သျှမ်းပြည်တောင်ပိုင်း တောင်ကြီးမြို့ ဘုရားဖြူရပ်ကွက်တွင် အရက်သောက်ပြီး သောင်းကျန်းနေသော ပြည်သူတစ်ဦးကို ရဲနှစ်ဦးက သွားရောက် ဖမ်းဆီးနေစဉ်အတွင်း ဓားဖြင့်ခုတ်ခံရပြီး ထိခိုက်ဒဏ်ရာ ရရှိခဲ့ကြောင်း စုံစမ်းသိရှိရသည်။
အောက်တိုဘာ ၁၃ ရက် မနက် ၉ နာရီဝန်းကျင်တွင် တောင်ကြီးမြို့ ဘုရားဖြူရပ်ကွက်က အရက်အလွန်အကြူးသောက်ပြီး သောင်းကျန်းနေသော ပြည်သူတစ်ဦးကို ရဲနှစ်ဦးက သွားရောက် ဖမ်းဆီးနေစဉ် ၎င်းက ဓားဖြင့်ပြန်လည်တိုက်ခိုက် လိုက်သဖြင့် ရဲနှစ်ဦးက ထိခိုက်ဒဏ်ရာရရှိသွားကြောင်း တောင်ကြီးဒေသခံ တစ်ဦးက သျှမ်းသံတော်ဆင့်ကို ပြောသည်။
“မြို့မစခန်းက ရဲတပ်သားတစ်ယောက်နဲ့ နယ်ထိန်းရဲတွေလို့ ကြားတယ်။ အရက်မူးတဲ့သူကို သွားဖမ်းရင်း ဓားနဲ့ခုတ်ခံရတာ။ ထိခိုက်ဒဏ်ရာတွေတော့ သေချာမသိရဘူး။ အရက်မူးတဲ့သူကို စစ်တပ်က ဖမ်းသွားတယ် “ ဟု ၎င်းဒေသခံတစ်ဦးက ပြောသည်။
ထို့အပြင် ပြစ်မှုကျူးလွန်နေသော ပြည်သူတစ်ဦးကို တောင်ကြီးမြို့မရဲစခန်းမှ ဖမ်းချုပ်နှောင်ထားကြောင်း ထိခိုက်ဒဏ်ရာ ရရှိသော ရဲနှစ်ဦးမှာလည်း ဆေးရုံတွင်ဆေးကုသခံနေရကြောင်း သိရသည်။
“ဘုရားဖြူ ရပ်ကွက်က လူပေါင်းစုံနေတဲ့နေရာ၊ လောင်းကစားဝိုင်းလည်းရှိတယ်။ ရပ်ကွက်က ရ.ပ.ခ တပ်စခန်းနဲ့လည်း နီးတယ်။ သူတို့ပိုက်ဆံရချင်လို့ သွားလုပ်တာနေမှာပေါ့ “ ဟု ဒေသခံတစ်ဦး ထပ်လောင်း ပြောသည်။
စစ်အာဏာသိမ်းပြီး ၂ နှစ်နီးပါးတွင် တောင်ကြီးမြို့အပါအဝင် သျှမ်းပြည်နယ်အတွင်းရှိ မြို့နယ်များလည်း လောင်းကစားဝိုင်းများ ပေါများလာပြီး မူးယစ်ဆေးဝါး သုံးစွဲသူလည်း ပေါများခြင်းကြောင့် နေ့စဉ်ဆက်တိုက် လုယက်မှုများ၊ ဓားပြတိုက်မှုများ ရှိလာနေကြောင်း သိရသည်။
Leave a Comments