကို ဆက်သွယ်မေးမြန်းပေမယ့် ဖုန်းလက်ခံ ဖြေကြားခဲ့ခြင်း မရှိပေ။

ထို့အပြင် အကြွေးရှင်များဘက်မှလည်း ချေးငွေယူထားသည့် တောင်သူများထံ ငွေကြေးလက်ခံရရှိမှု မရှိသည့်အတွက် အကြွေးရှင်ဘက်မှလည်း တောင်းဆိုနေကြကြောင်း မိုင်းဝီးဒေသခံတစ်ဦးက သျှမ်းသံတော်ဆင့်ကိုပြောသည်။

“အကြွေးရှင်တွေ ဘက်ကတော့ ငွေရဖို့လိုတဲ့သူတွေထံ အချိန်ရောက်လာပြီလေ၊ သူတို့လည်း လိုချင်ကြမှာပဲ၊ ဒါပေမယ့် ရွာသားတွေဘက်ကလည်း ဒီစပါးသီးနှံတွေ မရောင်းနိုင်ရင် ဘယ်က ပိုက်ဆံနဲ့ အကြွေးဆပ်ရမလဲ၊ ဒါကြောင့် ကျနော်တို့ ဒေသခံ ပြည်သူတွေအနေနဲ့ ကောက်ပဲသီးနှံတွေ ဝယ်ယူရောင်းချမှုကို အရင်လို လွတ်လွတ်လပ်လပ် လုပ်ခွင့်ရချင်ပါတယ်” ဟု အထက်ပါ ပုဂ္ဂိုလ်က ဆက်ပြောသည်။

လက်ရှိအချိန်သည် ကုန်ပစ္စည်းဈေးနှုန်းများလည်း တစ်နေ့ထက်တစ်နေ့ မြှင့်တက်လာပြီး လယ်သမားများ နှင့် သီးနှံစပါးများရုတ်သိမ်းချိန်က လုပ်သားများ၏ လုပ်အားခကိုလည်း စပါးသာ မရောင်းချနိုင်သေးသရွေ့ ပေးချေရန် ငွေကြေးမရှိကြောင်း ဒေသခံများကပြောသည်။

မိုင်းဝီးဒေသသည် နမ့်ခမ်းမြို့နယ်အတွင်း တည်ရှိနေပြီး တအာင်း(ပလောင်) အမျိုးသားလွတ်မြောက်ရေး တပ်မတော် (TNLA)၊ ကချင်လွတ်မြောက်ရေး တပ်မတော် (KIA)၊ ကိုးကန့်တပ်မတော် (MNDAA) နှင့် အာဏာသိမ်း စစ်ကောင်စီ တပ်ဖွဲ့တို့မှ လှုပ်ရှားနေကြောင်း သတင်းသိရှိပါသည်။