Sunday, May 26, 2024

နောင်ချိုမြို့နယ် စစ်ကောင်စီ နှင့် TNLA စစ်အင်အားဖြည့်နေ

Must read

သျှမ်းပြည်မြောက်ပိုင်း နောင်ချိုမြို့နယ်အတွင်း စစ်ကောင်စီတပ်ဖွဲ့ နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့သည် စစ်အင်အား အပြိုင်ဖြည့်တင်းမှုကြောင့် ထိတွေ့တိုက်ပွဲ ဖြစ်ပွားမည်ကို ဒေသခံများ စိုးရိမ်နေကြောင်း စုံစမ်းသိရှိရသည်။

ယခု အောက်တိုဘာလအတွင်းတွင် အာဏာသိမ်း စစ်ကောင်စီတပ်ဖွဲ့ တပ်အမှတ် ၁၁၄ နှင့် ၁၁၅ တို့သည် စစ်အင်အား ၃၀ ကျော် နှင့် TNLA တပ်ဖွဲ့တို့သည် နောင်ချိုမြို့ နှင့် မိုင် ၂၀ ခန့်ကွာဝေးသည့် စီခူကျေးရွာအနီး ရောက်ရှိနေကြောင်း ဒေသခံများက ပြောသည်။

“ဒီ နှစ်ဖွဲ့က စီခူရွာဘက်ကို ဝင်လာတာ ၄ ရက် ၅ ရက်လောက်တော့ ရှိနေပြီ၊ သူတို့သာ အချင်းချင်း တစ်ဖက်ကို တစ်ဖက် တင်းမာမယ်ဆိုရင်တော့ ပစ်ခတ်သံတွေ ထွက်လာမှာတော့ အမှန်ပဲ၊ အဲ့လိုဖြစ်မှာတော့ စိုးရိမ်ရတာပေါ့၊ အခုချိန်က ယာခင်းတွေ လယ်တွေ ရုတ်သိမ်းရတဲ့ အချိန်ဖြစ်နေတော့ သူတို့ ထိတွေ့မှု မဖြစ်အောင်ပဲ မျှော်လင့်တယ်” ဟု နောင်ချို ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့

နောင်ချိုဒေသအတွင်းတွင် ပြည်သူ့ကာကွယ်ရေးတပ်ဖွဲ့ PDF တို့၏ လှုပ်ရှားမှုများလည်း ရှိနေသည့် အတွက် လက်နက်ကိုင်တပ်ဖွဲ့များ သွားလာမှု နယ်ကျွံပါက ထိတွေ့ တိုက်ပွဲဖြစ်နိုင်ကြောင်း ဒေသခံများက စိုးရိမ်နေကြသည်။

“စစ်ကောင်စီတွေက ကားလမ်းမကြီး တစ်လျှောက် လှုပ်ရှားမှုတွေ ရှိနေတယ်၊ TNLA နဲ့ PDF ကြားတော့ တောထဲမှာ လှုပ်ရှားနေတယ်၊ ဒါကြောင့် စစ်ကောင်စီက တောထဲဝင်သွားရင် ထိတွေ့ရမှာပဲ” ဟု အထက်ပါ ပုဂ္ဂိုလ်က ပြောသည်။

ပြီးခဲ့သည့် သြဂုတ်လမှ စတင်ပြီး နောင်ချိုမြို့နယ်တွင်း စစ်ကောင်စီတပ်ဖွဲ့ နှင့် မန္တလေး PDF တို့ တိုက်ပွဲဖြစ်ပွားမှု ရှိခဲ့ကြောင်း သိရှိရသည်။

ထို့အပြင် နောင်ချိုမြို့နယ်အတွင်းသို့ သျှမ်းလက်နက်ကိုင်တပ်ဖွဲ့ လှုပ်ရှားမှုများလည်း ရှိနေသည့်အတွက် စစ်ရေး တင်းမာမှု ဖြစ်နိုင်ချေများကြောင်း ဒေသခံများက ပြောသည်။

Leave a Comments

- Advertisement -spot_img

Latest article