သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) မှ ပြည်ထောင်စုအတွင်းရှိ တိုင်းရင်းသားလက်နက်ကိုင် တော်လှန်ရေးအဖွဲ့အစည်းများနှင့် တွေ့ဆုံဆွေးနွေးလိုကြောင်း RCSS မှ ထုတ်ပြန်ထားသည်။

အဆိုပါ ကမ်းလှမ်းမှုသည် ယနေ့ အောက်တိုဘာ (၁၀) ရက် မှ ၂၀၂၃ ခုနှစ် ဖေဖော်ဝါရီ (၁၀) ရက်အထိ သတ်မှတ်ထားပြီး တွေ့ဆုံဆွေးနွေးခြင်းမှ တစ်ဆင့် အပြန်အလှန် ဝင်ထွက်သွားလာ ဆက်ဆံနိုင်ရေး၊ အထင်မှားမှုအား လျှော့ချနိုင်ရေး၊ နားလည်မှုရှိရေး၊ ယုံကြည်မှု တည်ဆောက်နိုင်ရေး နှင့် လူထု တိုင်းပြည်အကျိုးအတွက် နိုင်ငံရေးနည်းလမ်းဖြင့် နိုင်ငံရေးပြဿနာများအား ဖြေရှင်းနိုင်ရေးအား ရည်ရွယ်ကြောင်း ထုတ်ပြန်ချက်မှာ ဖော်ပြထားသည်။

RCSS ၏ ပြောရေးဆိုခွင့်ရှိသူ ဗိုလ်မှူး ခမ်းစံ က – “ပထမတစ်ချက် ကျနော်တို့ ထုတ်ပြန်ရတဲ့ အကြောင်းအရင်း ဆွေးနွေးဖို့ ကမ်းလှမ်းတာက ဒီတခေါက်မှ မဟုတ်ဘူး။ အရင်ကလည်း ထုတ်ပြန်တာရှိတယ်။ မနှစ်ကလည်း ဖေဖော်ဝါရီ (၇) ရက်ကလည်း ကျနော်တို့ ထုတ်ပြန်တာရှိတယ်။ ကျနော်တို့ဘက်က ဆန္ဒထုတ်ဖော်ကမ်းလှမ်း တာလေ။ အကောင်းဆုံးတော့ မျှော်လင့်ထားတယ်။ တွေ့ဆုံဆွေးနွေးမှုဆိုတာ တစ်ဖက်တည်းနဲ့ လုပ်လို့မရဘူး။ နှစ်ဖက် ဆွေးနွေးမှရမယ်” ဟု ပြောသည်။

အဆိုပါ ထုတ်ပြန်ရသည့် အဓိက ရည်ရွယ်ချက်သည် (၂) ပိုင်းရှိပြီး ပထမ တစ်ချက်သည် နိုင်ငံရေး နှင့် စစ်ရေးပဋိပက္ခမှာ ပြည်သူလူထုမှ ခြေခံ ကျသဖြင့် ပြည်သူလူထု ဒုက္ခရောက်လျှင် နိုင်ငံရေး နှင့် စစ်ရေး တက်ရောက်မှု ရှိလာနိုင်ခြင်း၊ ဒုတိယ အချက်မှာ တိုင်းရင်းသားလက်နက်ကိုင် ပဋိပက္ခအပိုင်း စစ်ရေးတင်းမာပြီး အချင်းချင်းကြား သတင်းစီးဆင်းမှု အားနည်းပြီး သတင်းမှား စီးဆင်းမှု များနေကြောင်း၊ တွေ့ဆုံဆွေးနွေးမှုရှိလျှင် အပြန်အလှန် နားလည်မှု ရှိလာနိုင်ပြီး အထင်အမြင် လွဲမှားမှု လျော့ချနိုင်မည်ဟု ဆိုသည်။

အဖွဲ့အစည်းအားလုံး နှင့် တွေ့ဆုံဆွေးနွေးခြင်းသည် မဟာမိတ်ဖြစ်လာနိုင်ရေး၊ စည်းလုံးညီညွတ်မှု တည်ဆောက်နိုင်ရေး နှင့် ဖက်ဒရယ်ပြည်ထောင်စု တည်ဆောက်နိုင်ရေး အထိ ဆောင်ရွက်နိုင်မည်ဟု ယုံကြည်သဖြင့် တွေ့ဆုံဆွေးနွေးရေး ကမ်းလှမ်းခြင်းဖြစ်သည်ဟု ဆိုသော်လည်း မည်သို့ လက်တွေ့ကျကျ အကောင်အထည်ဖေါ်သွားမည်ဆိုတာကိုတော့ ဖော်ပြထားခြင်းမရှိပေ။

ပြီးခဲ့သည့် ဧပြီ (၂၂) ရက်မှာ စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ပြည်တွင်း လက်နက်ကိုင် ပဋိပက္ခ ချုပ်ငြိမ်းရေးအတွက် တိုင်းရင်းသားလက်နက်ကိုင် အဖွဲ့အစည်းမှ ခေါင်းဆောင်များနှင့် ဆွေးနွေးရန် ဖိတ်ခေါ်ခဲ့သည်။

စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် ဖိတ်ခေါ်သည့် ငြိမ်းချမ်းရေးဆွေးနွေးပွဲသည် RCSS အနေဖြင့် ပြီးခဲ့သည့် မေလ တွင် ပထမတကြိမ် နေပြည်တော်သို့ သွားရောက်ဆွေးနွေးခဲ့ပြီး သြဂုတ်လတွင်လည်း ဒုတိအကြိမ်အဖြစ် စကစ ခေါင်းဆောင်နှင့် သွားရောက်တွေ့ဆုံဆွေးနွေးခဲ့သည်။