သျှမ်းပြည်တောင်ပိုင်း တောင်ကြီးမြို့ ကျောင်းကြီးစု ရပ်ကွက်တွင်းရှိ နေအိမ်တစ်လုံး ဖောက်ထွင်းခံရပြီး တန်ဖိုးရှိ ပစ္စည်း အများအပြားပါသွားကြောင်း စုံစမ်းသိရသည်။
ပြီးခဲ့သည့် အောက်တိုဘာ ၉ ရက် (သီတင်းကျွတ်လပြည့်နေ့ ည) တွင် အိမ်တွင်းရှိ ပစ္စည်းများ လက်ဝတ် ရတနာများ နှင့် ငွေသားများ တန်ဖိုးကျပ်ငွေ သိန်း (၅၀) ဝန်းကျင် ပါသွားကြောင်း ကျောင်းကြီးစု ရပ်ကွက်ရှိ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“တောင်ကြီးမှာက နေ့တိုင်းလိုလို အိမ်ဖောက်ခံနေရတာ။ သီတင်းကျွတ် ည ဆိုတော့ အိမ်မှာ လူမရှိဘူးလေ။ အဲ့နဲ့ ဝင်ခိုးသွားတယ်။ လက်ဝတ် ရတနာတွေကော ပါသွားတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ တောင်ကြီးမြို့ပေါ်တွင် နေအိမ်၊ ဆိုင်ခန်းများ မကြာခဏ ဖောက်ထွင်းခံရသော်လည်း သက်ဆိုင်ရာ ရဲများက ဖမ်းဆီးဆောင်ရွက်ပေးခြင်း တစ်ကြိမ်မှမရှိခဲ့ကြောင်း သိရသည်။
“ 212 ဈေးဆိုင်ခန်းတွေ ဖောက်ခံရတုန်းကလည်း ရဲတွေက ဘာမှမလုပ်ပေးဘူး။ ရဲကိုသွားတိုင်လိုက်တိုင်း စုံစမ်းပေးမယ်နဲ့ ပြီးသွားတာပဲ။ အခု နေအိမ်ဖောက်ထွင်းခံရင် ရဲတွေက ဘာမှ မလုပ်ပေးတော့ ပြည်သူတွေက ကိုယ့်အသိစိတ် နဲ့ သတိထားနေရတယ်။ ရဲတွေက ပြည်သူတွေကို ငွေညှစ်ဖို့ စောင့်နေတယ်“ ဟု ကျောင်းကြီးစု ရပ်ကွက်ရှိ ဒေသခံ တစ်ဦး ကပြောသည်။
တောင်ကြီးမြို့ပေါ်တွင် ယခုရက်ပိုင်းမှာ ရဲ နှင့် ယာဉ်ထိန်းရဲများက လိုင်စင်မဲ့ ယာဉ်များကို အချက်အလက် စစ်ဆေးမေးမြန်းပြီး အချက်အလက် မပြည့်စုံလျှင် လိုင်စင်မဲ့ ယာဉ်ဟုသတ်မှတ်ကာ ထောင်ဒဏ်ချမှတ်နိုင်ကြောင်း ခြိမ်းခြောက်ပြီး ငွေတောင်းခံယူမှု ပြုလုပ်နေကြောင်း တောင်ကြီးဒေသခံ တစ်ဦးက သျှမ်းသံတော်ဆင့်ကို ပြောသည်။
“ ရဲ နဲ့ ယာဉ်ထိန်းရဲတွေက ဉပဒေ နဲ့ လုပ်စားနေတယ်။ လိုင်စင်အချက်လက် မပြည့်စုံရင် လိုင်စင်မဲ့ယာဉ်ဆိုပြီး ငွေတောင်းတာ။ ကားတစ်စီးကို ကျပ်ငွေ (၁၀) သိန်းအထက် တောင်းတယ်။ ပြီးတော့ ကား အမျိုးအစားပေါ် မူတည်ပြီး ဒီထက်ပိုတောင်းတာရှိတယ် “ ဟု ၎င်းဒေသခံတစ်ဦးက ပြောသည်။
တောင်ကြီးမြို့တွင် စစ်ကောင်စီ လက်အောက်ခံ ရဲများ နှင့် ယာဉ်ထိန်းရဲများသည် မြို့ပေါ်တွင် နေ့တိုင်းနီးပါး နေအိမ်တွင်း ဖောက်ထွင်းနေသော သူခိုးများကို အရေးယူဆောင်ရွက်ပေးခြင်း တစ်ကြိမ်မှ မရှိခဲ့ခြင်း ပြည်သူများကိုသာ ဥပဒေဖြင့် ငွေညှစ် နေလျက်ရှိကြောင်း ဒေသခံများဆိုသည်။
