သျှမ်းပြည်မြောက်ပိုင်း မူဆယ်မြို့နယ်အတွင်း စစ်ကောင်စီ တပ်ရင်းမှူး တစ်ဦး သေနတ်ဖြင့် ပစ်ခတ်ခံရပြီးနောက် မူဆယ်မြို့နယ်တွင်း လုံခြုံရေး အင်အား ပိုမိုတင်းကြပ်လာကြောင်း ဒေသတွင်း ကားသမားများထံမှ စုံစမ်း သိရှိရသည်။

မူဆယ် ၁၀၅ မိုင် စစ်ဆေးရေးဂိတ် မှ စတင်ပြီး မူဆယ်မြို့ ဝင်နားအထိ စစ်ကောင်စီ တပ်သား နှင့် ရဲတို့ စောင့်ကြပ် စစ်ဆေးနေသည့် စစ်ဆေးရေးဂိတ် ၃ နေရာရှိနေပြီး ခရီးသွား ယာဥ်များကို တင်းကြပ်စွာ စစ်ဆေးနေကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“သူတို့ တပ်ရင်းမှူး ပစ်ခတ်ခံရပြီးကတည်း လုံခြုံရေး အင်အားပိုတင်းကြပ်လာတယ်၊ ၁၀၅ မိုင်ကနေ မူဆယ်မြို့ အဝင်နားထိ စစ်ဆေးတဲ့ နေရာ ၃ နေရာရှိပြီးတော့ ကားတွေဆို အောက်ပိုင်းထိ အကုန်စစ်တယ်၊ မှတ်ပုံတင်တွေပါ ပြရတယ်၊ တခါတလေလည်း ပိုက်ဆံတောင်းတယ်၊ တောင်းတဲ့ ပမာဏတော့ တခါ နဲ့ တခါမတူဘူး” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

ပြီးခဲ့သည့် အောက်တိုဘာလ ၁၈ ရက်နေ့ မွန်းလွဲပိုင်းတွင် ၁၀၅ မိုင်ရှိ ကားဝပ်ရှော့ဆိုင်တစ်ခုသို့ ကားလာပြင် သည့် မူဆယ်မြို့ ၄၂၁ ခြေလျင် တပ်ရင်း တပ်ရင်းမှူး ဒု – ဗိုလ်မှူးကြီး ပြည့်ဖြိုးအောင်ကို အမည်မသိ လက်နက်ကိုင် လူနှစ်ဦး က သေနတ်ဖြင့် ၈ ချက်ထက်မနည်း လာရောက် ပစ်သတ်ခဲ့ပြီးနောက် စစ်ဆေးမှု တင်းကြပ်လာခြင်းဖြစ်ကြောင်း မူဆယ်ဒေသခံ အမျိုးသား တစ်ဦးက ပြောသည်။

ယခုလ အောက်တိုဘာလအတွင်း မူဆယ်မြို့နယ်ရှိ စစ်ကောင်စီ တပ်ရင်းမှူးများကို အခြားဒေသသို့ ပြောင်းရွှေ့ခြင်း ရှိသည့်အပြင် မူဆယ်မြို့သို့ ပြောင်းရွှေ့လာသည့် တပ်ရင်းမှူးက မူဆယ်မြို့နယ်အတွင်းရှိ ပြည်သူ့စစ်အင်အား နှင့် လက်နက်စာရင်းများကို တောင်းယူထားကြောင်း သိရသည်။

“မူဆယ်မြို့ကို ပြောင်းလာတဲ့ တပ်ရင်းမှူး အသစ်က ပိုကြမ်းလောက်တယ်၊ အခုဆို မြို့ထဲက ဘဏ်တွေ ဆေးရုံ တွေမှာ လုံခြုံရေး အင်အားရော စစ်ဆေးမှုရော တိုးချဲ့ ချထားတယ်၊ မူဆယ်မြို့ထဲက ပြည်သူ့စစ် အင်အား နဲ့ လက်နက်လည်း သူ့ဆီ အစီရင်ခံဖို့ ပြောထားတယ်၊ ညမထွက်ရ အမိန့်ကိုလည်း ထပ်ကြေညာထားတယ်” ဟု ၁၀၅ မိုင်တွင် နေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် အာဏာသိမ်း စစ်ကောင်စီတပ်ဖွဲ့သည် ၁၀၅ မိုင် ကုန်သွယ်ရေးဇုန်အတွင်း နေထိုင်သည့် ပြည်သူများကို ည ၈ နာရီ မှ မနက် ၄ နာရီအထိ ညမထွက်ရ ကာဖျူးအမိန့်ကို ယမန်နေ့ အောက်တိုဘာ (၁၉) ရက် ညအချိန်တွင် ထပ်မံကြေညာလိုက်ကြောင်း အထက်ပါ အမျိုးသားက ဆက်ပြောသည်။

ထို့အပြင် မူဆယ်မြို့ရှိ ပြည်သူ့ဆေးရုံ နှင့် ကမ္ဘောဇဘဏ်တို့တွင်လည်း ကားလမ်းများ ပိတ်ရသည်အထိ စစ်ဆေးမှုများ တင်းကြပ်စွာ လုပ်ဆောင်နေကြောင်း သိရသည်။

မူဆယ်မြို့နယ် ၁၀၅ မိုင် စီးပွားရေးဇုံနယ်မြေတွင် စစ်ကောင်စီ ၏ တပ်မ (၉၉) လက်အောက် ခမရ (၄၂၁) တပ်ရင်းမှူး ဒု-ဗိုလ်မှူးကြီး ပြည့်ဖြိုးအောင်နှင့်အတူ အရာရှိ တစ်ဦးအား ရှမ်းပြည်နယ်မြောက်ပိုင်း ပြည်သူ့လုံခြုံရေး နှင့် ကာကွယ်ရေးတပ်ဖွဲ့ က တိုက်ခိုက်ခဲ့ကြောင်း ယမန်နေ့ (အောက်တိုဘာ ၁၉) ရက်တွင် ကြေညာချက် ထုတ်ပြန်ခဲ့သည်။

ထို့ပြင် စကစ တပ်ဖွဲ့၊ ပသစ တပ်ဖွဲ့များနှင့် N-CDM ဌာနဆိုင်ရာ ဝန်ထမ်းများအားလုံး ဆက်လက်တိုက်ခိုက် အရေးယူဆောင်ရွက်သွားမည်ဖြစ်ကြောင်း နှင့် N-CDM ဌာနဆိုင်ရာ ဝန်ထမ်းများက ပြည်သူ့ အကျိုးပြု လုပ်ငန်းမှလွဲ၍ ကျန်ဌာနဆိုင်ရာမှ ဌာနလုပ်ငန်း ရပ်ဆိုင်းနုတ်ထွက်ကြရန် ပြည်သူ့လုံခြုံရေးနှင့် ကာကွယ်ရေးတပ်ဖွဲ့ က ထပ်မံသတိပေး ထုတ်ပြန်လိုက်သည်။