Thursday, December 1, 2022

ဆီဆိုင်တွင် မူးယစ်ဆေးကြောင်သည့်သား က မိခင်ဖြစ်သူကို ရိုက်နှက်

Must read

သျှမ်းပြည်တောင်ပိုင်း ဆီဆိုင်မြို့တွင် မူးယစ်ဆေးဝါးသုံးစွဲသည့် သားက မိခင်ဖြစ်သူကို ရိုက်နှက်သည့် အမှုဖြစ်ပွားခဲ့ကြောင်း စုံစမ်းသိရသည်။

ဆီဆိုင်မြို့ မြကန်သာရပ်ကွက် ၅ တွင် ပြီးခဲ့သည့် စက်တင်ဘာလ ဒုတိယပတ်က မူးယစ်ဆေးဝါးသုံးစွဲ နေသော သားဖြစ်သူတစ်ဦးက မူးယစ်ဆေးကြောင်ပြီး မိခင်ဖြစ်သူကို ပြင်းထန်စွာရိုက်နှက်သော မှုခင်းတစ်ခု ဖြစ်ပွားခဲ့ကြောင်း ဆီဆိုင်ဒေသခံတစ်ဦးက သျှမ်းသံတော်ဆင့်ကို ပြောသည်။

“ မူးယစ်ဆေးဝါး ကြောင်ပြီး မိဘကို ပြန်ရိုက်နှက်တာ။ ဒဏ်ရာတွေရပြီး ဆေးရုံတက်လိုက်ရသေးတယ်။ ဆီဆိုင်မှာ မူးယစ်ဆေးဝါး သုံးစွဲသူအရမ်းများတယ်။ မူးယစ်ဆေးဆွဲကြပြီး ဆေးကြောင်နေတဲ့ကလည်း များတယ်။ လုံခြုံရေးအတွက် အရမ်းစိုးရိမ်နေတယ် “ ဟု ၎င်းဒေသခံတစ်ဦးက ပြောသည်။

မူးယစ်ဆေးသုံးစွဲသူ

အဆိုပါ ပြစ်မှုကြူးလွန်ထားသော သားဖြစ်သူကို ဆီဆိုင်မြို့နယ် ရဲစခန်းတွင် ချုပ်နှောင်ထားခဲ့ လိုက်ကြောင်း သိရသည်။

ထို့အပြင် ဆီဆိုင်မြို့မှာ ယခုလတွင်း အုပ်စုဖွဲ့ဖြင့် လိုက်ခိုးနေသော သူခိုးများ သိသိသာသာ များပြားလာနေကြောင်း ရဲများကဖမ်းဆီး ဆောင်ရွက်နိုင်ခြင်း မရှိသေးကြောင်း ဆီဆိုင်မြို့ဒေသခံ အမျိုးသားတစ်ဦးက ပြောသည်။

“အရင်ကစပြီး အခုလအထိ အုပ်စုဖွဲ့ပြီး လိုက်ခိုးနေတဲ့ သူခိုးတွေ သိသိသာသာ များလာတယ်။ ရဲတွေက မဖမ်းပေးနိုင်ဘူး။ သူတို့ကလည်း အခြေနေအရ သူတို့စခန်းနဲ့လည်း သိပ်မခွာကြဘူး။ ပြီးတော့ မူးယစ်ဆေးဝါး သုံးတဲ့သူထက် ထုတ်လုပ်တဲ့နေရာ၊ ရောင်းတဲ့သူကို အရေးပေး ဆောင်ရွက်ပေးစေချင်တယ် “ ဟု ၎င်း ဒေသခံတစ်ဦးက ပြောသည်။

စစ်အာဏာသိမ်းပြီး ၂ နှစ်နီးပါး ကာလအတွင်းမှာ ဆီဆိုင်မြို့ အပါအဝင် သျှမ်းပြည်တပြည်လုံးရှိ မြို့နယ်များတွင် လည်း မူးယစ်ဆေးသုံးစွဲပြီး ဆေးကြောင်နေသူများ နှင့် အုပ်စုဖွဲ့သူခိုးများ ပိုများလာသောကြောင့် နေစဉ်နီးပါး အိမ်တွင်းဖောက်ခံရခြင်း၊ ဓားပြတိုက်ခံရခြင်းများ ကြုံတွေ့နေရကြောင်း သိရသည်။

ပြီးခဲ့သည့် (အောက်တိုဘာ ၁၃) ရက် နံနက်ပိုင်း ၁၀ နာရီကျော်တွင် လွိုင်လင်မြို့နယ် ပင်လုံမြို့ ပင်လုံ – ကျောက်တန်းလမ်းသွားတွင် ကျပ်သိန်း ၃၉၀ ကျော် တန်ဖိုးရှိ မူးယစ်ဆေးဝါး တင်ဆောင်လာသော ကားတစ်စီးကို သိမ်းဆည်းရမိသေးကြောင်း သတင်း သိရသည်။

Leave a Comments

- Advertisement -spot_img

Latest article