သျှမ်းပြည်အတွင်း ပြောင်းဈေးနှုန်းများ မြင့်တက်လာပြီး ဈေးကောင်းရသော်လည်း တခြား ကုန်ပစ္စည်း ဈေးနှုန်းများက ကျဆင်းခြင်းမရှိသည့်အတွက် ပြည်သူများ စားဝတ်နေရေး အခက်အခဲများ ရှိနေကြောင်း သတင်းသိရသည်။

ပြီးခဲ့သည့် စက်တင်ဘာလအတွင်းမှ စတင်ပြီး ယနေ့အချိန်အထိ သျှမ်းပြည်အတွင်း ရပ်စောက်မြို့နယ်၊ နောင်ချို မြို့နယ်၊ သန္နီမြို့နယ်၊ ကျိုင်းတောင်းမြို့နယ်တို့နှင့် တခြားမြို့နယ်တို့မှ ပြောင်းဖူးရောင်းဈေးတို့သည် တစ်ပိဿာ ၆၀၀၀ ကျပ်မှ ၁၀၀၀၀ ကျပ်အထိ ရောက်နေကြောင်း ဒေသခံများက သျှမ်းသံတော်ဆင့်ကို ပြောသည်။

“လက်ရှိ ရက်ပေါင်း ၂၀ အတွင်း ပြောင်းဖူးဈေးကကောင်းနေတယ်၊ ကျနော်တို့မြို့ (ရပ်စောက်မြို့) မှာ တစ်ပိဿာ ၇၂၀ ကျပ်အထိ ဈေးရတယ်၊ အဲ့လိုပြောင်းဈေးက ကောင်းနေပေမဲ့ တခြား လူသုံးကုန်ပစ္စည်းတွေက မကျသေး တော့ ဘာမှတော့ ထူးပြီးမမြတ်ပါဘူး” ဟု ရပ်စောက်မြို့နယ်မှ ပြောင်းဖူးရောင်းဝယ်ရေး လုပ်ကိုင်သူ တစ်ဦးက ပြောသည်။

ထို့နည်းအတူပင် နောင်ချိုမြို့နယ်အတွင်းမှ ပြောင်းကုန်သည်များ ဝယ်ယူသည့် ပြောင်းဈေးနှုန်းများလည်း ကောင်းမွန်နေကြောင်း ဒေသခံများထံမှ သိရသည်။

“လက်ရှိပြောင်းဖူးဈေးက အခြောက်ဆိုရင် ၁၀၀၀ နီးနီးဈေးရတယ်၊ အစိုဆိုရင်တော့ ၆၀၀ ကျပ်ဝန်းကျင် လောက်ပေါ့၊ စစ်အာဏာမသိမ်းခင်တုန်းကဆိုရင် ပြောင်းအခြောက် တစ်ပိဿာကို ၁၅၀၀ အထိ ရဖူးတယ်၊ အခုလို ပြောင်းဖူးဈေးကောင်းရတဲ့အချိန် တခြာ ကုန်ဈေးနှုန်းလည်း ကျရင် ကောင်းမှာပဲ” ဟု နောင်ချိုမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာလအတွင်းမှ စတင်ကာ သိန္နီမြို့နယ် အတွင်း ပြောင်းဖူး ပိဿာ ၃၀ တစ်အိတ်ကို ၂၈၀၀၀ ကျပ်ကနေ ၂၉၀၀၀ ကျပ်အထိ ဈေးကောင်းရနေကြောင်း သိန္နီဒေသခံတစ်ဦးက သျှမ်းသံတော်ဆင့်ကို ပြောသည်။

ထို့အပြင် ကျိုင်းတောင်းမြို့နယ်အတွင်းတွင်လည်း ပြောင်းဖူးအခြောက် ၇၀၀ ကျပ် နှင့် တချို့သော ကုန်သည်ပြောင်းပွဲရုံများတွင်လည်း ၈၀၀ ကျပ်အထိ ဈေးကောင်းရကြောင်း သတင်းသိရသည်။