Saturday, July 20, 2024

မူဆယ်မြို့ ပြန်ပေးဆွဲခံရ ကလေးတစ်ဦး တရုတ်ယွမ် ငါးသိန်း ပြန်ရွေးယူခဲ့ရ

Must read

သျှမ်းပြည်မြောက်ပိုင်း မူဆယ်မြို့တွင် တရုတ်စာသင်ကျောင်း သွားတက်သော ၉ နှစ်အရွယ်ရှိ ကလေးငယ်တစ်ဦး အမည်မသိအုပ်စုက ပြန်ပေးဆွဲသွားပြီး တရုတ်ယွမ်ငွေ ငါးသိန်း (မြန်မာကျပ်ငွေ ကာလပေါက်ဈေး ကျပ်သိန်း ၁၂,၀၀၀) ဖြင့် ပြန်ရွေးယူခဲ့ရကြောင်း စုံစမ်းသိရှိရသည်။

လက်ရှိ တရုတ်ယွမ်ငွေ ကာလပေါက်စျေးသည် မြန်မာငွေ တစ်သိန်းကျပ်လျှင် ၂၄၀ ယွမ်သာ ရှိကြောင်း သိရှိရသည်။

ယမန်နေ့ (အောက်တိုဘာ ၁၅ ) ရက် နံနက်ပိုင်းတွင် တရုတ်စာသင်ကျောင်း သွားတက်သည့် ၉ နှစ်အရွယ်ရှိ ကလေးငယ် တစ်ဦးသည် ရပ်ကွက်လမ်းထဲ လမ်းလျှောက်သွားနေစဉ် ကားတစ်စီးနှင့် လူ ၄ ယောက်က ၎င်း ကလေးငယ်ကို ပြန်ပေးဆွဲသွားကြောင်း မူဆယ်ဒေသခံတစ်ဦးက သျှမ်းသံတော်ဆင့်ကို ပြောသည်။

ပြန်ပေးဆွဲခံရစဥ်

“တရုတ်ကျောင်းသွားတက်တာ ကလေး ၃ ယောက်ပါတယ်။ ကလေးလာတဲ့ လမ်းမှာ သူတို့က ကြိုစောင့်ပြီး ကားထဲကို ဆွဲထည့်ပြီး ဖမ်းသွားတာ။ အဲ့ကလေးရဲ့မိဘက တရုတ်ယွမ်ငွေ (ငါးသိန်း) ပေးပြီးတော့ ကလေးက ပြန်လွှတ်လာတာ “ ဟု ၎င်းဒေသခံတစ်ဦးက ပြောသည်။

အဆိုပါ ပြန်ပေးဆွဲခံရသော ကလေးမှာ မူဆယ်မြို့ ခရစ်ယာန် ရပ်ကွက်မှ ကလေးငယ်များ ဖြစ်ကြပြီး ၎င်းကလေးကို မိဘများဖြစ်သူက တရုတ်ယွမ် (ငါးသိန်း) ဖြင့် ပြန်ရွေးယူခဲ့ကြောင်း သိရသည်။

ထို့အပြင် ကလေးအုပ်ထိန်းသူများ ဖြစ်သည့် မိဘကိုယ်တိုင်များကလည်း ကလေးကျောင်းတက်သွားနေစဉ် အတွင်းမှာ ကလေး၏ လုံခြုံရေးအတွက် မပေါ့ဆစေလိုကြောင်း၊ မိဘများက လိုက်လံ ကြိုပို့ လုပ်ဆောင်ပေးရန် လိုအပ်ကြောင်း ၎င်းက ထပ်လောင်းပြောသည်။

မူဆယ်မြို့သည် လက်နက်ကိုင်ပေါများသည့် ဒေသဖြစ်ပြီး စစ်အာဏာသိမ်းပြီးနောက် လုယက်မှု၊ဓားပြတိုက်မှု နေ့စဉ်ဖြစ်ပွားသော်လည်း တရားခံများကိုလည်း တကြိမ်တခါမျှမဖမ်းဆီးနိုင်ခဲ့ပေ။

Leave a Comments

- Advertisement -spot_img

Latest article