သျှမ်းပြည်တောင်ပိုင်း မိုးနဲမြို့နယ် ကင်တုံကျေးရွာတွင် လူငယ်များ လောင်းကစားသွားရောက်ကစားရာမှတဆင့် အချင်းချင်း ရန်ဖြစ်ပွားခဲ့ကြောင်း စုံစမ်းသိရှိရသည်။

မိုးနဲမြို့နယ် ကင်တုံကျေးရွာထဲတွင် အောက်တိုဘာ ၁၁ ရက်မှ စပြီး လောင်းကစားဝိုင်းဖွင့်လှစ်ခဲ့ပြီး လူငယ်များ သွားရောက်ကစားရာမှ တဆင့် အောက်တိုဘာ ၁၂ ရက်တွင် လူငယ်အချင်းချင်း ရိုက်နှက်ရန်ဖြစ်မှု ဖြစ်ပွားခဲ့ကြောင်း သိရသည်။

“သူတို့ ရန်ဖြစ်တာကတော့ လောင်းကစားဝိုင်းထဲလာဖြစ်တာတော့ မဟုတ်ဘူး။ လောင်းကစားဝိုင်းကနေ မကျေနပ်ကြလို့ ရန်ဖြစ်ကြတာ။ မိုးနဲမြို့ထဲက လူငယ် ၆ ယောက်က ကင်တုံရွာသားတစ်ယောက်ကို ဝိုင်းရိုက်ကြတာတဲ့။ ရိုက်ခံရတဲ့သူက ခေါင်းကွဲသွားတယ်” ဟု မိုးနဲမြို့ ဒေသခံ အသက် ၃၅ နှစ် ဝန်းကျင် အမျိုးသားတစ်ဦးက ပြောသည်။

မိုးနဲမြို့သည် လောင်းကစားဝိုင်းကို ၄ လကြာ ပိတ်ခဲ့ပြီး ယခု အောက်တိုဘာလအတွင်း ပြန်ဖွင့်လာခဲ့ကြောင်း သိရသည်။
အလားတူ လက်ရှိအချိန်တွင် စိုက်ပျိုးရေးသီးနှံများ ရောင်းချိန်ဖြစ်ပြီး ပြည်သူများ ငွေရချိန်ဖြစ်သည်။

“သူတို့ပိတ်ထားတာ ၄ လလောက်ရှိပြီ။ အခုမှ ပြန်ဖွင့်တာ။ ပြီးတော့ အခုချိန်က ခြံထွက်သီးနှံတွေ ရောင်းတဲ့ချိန်ဖြစ်တယ်။ ပြည်သူတစ်ချို့လည်း ပိုက်ဆံရှိလာပြီ။ အဲ့ကြောင့် ပိုက်ဆံရှိတဲ့ချိန်မှာ သူတို့တွေ ရွေးဖွင့်လိုက်တာ။ ပြည်သူတွေလည်း သွားဆော့ကြတာပေါ့” ဟု ဒေသခံ အမျိုးသားက ပြောသည်။

အလားတူ ဒေသခံတစ်ဦးက “အခုက လောင်းကစားဖွင့်လာပြီဆိုတော့ အိမ်ထောင်စုအရေး ပြဿနာဖြစ်လာတော့မှာ။ ရန်တွေ ပိုဖြစ်လာတော့မှာကို စိုးရိမ်ရတော့မယ်။ လောင်းကစားကြောင့် အိမ်ထောင်ရေးတွေ ပျက်လာနိုင်တယ်။ အခုတောင် လူငယ်တွေ တော်တော်ရန်ဖြစ်နေကြပြီ” ဟု ပြောသည်။

ထိုကင်တုံကျေးရွာသည် လောင်းကစားဝိုင်း၊ မူးယစ်ဆေးဝါးသုံးစွဲသူများ၊ ကာလာအိုကေ နှင့် ဒုစရိုက်ပေါများစွာသည့် နေရာဖြစ်ကြောင်း ဒေသခံများ ပြောပြချက်အရ သိရသည်။

စစ်တပ်က အာဏာသိမ်းပြီးနောက်ပိုင်း သျှမ်းပြည်အနှံ့ လောင်းကစားဝိုင်းများ ပြန်လည်ထွန်းကာလာခဲ့သည်။