သျှမ်းပြည်မြောက်ပိုင်း မူဆယ်မြို့ ဈေးရပ်ကွက်တွင်းရှိ စားသောက်ဆိုင် တစ်ဆိုင်တွင် လူငယ် ၂ ဦး ဈေးဝယ်ယောင်ဆောင်ပြီး လက်ကိုင်ဖုန်း ဝင်ခိုးခဲ့ကြောင်း စုံစမ်းသိရှိရသည်။
ယနေ့ အောက်တိုဘာ ၁၉ ရက် နံနက် ၅ နာရီခွဲ ဝန်းကျင်တွင် အမျိုးသား လူငယ် (၂) ဦး လူသူ မရှိချိန် စျေးဝယ်ယောင်ဆောင်ပြီး ဖုန်းဝင်ခိုးခဲ့ရာ အိမ်ရှင်က ဖမ်းဆီးရမိခဲ့ကြောင်း စုံစမ်း သိရှိရသည်။
“မနက်အစောကြီး ခေါက်ဆွဲဝယ်မယ်ဆိုပြီး ဝင်လာတာ။ မရှိဘူးလို့ ပြောလိုက်တယ်။ အဲ့တာ နဲ့ သူက ကောင်တာနားက ဖုန်းကို လာဖြုတ်တာ။ ကျနော်တွေ့လိုက်တော့ တုတ် နဲ့ ဝင်ရိုက်လိုက်တယ်။ အသက်က ငယ်သေးတယ်။ ၁၈ နှစ် ၁၉ နှစ် လောက်ပဲရှိသေးတယ်” ဟု ဖောက်ခံရသည့် အိမ်ရှင်က ပြောသည်။
အဆိုပါ အမျိုးသား ၂ ဦးသည် ဆိုင်ကယ်ဖြင့် ရောက်ရှိလာပြီး တစ်ဦးက ဆိုင်အပြင်ဘက်ရှိ ဆိုင်ကယ်ပေါ် ထိုင်စောင့် နေကြောင်း သိရသည်။
လူငယ်များ ယခုလို ခိုးယူလာမှုကြောင့် တစ်ချို့မိဘ က သား/သမီး ရှေ့ရေး အတွက် ရင်လေးမိကြောင်း အသက် ၅၀ အရွယ် အမျိုးသမီး ကပြောသည်။
“အခုက တော်တော်ဆိုးလာပြီ။ လူငယ်တွေလည်း ခိုးတက်လာတယ်။ ပိုပြီးတော့ ကြောက်ရတယ်။ ဒီနေ့ဆိုရင် လာခိုးတဲ့သူက ငယ်ငယ်လေးပဲရှိတယ်။ နောင်ကျရင် လူငယ်တွေ ပျက်စီးသွားမှာကို စိုးရိမ်မိတယ်။ လူငယ်တွေလည်း တဖြည်းဖြည်း နဲ့ ပျက်စီးလာပြီ” ဟု ၎င်းက ပြောသည်။
ပြီးခဲ့သည့် အောက်တိုဘာ ၁၇ ရက်နေ့တွင်လည်း မူဆယ်မြို့ရှိ အမျိုးသမီး ၂ ဦး လမ်းမကြီးပေါ် စကားပြောနေချိန်တွင် ဖုန်းလုယက် ခံခဲ့ရကြောင်း သိရသည်။
စစ်တပ် အာဏာသိမ်းပြီးနောက်ပိုင်း နိုင်ငံရေး နှင့် စီးပွားရေး ကျဆင်းလာမှုကြောင့် သျှမ်းပြည်အတွင်း သူခိုး၊ ဓားပြ ပေါများလာသော်လည်း သက်ဆိုင်ရာ တာဝန်ရှိသူများက အရေးယူဆောင်ရွက်ပေးမှု မရှိပေ။
