သျှမ်းပြည်မြောက်ပိုင်း နောင်ချိုမြို့နယ်တွင် တိုက်ပွဲများ ဆက်လက်ပြင်းထန်နေပြီး စစ်ရှောင်နေရသည့် ဒေသခံ အများစုသည် စားဝတ်နေရေး အခက်အခဲ ကြုံတွေ့နေရသည်ဟု စုံစမ်းသိရသည်။

ပြီးခဲ့သည့် (ဩဂုတ်လ ပထမ)ပတ်မှ စတင်၍ ယနေ့ (ဒီဇင်ဘာလ ၂၀ ရက်)အထိ နောင်ချိုမြို့နယ်တွင် စစ်ကောင်စီတပ်သည် မြေပြင်ထိုးစစ် စတင်သဖြင့် တအာင်း(ပလောင်) အမျိုးသား လွတ်မြောက်ရေး တပ်မတော် TNLA ပူးပေါင်းတပ်ဖွဲ့တို့နှင့် တိုက်ပွဲများ ယနေ့ထိ ဆက်လက်ပြင်းထန်နေကြောင်း သိရသည်။

နောင်ချိုမြို့နယ် တောင်းခမ်းကျေးရွာ၊ အုမ္မသီး အုမ္မခါး လမ်းခွဲနှင့် ဂန့်ကော်ကျေးရွာဘက်တွင် ပြီးခဲ့သည့် ဩဂုတ်လတွင် တိုက်ပွဲများ စတင်ဖြစ်ပွားလာခဲ့သည်မှာ ယနေ့ အထိ ၄ လနီးပါးကြာသည့်အထိ စစ်ကောင်စီနှင့် TNLA ပူးပေါင်းတပ်ဖွဲ့တို့ တိုက်ပွဲပြင်းထန်ခဲ့သည်ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လက်နက်ကြီးသံတွေ နေ့တိုင်းကြားရတယ်။ တိုက်ပွဲတွေတော့ ဆက်လက်ပြင်းထန်နေတုန်းပဲ။ တောင်းခမ်း၊ အုမ္မတီး၊ အုမ္မခါး ဘက်ရော ဂန့်ကော်ကျေးရွာဘက်မှာလည်း ပစ်နေကြတုန်း။ အခုတော့ ဘယ်သူမှ မနေရဲကြတော့ဘူး ။ထွက်ပြေးကုန်ပြီ ။ တိုက်ပွဲက ၄ လနီးပါးလောက်ရှိနေပြီ၊ ပြန်နေဖို့လည်း နားစွင့်နေရတယ်၊ ခုထိ တိုက်ပွဲ မရပ်သေးဘူး”ဟု ၎င်းက ပြောသည်။

ထို့အပြင် နောင်ချိုမြို့တွင် နေ့စဉ် လက်နက်ကြီးဖြင့် အဆက်မပြတ် ပစ်ခတ်ခြင်ကြောင့် နေအိမ် အဆောက်အအုံနှင့် စစ်ရှောင်ဒေသခံများလည်း ထိခိုက်ဒဏ်ရာ ရရှိသူ များပြားလာသည်ဟု သိရသည်။

စစ်ကောင်စီ၏ လက်နက် ပစ်ခတ်မှုကြောင်း ပြောင်းခြံနှင့် လယ်ယာခြံများသို့ မည်သူမှ မသွားရကြောင်း၊ လက်ရှိတွင် စစ်ရှောင်ပြည်သူများသည် ‌ဆေးဝါးများနှင့် စာဝတ်နေရေးအတွက် နေ့စဉ်နှင့်အမျှ ပိုမို စိုးရိမ်နေရကြောင်း စစ်ရှောင် အမျိုးသမီးတစ်ဦးက ပြောသည်။

“စစ်တပ်က နေ့တိုင်း လက်နက်ကြီးနဲ့ ပစ်တော့ ဘယ်မှ မသွားရဲကြဘူး။ ဘာလိုဆို ခြံတွေ လယ်တွေက တိုက်ပွဲကြားမှာရှိတော့ ဒီတိုင်းပစ်ထားရတယ်။ အခုပါလာတဲ့ ဆန်တွေက မလောက်တော့ဘူး။ သူများဆီပဲ ကပ်စားနေလို့ ကြာရှည် အဆင်မပြေတော့ဘူး။ ဆေးဝါးတွေက အစ နေမကောင်းဖြစ်ရင် ထိုင်ကြည့်နေရုံပဲ”ဟု ၎င်းက ပြောသည်။

ပြီးခဲ့သည် (နိုဝင်ဘာလ ၂၅ ရက်)နေ့တွင် TNLA ဘက်က အပစ်ရပ်တန့်ဖို့ အသင့်ရှိနေကြောင်းကို ထုတ်ပြန်ခဲ့သော်လည်း စစ်ကောင်စီတပ်မှ စစ်အင်အားဖြည့်တင်းကာ ထိုးစစ်ဆင်နေကြောင်း သပိတ်ကျင်းမြို့နှင့် နောင်ချို့မြို့တွင် တိုက်ပွဲ ဆက်လက်ပြင်းထန်နေသည်ဟု သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။