သျှမ်းပြည်မြောက်ပိုင်း ကျောက်မဲမြို့နယ် ပန်ဟူကျေးရွာအုပ်စု ပန်တောင်ကျေးရွာဒေသခံ တစ်ဦးသည် ပြီးခဲ့သည့် ၂၀၂၁ ခုနှစ်ကတည်းက မြေမြှုပ်မိုင်းနင်းမိပြီး လက်ရှိအချိန်ထိ ခွဲစိတ်ကုသမှု မပြုလုပ်ရသေးကြောင်း စုံစမ်းသိရှိရသည်။

မြေမြှုပ်မိုင်းနင်းမိသည့် အမျိုးသား လုံးအိန္တဂ သည်  အသက် (၅၀) ဝန်းကျင်ရှိပြီး ၂၀၂၁ ခုနှစ်ကတည်းက တောထဲ နွားသွားရှာရင်း မြေမြှုပ်မိုင်းနင်းမိကာ လက်ရှိအချိန်ထိ ခန္ဓာကိုယ်အတွင်းထဲရှိနေသည့် မိုင်းစများကို ခွဲထုတ်ရန် ခက်ခဲနေကြောင်း သိရသည်။

“သူ့ ခန္ဓာကိုယ်ထဲမှာ မိုင်းစ ဝင်ထားတာ (၃) နေရာလောက်ရှိတယ်။ ပေါင်၊ ခြေတစ်လုံး နဲ့ ခြေမျက်စိထဲမှာ မိုင်းစ တွေရှိနေသေးတယ်။ ထုတ်ယူဖို့ ခက်နေတာ။ သွားခွဲစိတ်ဖို့လည်း ပိုက်ဆံမရှိဘူးတဲ့။ အသွားအလာ၊ အိပ်ရင်လည်း တော်တော်နာတယ်တဲ့။ ခွဲစိတ်ကုသဖို့ကလည်း အနည်းဆုံး ငွေ (၁၀) သိန်းလောက်က လိုတယ်” ဟု ကျောက်မဲမြို့ စစ်ဘေးရှောင်များကို ကူညီပေးနေသည့် သူတစ်ဦး က ပြောသည်။

လက်ရှိ လုံးအိန္တဂတို့ မိသားစုသည် ကျောက်မဲမြို့နယ် မိုင်းငေါ့မြို့နယ်ခွဲဘက်တွင် စစ်ဘေးတိမ်းရှောင်လာနေကြောင်း သိရသည်။

လုံးအိန္တဂသည် ကျောက်မဲမြို့နယ်အတွင်း တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားချိန်က မြေမြှုပ်မိုင်း နင်းမိခဲ့ကြောင်း သိရသည်။

ထိုသို့ မြေမြှုပ်မိုင်းနင်းမိသော်လည်း မည်သည့် တိုင်းရင်းသားလက်နက်ကိုင်တပ်ဖွဲ့မှ တာဝန်ယူ ဖြေရှင်းပေးခြင်းမရှိကြောင်း သိရသည်။

ကျောက်မဲမြို့နယ်အတွင်း ပြီးခဲ့သည့် ၂၀၂၁ ခုနှစ်တွင် တိုင်းရင်းသားလက်နက်ကိုင်များဖြစ်ကြသော RCSS နှင့် မြောက်ပိုင်းမဟာမိတ်တပ်ဖွဲ့ SSPP ၊ TNLA တို့ တိုက်ပွဲဖြစ်ပွားခဲ့ကြသည်။