သျှမ်းပြည်တောင်ပိုင်း ဟိုပုံးမြို့နယ် ပန်လုံကျေးရွာသစ်ရှိ စစ်ရှောင် ၅၀၀ ကျော်သည် စားနပ်ရိက္ခာ နှင့် တဲဆောက်ရန်အတွက် အမိုးအကာများ လိုအပ်နေကြောင်း စုံစမ်းသိရှိရသည်။
ယခု အောက်တိုဘာလမှ စတင်ပြီး သျှမ်းပြည်တွင်း ရာသီဉတု ပြောင်းလဲလာမှုကြောင့် အသက် ၃၀ ကျော် အရွယ် စစ်ရှောင်များ နှင့် (၁၈) နှစ်အောက် ကလေးငယ်များက အအေးမိ ဖျားနာနေကြပြီး စားနပ်ရိက္ခာ ဆန်၊ ဆီ၊ ဆား နှင့် ဟင်းသီးဟင်းရွက်များ အရေးပေါ် အကူအညီ လိုအပ်နေကြောင်း စစ်ရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အခုက ရာသီဉတု အပြောင်းအလဲမှုကြောင့် မနက်ခင်း နဲ့ ညနေခင်းမှာ အရမ်းအေးလာတယ်။ နေ့ဘက်တော့ နေအရမ်း ပူတယ်။ နေ့ဘက်မှာတော့ အလုပ်လုပ်နိုင်ပြီး ညဘက်ရောက်ရင် ကိုယ်လက် ကိုက်ခဲပြီး ဖျားကြတာ။ စားဖို့ သောက်ဖို့က ဟင်းတွေ မရှိဘူး၊ အလှူရှင်တွေ ပေးထားတဲ့ ကုလားပဲလေးဘဲ ရှိတယ် “ ဟု ၎င်း ဒေသခံ တစ်ဦးက ပြောသည်။
လက်ရှိတွင် တောင်ကြီးမြို့နယ် နမ့်ခုံး ပရဟိတ လူမှုကူညီရေးအသင်းက ဖျားနာနေသည့် စစ်ရှောင်များကို သွားရောက်ကြည့်ရှုပြီး ဆေးဝါးကုသပေးနေကြောင်း သိရသည်။
အလားတူ စစ်ရှောင်များနေထိုင်သည့် တဲအိမ်သည် မိုးကာများဖြင့်သာ ထရံကာ ထားရသောကြောင့် ညဘက်တွင် လေစိမ်းတိုက်ခတ်သဖြင့် ဖျားနာသူများအတွက် အခက်အခဲ ဖြစ်စေကြောင်း စစ်ရှောင်ကူညီသူ တစ်ဦးက သျှမ်းသံတော်ဆင့်ကို ပြောသည်။
“ အခု စစ်ရှောင်တွေ နေဖို့ တဲအိမ် တော်တော်များများ ဆောက်ထားတယ်။ အမိုးအကာတွေတော့ လိုအပ် နေသေးတယ်။ အရင်ဆောက်ထားတဲ့ တဲအိမ်တွေက မိုးကာ နဲ့ ထရံထားတော့ ညဘက် လေစိမ်းတိုက်ရင် မလုံဘူး။ ဖျားနာတဲ့ သူဆို ပိုဒုက္ခရောက်တယ်။ အနွေးထည်၊ စောင်တွေက အလှူရှင် တချို့လာပေးတာ တွေရှိတယ် “ ဟု ၎င်းကပြောသည်။
ထို့အပြင် ဟိုပုံးမြို့နယ် ပန်လုံကျေးရွာသစ်ရှိ စစ်ရှောင်ဦးရေမှာ (၅၃၆) ဦး၊ အိမ်ထောင်စုဝင် အိမ်ခြေမှာ (၁၉၆) အိမ် နှင့် ကိုယ်ဝန်သည် အမျိုးသမီး (၃) ဦး ရှိပြီး ကျောက်မဲမြို့နယ် ဟူးစွန်ကျေးရွာမှ စစ်ရှောင်လာသော စစ်ရှောင်များဖြစ်ကြောင်း သိရသည်။
